الماتى قالاسىنداعى ورتالىق كلينيكالىق اۋرۋحاناسىنىڭ جانساقتاۋ بولىمىندە كوروناۆيرۋستىڭ اسقىنعان تۇرىنەن ەمدەلىپ جاتقاندار. 15 شىلدە 2021 جىل. فوتو: QT / كۇلتەگىن اسپانۇلى

قازاقستاندا كوروناۆيرۋس پەن وعان ۇقساس پنەۆمونياعا شالدىققاندار سانى 600 مىڭنان استى، وسىلايشا دۇنيەجۇزىندە ناۋقاستار سانى بويىنشا 42-ورىنعا جىلجىدى. وسى شىلدە ايىنىڭ وزىندە تىركەلگەن سىرقاتتار قاتارى 120 مىڭعا جۋىقتادى. ەكى اپتادان بەرى توقتاۋسىز ءوسىپ جاتقان اۋرۋشاڭدىق 5 مىڭنىڭ ۇستىندە تۇر. دۇيسەنبىدەگى ەپيداحۋال ديناميكاسى، 6,8 مىڭ كەيس – شىلدە ايىنداعى التىنشى رەكوردتى جاڭارتتى. جەكسەنبىنىڭ وزىندە 110 ادام قايتىس بولعان.

دەنساۋلىق ساقتاۋ مينيسترلىگىنىڭ رەسمي مالىمەتىنشە، ەلدە 26 شىلدەدە كوروناۆيرۋس (كۆي+) جۇققان 6797 ادام، ال 25-ءى كوروناۆيرۋس پنەۆمونياسىنا (كۆي-) شالدىققان 23 ادام تىركەلدى. قازىر ەلدە 87 مىڭ ادام (كۆي+ بويىنشا 85 مىڭ، كۆي- بويىنشا 1931) اۋىرىپ جاتىر.

#COVID وتكەن كۇنى پتر تەستى ارقىلى كوروناۆيرۋس جۇققانى راستالعان ناۋقاستار قاتارى تاعى ارتتى. ولاردىڭ باسىم بولىگى ادەتتەگىدەي استانا (1537),  الماتى قالاسى (1207) جانە قاراعاندى وبلىسىندا (796) تىركەلدى. بۇدان وزگە اتىراۋ (480), شىمكەنت (382), شقو (333), الماتى (260), ماڭعىستاۋ (254), قوستاناي (209), پاۆلودار (207), اقمولا (195), تۇركىستان (180), اقتوبە (175) وبلىستارىندا دەرت ۇدەپ تۇر. وتكەن تاۋلىكتە 2625 ادام ايىعىپ ۇيىنە شىعارىلعان. جەكسەنبىدە جيىنى 86 ادام قايتىس بولعان.

#COVID_پنەۆمونياسى 25 شىلدە، دەمالىس كۇنى اقپاراتى ءبىر تاۋلىككە كەشىگىپ بەرىلەتىن كوروناۆيرۋس پنەۆمونياسىنا شالدىققان 23 ناۋقاس ەسەپكە الىندى. سەنبى-جەكسەنبى كۇندەرى مەديتسينالىق ۇيىمداردىڭ دارىگەرلەر قۇرامىنىڭ نەگىزگى بولىگى دەمالاتىندىقتان، رەسمي ەسەپ ۋاقىتىلى جۇرگىزىلمەيدى جانە بۇل كۇندەرى ناۋقاستار دا جۇگىنە بەرمەيدى. ۆەدومستۆو دەرەگىنشە، جەكسەنبىدە سىرقاتتار اتىراۋ (7), استانا، شىمكەنت قالالارى مەن جامبىل، پاۆلودار، ماڭعىستاۋ، الماتى وبلىستارىندا (ارقايسىندا ەكەۋدەن) انىقتالعان. سونىمەن قوسا، 75 ادام ايىعىپ شىققان، تاعى 24 ادام كوز جۇمعان.

