كوروناۆيرۋستىق ستاتسيونارى بار اۋرۋحانانىڭ قابىلداۋ ءبولىمى الدىنداعى جەدەل جاردەم كولىكتەرى. الماتى قالاسى، قالقامان ىقشام اۋدانى. 22 ءساۋىر 2021 جىل. فوتو: QT / كۇلتەگىن اسپانۇلى

كوكتەم تۋعالى قازاقستاندا 90 مىڭنان سىرقات تىركەلىپ ۇلگەردى. رەسپۋبليكانىڭ ءۇشىنشى تولقىندا قىزىل ايماققا وتكەنىنە 25 كۇن بولدى. كۇندەلىكتى انىقتالىپ جاتقان ناۋقاستار سانى ەكى جارىم مىڭنان، ال ءولىم جاعدايى 20-دان ازايار ەمەس. بۇل پاندەميا كەزىندەگى ەڭ اۋىر كورسەتكىش. سالدارىنان قازاقستان الەمدە ەڭ كوپ ادام اۋىرعان ەلدەر قاتارىندا ءبىر ورىنعا كوتەرىلىپ، 48-ورىنعا ورنالاستى.

دەنساۋلىق ساقتاۋ مينيسترلىگىنىڭ رەسمي مالىمەتىنشە، ەلدە 22 ءساۋىر كوروناۆيرۋس جۇققان 2894 ادام، ال 21-ءى كۇنى كوروناۆيرۋس پنەۆمونياسىنا شالدىققان 35 ادام تىركەلدى. قازىر ەلدە 40 مىڭنان اسا ادام (U07.1 نەمەسە كۆي+ بويىنشا 39 943, U07.2 نەمەسە كۆي- بويىنشا 498) اۋىرىپ جاتىر.

#COVID پتر تەستى ارقىلى كوروناۆيرۋس جۇققانى راستالعان ناۋقاستاردىڭ باسىم بولىگى ادەتتەگىدەي الماتى قالاسى (698) مەن استانادا (511) تىركەلدى. بۇدان وزگە  قاراعاندى (228) جانە اقتوبە (226) وڭىرلەرىندە دەرت دەندەپ تۇر. ودان كەيىنگى قاتاردا ەڭ كوبى – الماتى وبلىسىندا (195), بقو (181), اتىراۋ (181), شىمكەنت (131), اقمولا (126) وبلىسىندا. وتكەن تاۋلىكتە اۋرۋدان ايىققان 2307 ادام ۇيىنە جىبەرىلگەن. بۇدان وزگە سارسەنبى جيىنى 29 ادام قايتىس بولعان.

#COVID_پنەۆمونياسى 21 ءساۋىر اقپاراتى ءبىر تاۋلىككە كەشىگىپ بەرىلەتىن كوروناۆيرۋس پنەۆمونياسىنا شالدىققان 107 ناۋقاس ەسەپكە الىندى. ۆەدومستۆو دەرەگىنشە، جامبىل (27), شقو (14), الماتى وبلىسى (11), اتىراۋ وبلىسى مەن الماتى قالاسىندا (ارقايسىندا ون-وننان) كوپتەپ تىركەلگەن. سونىمەن قوسا، 80 ادام ايىعىپ شىققان، وكىنىشتىسى 3 ادام كوز جۇمعان.

#جالپى  دەنمين-ءنىڭ رەسمي مالىمەتىنشە، ەمدەلىپ جاتقان 40 441 ناۋقاستىڭ 14 مىڭى اۋرۋحانادا، 26 مىڭى امبۋلاتورلىق باقىلاۋدا. احۋالى ناشار 689 ناۋقاستىڭ جاعدايى قيىن، ونداعى 171 ادامنىڭ ءحالى وتە اۋىر. بۇدان وزگە 97 سىرقات وكپەنى جاساندى جەلدەتۋ اپپاراتىمەن تىنىستاپ جاتىر.

وسىلايشا ازىرگە ۆيرۋستىڭ تارالۋ قاتەرى جاعىنان سقو مەن تۇركىستان وبلىسى «جاسىل ايماقتا». پاۆلودار، الماتى، شقو، جامبىل، قوستاناي وبلىستارى «سارى»، ال اتىراۋ، اقمولا، اقتوبە، بقو، ماڭعىستاۋ، قىزىلوردا،  قاراعاندى وبلىستارى، الماتى، شىمكەنت قالالارى مەن استانا «قىزىل ايماقتا» تۇر.

