ساربازعا دەگەن قۇرمەت

«قازاقستان رەسپۋبليكاسىن قورعاۋ – ونىڭ ءاربىر ازاماتىنىڭ قاسيەتتى پارىزى مەن مىندەتى» - دەپ اتا زاڭدا كورسەتىلگەندەي، تۋعان جۇرتىن ءسۇيۋ، وتانىنا قالتقىسىز قىزمەت ەتۋ ءاربىر ەل ازاماتىنىڭ قاسيەتتى بورىشى.

  ەر ادامداردىڭ جاستايىنان اسكەري فورماعا قىزىعىپ، 18 جاسقا تولىسىمەن وتان الدىنداعى بورىشىن وتەۋگە اسىعاتىنى بابالارىمىزدان قالعان باتىرلىق جولدىڭ ۇلگىسىندەي.

بۇگىنگى تاڭدا وسكەلەڭ ۇرپاقتىڭ بويىنان  وتانعا ادال قىزمەت ەتۋ، ونىڭ قاۋىپسىزدىگىن كوزدىڭ قاراشىعىنداي ساقتاۋ، ەڭ قىمبات قازىنامىز – تاۋەلسىزدىگىمىزدى قورعاۋ،  ار-نامىستى بيىك ۇستاۋ، ۇلتىن ءسۇيۋ سەكىلدى پاتريوتتىققا باۋليتىن قاسيەتتى ۇعىمدار جەتە تانىلۋدا. سونىڭ ارقاسىندا قازىرگى ۋاقىتتا اسكەرگە شاقىرۋشىلاردىڭ قاتارى وسۋدە.

بۇگىنگى كۇنى قازاقستان رەسپۋبليكاسى ۇلتتىق ۇلان اسكەرىنىڭ قاتارىندا قىزمەت ەتكىسى كەلەتىن جاستار لەگى كوپ. بىرقاتارى اسكەري بورىشتارىن وتەپ تە ءجۇر. بارلىعىنىڭ جۇرەكتەرىندەگى ايقىن ماقسات ءبىر، ول – وتانىن قورعاۋ، بەرگەن اسكەري انتتارىنا ادال بولۋ.

ۇلتتىق ۇلاننىڭ قىزىلوردا قالاسىندا ورنالاسقان 5547 اسكەري بولىمىندە دە ەلىمىزدىڭ تۇكپىر-تۇكپىرىنەن شاقىرىلعان ساربازدار اسكەري بورىشتارىن وتەۋدە. ولار قالا كوشەلەرىندەگى قوعامدىق ءتارتىپ پەن قاۋىپسىزدىكتى قامتاماسىز ەتۋ، تۇزەۋ مەكەمەلەرىن كۇزەتۋ مەن سوتتالعانداردى ايداۋىلداۋ سەكىلدى وزدەرىنە سەنىپ تاپسىرىلعان مىندەتتەردى ابىرويمەن اتقارۋدا.

قىزىلوردا قالاسىندا ورنالاسقان 5547 اسكەري ءبولىمى ساربازدارى.

اسكەردە تەك جاۋىنگەرلىك قىزمەت قانا ەمەس، وندا دا ءومىر بار، ءوزىنىڭ قىزىقتارى بار. ساربازدار جاۋىنگەرلىك قىزمەتتەن بوس ۋاقىتتا سپورتپەن شۇعىلدانادى، كىتاپتار وقيدى، ودان بولەك ءتۇرلى ءىس-شارالاردى ۇيىمداستىرۋعا قاتىسادى. سونىڭ ءبىر ايعاعى رەتىندە ساربازداردىڭ اسكەردە اتالىپ وتىلەتىن تۋعان كۇندەرىن اتاپ وتۋگە بولادى.

5547 اسكەري بولىمىندە ساربازداردىڭ تۋعان كۇندەرى ەستەن كەتپەستەي ەرەكشە اتالىپ وتىلەدى. ءار ايدىڭ سوڭىندا «سارباز، بۇگىن سەنىڭ تۋعان كۇنىڭ!» اتاۋىمەن تۋعان كۇن يەلەرىنە ارنالىپ كونتسەرتتىك باعدارلامالار قويىلىپ، ارتىنان داستارحان جايىلادى. جۋىردا وسىنداي مەرەكەلىك ءىس-شارانىڭ كۋاسى بولدىق.

ادامزات ومىرىندە ونىڭ كوڭىلىنە ءسال بولسا دا قۋانىش سىيلاۋ كەيدە باقىت بولىپ تابىلاتىنداي. بۇگىنگى كۇنى وتكەن ءىس-شارادا ساربازداردىڭ جۇزىنەن ءبىز سونى انىق بايقادىق. بۇل ءىس-شاراعا ۇلتتىق ۇلاننىڭ «وڭتۇستىك» وڭىرلىك قولباسشىلىعى قولباسشىسىنىڭ تاربيە جانە الەۋمەتتىك-قۇقىقتىق جۇمىستارى جونىندەگى ورىنباسارى پولكوۆنيك سابىرجان سۇلەيمەنوۆ ارنايى كەلىپ قاتىسىپ،  بولىمدە ءوز دەڭگەيىندە وتكەن مەرەكەلىك ءىس-شاراعا وڭ باعاسىن بەرىپ، تۋعان كۇن يەلەرىنە يگى تىلەكتەرىن ايتىپ قۇتتىقتاۋىن جولدادى.  ول: «قۇرمەتتى جاۋىنگەرلەر، سىزدەر ۇلت ماقتانىشىسىزدار، ەلىمىزدىڭ ايبىندى اسكەرى ۇلتتىق ۇلاننىڭ قاۋىپسىزدىك قالقانىسىزدار. وتاندى قورعاۋ ارقاشان ابىروي بولىپ سانالعان، ەرتەڭگى كۇنى ەل شەتىنە جاۋ تيسە، ەتىگىمەن سۋ كەشۋگە ءازىر وسىنداي جالىندى ساربازدار باردا وتانىمىزدىڭ، ماڭگىلىك ەلىمىزدىڭ تۋى ەشقاشان تومەندەمەك ەمەس!» دەپ ءسوزىن تۇيىندەدى.

«ەلدىڭ ەرتەڭىن بىلگىڭ كەلسە، ونىڭ جاستارىنا قارا»،- دەگەن ۇلاعاتتى ءسوز بار. ءسوز جوق، وسىنداي ءىس-شارالار ەل ەرتەڭى – جاستارىمىزدىڭ، ياعني ساربازدار بويىندا وتانشىلدىق رۋحتى وركەندەتە بەرەرى، ناتيجەسىندە وتان دەسە ءور مىنەزدى، قايراتتى ازاماتتارىمىزدىڭ قاتارىن كوبەيتۋگە بىردەن-ءبىر سەپتىگىن تيگىزەتىندىگى ءسوزسىز.

ايدوس بايشاعىروۆ،  ۇلتتىق ۇلاننىڭ «وڭتۇستىك» وڭىرلىك قولباسشىلىعى

“The Qazaq Times”