#جالپى  دەنمين دەرەگىنە قاراعاندا، ەمدەلىپ جاتقان 87 مىڭنان اسا ناۋقاستىڭ 24 مىڭى اۋرۋحانادا، 62 مىڭى امبۋلاتورلىق باقىلاۋدا. 1461 ناۋقاستىڭ جاعدايى ناشار، ونداعى 306 ادامنىڭ ءحالى وتە اۋىر. بۇدان وزگە 182 سىرقات وكپەنى جاساندى جەلدەتۋ اپپاراتىمەن تىنىستاپ جاتىر.

ۆيرۋستىڭ تارالۋ قاتەرى جاعىنان رەسپۋبليكانىڭ بارلىق ءوڭىرى سارعايىپ-قىزارا ءتۇستى. «قىزىل ايماققا» ەنگەن وڭىرلەر: استانا، الماتى، شىمكەنت قالالارى مەن الماتى، اقمولا، اتىراۋ، اقتوبە،  بقو، قاراعاندى، ماڭعىستاۋ، قوستاناي، قىزىلوردا، سقو، پاۆلودار، شقو، جامبىل وبلىستارى. ال تۇركىستان ءوڭىرى جالعىز «سارى ايماقتا» تۇر. قازاقستان تۇستاس قىزىل رەڭگە بويالدى.

دەنمين حابارىنشا, 1 شىلدەدە پتر سكرينينگى نەگىزىندە 414 سىناما جۇرگىزىلگەن. سايكەسىنشە، بارلىق ۇلگىنىڭ 48,3%-ىنان قازاقستاننىڭ تۇگەل ايماعىنان ۇندىستاندىق «دەلتا» شتامى انىقتالعان. ۇكىمەت مالىمەتىنشە، بيىل كوكتەم-جازدا گەنومدىق زەرتتەۋ ناتيجەسىندە ەلدىڭ باسىم بولىگىنەن ۆيرۋستىڭ برازيليالىق، بريتاندىق، وڭتۇستىكافريكالىق جانە ۇندىستاندىق شتامدارى انىقتالعان.

بىلتىر 13 ناۋرىزدان بەرى COVID-19 ينفەكتسياسىن جۇقتىرعاندار قاتارى 542 مىڭعا، 1 تامىزدان بىلايعى كوروناۆيرۋس پنەۆمونياسى 59 مىڭعا جەتتى. ددسۇ دەرەكقورى مەن ۇلتتىق ستاتيستيكادا قازاقستاندا اۋىرعاندار سانى 602 مىڭنان استى. دەگەنمەن ۇكىمەت كوروناۆيرۋس پەن ونىڭ پنەۆمونياسىن ەكى بولەك ەسەپتەيدى.

پاندەميا باستالعالى جالپى ۆيرۋس جۇققانداردان 11,5 مىڭنان اسا ادام (كۆي+ / U07.1 – 5538, كۆي- / U07.2 – 3649, ىلەسپە اۋرۋلاردان – 2367) قايتىس بولعان. الايدا قازاقستان بيلىگى بويىنان كوروناۆيرۋس تابىلسا دا، باسقا اۋرۋلاردىڭ سەبەبىنەن قايتىس بولدى دەلىنگەندەردى جالپى ستاتيستيكاعا ەنگىزبەيدى. بۇعان قارسى ساراپشىلاردىڭ سوزىنە قاراعاندا، كوروناۆيرۋستىڭ جاناما اسەرىنەن قايتقانداردىڭ جارتىسىنان استامىنىڭ سەبەبى قان اينالىمى جۇيەسىنىڭ اۋرۋلارى بولعاندىقتان، وعان ينفەكتسيا دەرت قوزدىرۋشى فاكتور رەتىندە ولىمگە اكەپ سوقتىرعان.

قازاقستان ۆيرۋس تارالۋى بويىنشا الەمدە دجونس حوپكينس ۋنيۆەرسيتەتى جانە ددسۇ تىزىمىندەگى 221 ەل مەن ايماقتىڭ اراسىندا 42-ورىندا تۇر.

ۇكىمەتتىڭ سوڭعى دەرەگىنە قاراعاندا، قازاقستاندا 3 ملن 356 مىڭ ادام كوروناۆيرۋسقا قارسى ۆاكتسينانى تولىق العان.

"The Qazaq Times"