ۇكىمەت مۇشەلەرىنىڭ مالىمەتىنشە، گەنومدىق زەرتتەۋ ناتيجەسىندە ەلدىڭ باسىم بولىگىنەن ۆيرۋستىڭ برازيليالىق، بريتاندىق جانە وڭتۇستىكافريكالىق شتامدارى انىقتالعان.

ەلدە قاڭتار ايىنىڭ ەكىنشى جانە اقپان ايىنىڭ العاشقى جارتىسىندا ناۋقاستار قاتارى كۇرت كوبەيگەن. اقپان ايىنىڭ ەكىنشى جارتىسىندا ءبىرشاما كەمىگەن ەدى، دەسە دە ناۋرىزدا قايتا ارتتى. قازىر تاۋلىگىنە كەمىندە 2,5 مىڭ سىرقات جانە 20 شاقتى ءولىم جاعدايى تىركەلىپ جاتىر. ءساۋىر ايىنىڭ ءۇش اپتاسىندا تابىلعان كەيستەر سانى – 55 مىڭ سىرقات جانە 510 ءولىم جاعدايى. بۇل تۇتاس ناۋرىز ايىنان 20 مىڭعا ارتىق. جالپى كوكتەمنىڭ ەلۋ كۇنىندە 90 مىڭ (كۆي+ 87 مىڭ، كۆي- 3 مىڭ) ناۋقاس انىقتالدى، 876 ادام (كۆي+ 740, كۆي- 136) ومىردەن قايتتى.

بىلتىر 13 ناۋرىزدان بەرى COVID-19 ينفەكتسياسىن جۇقتىرعاندار قاتارى 301 مىڭعا جۋىقتاپ، 1 تامىزدان بىلايعى كوروناۆيرۋس پنەۆمونياسى 52 مىڭنان اسقان. ددسۇ دەرەكقورى مەن ۇلتتىق ستاتيستيكادا قازاقستاندا اۋىرعاندار سانى 353 مىڭعا جەتكەن. دەگەنمەن ۇكىمەت كوروناۆيرۋس پەن ونىڭ پنەۆمونياسىن ەكى بولەك ەسەپتەيدى.

پاندەميا باستالعالى جالپى ۆيرۋس جۇققانداردىڭ 5895-ءى (كۆي+ / U07.1 – 3512, كۆي- / U07.2 – 764, ىلەسپە اۋرۋلاردان – 1619) قايتىس بولعان. الايدا قازاقستان بيلىگى بويىنان كوروناۆيرۋس تابىلسا دا، باسقا اۋرۋلاردىڭ سەبەبىنەن قايتىس بولدى دەلىنگەندەردى جالپى ستاتيستيكاعا ەنگىزبەيدى. بۇعان قارسى ساراپشىلاردىڭ سوزىنە قاراعاندا، كوروناۆيرۋستىڭ جاناما اسەرىنەن قايتقانداردىڭ جارتىسىنان استامىنىڭ سەبەبى قان اينالىمى جۇيەسىنىڭ اۋرۋلارى بولعاندىقتان، وعان ينفەكتسيا دەرت قوزدىرۋشى فاكتور رەتىندە ولىمگە اكەپ سوقتىرعان. ەسكەرەر جايت، مينيسترلىك 2020 جىلى كۆي- ستاتيستيكاسىن ەسەپكە الماس بۇرىن جىلداعىدان ءۇش ەسەگە وسكەن پنەۆمونيانىڭ 256 مىڭ جاعدايىنان (بىلتىرعى قاڭتار-شىلدە ارالىعىنداعى) كوروناۆيرۋستىق ءتۇرىن انىقتاپ-زەرتتەۋدەن باس تارتقان. ماماندار وسى كەيستەردى وبەكتيۆتى تۇردە زەردەلەگەندە شىنايى ەسەپ قازىرگىدەن الدەقايدا كوپ بولار ەدى دەپ ەسەپتەيدى. دەمەك جوعارىداعى سان دا ناقتى بولماۋى مۇمكىن.

قازاقستان ۆيرۋس تارالۋى بويىنشا الەمدە Worldometers دەرەكقورى، دجونس حوپكينس ۋنيۆەرسيتەتى جانە ددسۇ تىزىمىندەگى 221 ەل مەن ايماقتىڭ اراسىندا 48-ورىندا تۇر.

ۇكىمەتتىڭ سوڭعى دەرەگىنە قاراعاندا، قازاقستاندا 823 مىڭ ادام كوروناۆيرۋسقا قارسى رەسەيلىك «Sputnik V» ۆاكتسيناسىنىڭ العاشقى دوزاسىن العان.

"The Qazaq Times"