اقش پرەزيدەنتى دجو بايدەن. فوتو: https://cdn

دجو بايدەننىڭ اكىمشىلىگى رەسەيگە قارسى جاڭا سانكتسيا ەنگىزۋ تۋرالى جارلىققا قول قويماق. بۇل جولعى سانكتسيالار اقش-تىڭ رەسەيلىك كيبەرشابۋىلدارعا, كرەملدىڭ اقش-تاعى پرەزيدەنت سايلاۋىنا كيلىگۋىنە جانە قىرىم اننەكسياسىنا جاۋابى دەيدى اق ءۇي.

شەشىم كۇشىنە ەنسە، امەريكالىق بانكتەرگە رەسەي بانكى، قارجى مينيسترلىگى، رەسەي ءال-اۋقات قورىنىڭ مەملەكەتتىك وبليگاتسيالارىن ساتىپ الۋعا تىيىم سالىنادى.

امەريكالىق اقپارات قۇرالدارىنىڭ مالىمەتىنشە، 30-عا جۋىق زاڭدى جانە جەكە تۇلعالارعا شەكتەۋ شارالارى ەنگىزىلىپ، 10-عا جۋىق رەسەيلىكتەر اقش-تان شىعارىلادى. سانكتسيا تزىمىنە ەنەتىندەر قاتارىندا شەنەۋنىكتەر مەن بارلاۋ قىزمەتكەرلەرى بار.

سونىمەن قاتار، دجو بايدەن امەريكالىق قارجى ۇيىمدارىنا رۋبلمەن ۇسىنىلعان باعالى قاعازداردى ساتىپ الۋعا تىيىم سالۋ تۋرالى جارلىققا قول قويۋعا نيەتتى. تىيىم ماۋسىمنان باستاپ كۇشىنە ەنۋى مۇمكىن.

سانكتسيا ەنگىزۋدىڭ تاعى ءبىر سەبەبى – SolarWinds توڭىرەگىندەگى داۋ. وسى جىلدىڭ قاڭتارىندا اقش بارلاۋ قوعامداستىعىنىڭ وكىلدەرى SolarWinds دەپ اتالاتىن اۋقىمدى كيبەرشابۋىلدىڭ ارتىندا رەسەي بيلىگى تۇرۋى مۇمكىن دەگەن قورىتىندىعا كەلدى. كيبەرشابۋىل توعىز فەدەرالدى دەپارتامەنتكە جانە جۇزگە جۋىق جەكە كومپانيالارعا كەرى اسەر كەتكەن. 18 مىڭعا جۋىق سۋبەكتكە شابۋىل جاسالعان.

SolarWinds كومپانياسىنىڭ Orion باعدارلامالىق جاساقتاماسى 2020 جىلى ناۋرىزدا شابۋىل سالدارىنان ىستەن شىققان. حاكەرلەر ۆيرۋس ەنگىزگەننەن كەيىن اتالعان باعدارلامانى SolarWinds تۇتىنۋشىلارى، سونىڭ ىشىندە اقش مەملەكەتتىك ورگاندارى جانە 400-دەن استام ءىرى كومپانيالار جۇكتەگەن جانە قولدانعان. بۇل تۋرالى 2020 جىلدىڭ جەلتوقسانىندا اقش ۇلتتىق بارلاۋ دەپارتامەنتىنىڭ، فبر جانە ينفراقۇرىلىمدىق جانە كيبەرقاۋىپسىزدىك اگەنتتىگىنىڭ بىرلەسكەن مالىمدەمەسىندە ايتىلدى. سول كەزدە مەملەكەتتىك حاتشى بولعان مايك پومپەو «بۇل شابۋىلعا كرەملدىڭ تىكەلەي قاتىسى بار» دەگەن نۇسقانى ۇسىندى. ال قاڭتاردىڭ سوڭىندا اقش پرەزيدەنتى دجو بايدەن كەز كەلگەن حاكەرلىك شابۋىلدىڭ ارتىندا رەسەي تۇرۋى مۇمكىن دەگەن. ال ماسكەۋ ۆاشينگتوننىڭ بۇل مالىمدەمەسىنە جاۋاپ بەرگەن جوق.

"The Qazaq Times"