Koronavirustıq stacionarı bar auruhananıñ qabıldau bölimi aldındağı jedel järdem kölikteri. Almatı qalası, Qalqaman ıqşam audanı. 22 säuir 2021 jıl. Foto: QT / Kültegin Aspanwlı

Köktem tuğalı Qazaqstanda 90 mıñnan sırqat tirkelip ülgerdi. Respublikanıñ üşinşi tolqında qızıl aymaqqa ötkenine 25 kün boldı. Kündelikti anıqtalıp jatqan nauqastar sanı eki jarım mıñnan, al ölim jağdayı 20-dan azayar emes. Bwl pandemiya kezindegi eñ auır körsetkiş. Saldarınan Qazaqstan älemde eñ köp adam auırğan elder qatarında bir orınğa köterilip, 48-orınğa ornalastı.

Densaulıq saqtau ministrliginiñ resmi mälimetinşe, elde 22 säuir koronavirus jwqqan 2894 adam, al 21-i küni koronavirus pnevmoniyasına şaldıqqan 35 adam tirkeldi. Qazir elde 40 mıñnan asa adam (U07.1 nemese KVI+ boyınşa 39 943, U07.2 nemese KVI- boyınşa 498) auırıp jatır.

#COVID PTR testi arqılı koronavirus jwqqanı rastalğan nauqastardıñ basım böligi ädettegidey Almatı qalası (698) men astanada (511) tirkeldi. Bwdan özge  Qarağandı (228) jäne Aqtöbe (226) öñirlerinde dert dendep twr. Odan keyingi qatarda eñ köbi – Almatı oblısında (195), BQO (181), Atırau (181), Şımkent (131), Aqmola (126) oblısında. Ötken täulikte aurudan ayıqqan 2307 adam üyine jiberilgen. Bwdan özge särsenbi jiını 29 adam qaytıs bolğan.

#COVID_pnevmoniyası 21 säuir aqparatı bir täulikke keşigip beriletin koronavirus pnevmoniyasına şaldıqqan 107 nauqas esepke alındı. Vedomstvo dereginşe, Jambıl (27), ŞQO (14), Almatı oblısı (11), Atırau oblısı men Almatı qalasında (ärqaysında on-onnan) köptep tirkelgen. Sonımen qosa, 80 adam ayığıp şıqqan, ökiniştisi 3 adam köz jwmğan.

#Jalpı  DenMin-niñ resmi mälimetinşe, emdelip jatqan 40 441 nauqastıñ 14 mıñı auruhanada, 26 mıñı ambulatorlıq baqılauda. Ahualı naşar 689 nauqastıñ jağdayı qiın, ondağı 171 adamnıñ häli öte auır. Bwdan özge 97 sırqat ökpeni jasandı jeldetu apparatımen tınıstap jatır.

Osılayşa äzirge virustıñ taralu qateri jağınan SQO men Türkistan oblısı «jasıl aymaqta». Pavlodar, Almatı, ŞQO, Jambıl, Qostanay oblıstarı «sarı», al Atırau, Aqmola, Aqtöbe, BQO, Mañğıstau, Qızılorda,  Qarağandı oblıstarı, Almatı, Şımkent qalaları men astana «qızıl aymaqta» twr.

Ükimet müşeleriniñ mälimetinşe, genomdıq zertteu nätijesinde eldiñ basım böliginen virustıñ braziliyalıq, britandıq jäne oñtüstikafrikalıq ştamdarı anıqtalğan.

Elde qañtar ayınıñ ekinşi jäne aqpan ayınıñ alğaşqı jartısında nauqastar qatarı kürt köbeygen. Aqpan ayınıñ ekinşi jartısında birşama kemigen edi, dese de naurızda qayta arttı. Qazir täuligine keminde 2,5 mıñ sırqat jäne 20 şaqtı ölim jağdayı tirkelip jatır. Säuir ayınıñ üş aptasında tabılğan keyster sanı – 55 mıñ sırqat jäne 510 ölim jağdayı. Bwl twtas naurız ayınan 20 mıñğa artıq. Jalpı köktemniñ elu küninde 90 mıñ (KVI+ 87 mıñ, KVI- 3 mıñ) nauqas anıqtaldı, 876 adam (KVI+ 740, KVI- 136) ömirden qayttı.

Bıltır 13 naurızdan beri COVID-19 infekciyasın jwqtırğandar qatarı 301 mıñğa juıqtap, 1 tamızdan bılayğı koronavirus pnevmoniyası 52 mıñnan asqan. DDSW derekqorı men Wlttıq statistikada Qazaqstanda auırğandar sanı 353 mıñğa jetken. Degenmen Ükimet koronavirus pen onıñ pnevmoniyasın eki bölek esepteydi.

Pandemiya bastalğalı jalpı virus jwqqandardıñ 5895-i (KVI+ / U07.1 – 3512, KVI- / U07.2 – 764, ilespe aurulardan – 1619) qaytıs bolğan. Alayda Qazaqstan biligi boyınan koronavirus tabılsa da, basqa aurulardıñ sebebinen qaytıs boldı delingenderdi jalpı statistikağa engizbeydi. Bwğan qarsı sarapşılardıñ sözine qarağanda, koronavirustıñ janama äserinen qaytqandardıñ jartısınan astamınıñ sebebi qan aynalımı jüyesiniñ auruları bolğandıqtan, oğan infekciya dert qozdıruşı faktor retinde ölimge äkep soqtırğan. Eskerer jayt, ministrlik 2020 jılı KVI- statistikasın esepke almas bwrın jıldağıdan üş esege ösken pnevmoniyanıñ 256 mıñ jağdayınan (bıltırğı qañtar-şilde aralığındağı) koronavirustıq türin anıqtap-zertteuden bas tartqan. Mamandar osı keysterdi ob'ektivti türde zerdelegende şınayı esep qazirgiden äldeqayda köp bolar edi dep esepteydi. Demek joğarıdağı san da naqtı bolmauı mümkin.

Qazaqstan virus taraluı boyınşa älemde Worldometers derekqorı, Djons Hopkins universiteti jäne DDSW tizimindegi 221 el men aymaqtıñ arasında 48-orında twr.

Ükimettiñ soñğı deregine qarağanda, Qazaqstanda 823 mıñ adam koronavirusqa qarsı reseylik «Sputnik V» vakcinasınıñ alğaşqı dozasın alğan.

"The Qazaq Times"