AQŞ prezidenti Djo Bayden. Foto: https://cdn

Djo Baydenniñ äkimşiligi Reseyge qarsı jaña sankciya engizu turalı jarlıqqa qol qoymaq. Bwl jolğı sankciyalar AQŞ-tıñ reseylik kiberşabuıldarğa, Kreml'diñ AQŞ-tağı prezident saylauına kiliguine jäne Qırım anneksiyasına jauabı deydi Aq üy.

Şeşim küşine ense, amerikalıq bankterge Resey banki, qarjı ministrligi, Resey äl-auqat qorınıñ memlekettik obligaciyaların satıp aluğa tıyım salınadı.

Amerikalıq aqparat qwraldarınıñ mälimetinşe, 30-ğa juıq zañdı jäne jeke twlğalarğa şekteu şaraları engizilip, 10-ğa juıq reseylikter AQŞ-tan şığarıladı. Sankciya tzimine enetinder qatarında şeneunikter men barlau qızmetkerleri bar.

Sonımen qatar, Djo Bayden amerikalıq qarjı wyımdarına rubl'men wsınılğan bağalı qağazdardı satıp aluğa tıyım salu turalı Jarlıqqa qol qoyuğa nietti. Tıyım mausımnan bastap küşine enui mümkin.

Sankciya engizudiñ tağı bir sebebi – SolarWinds töñiregindegi dau. Osı jıldıñ qañtarında AQŞ barlau qoğamdastığınıñ ökilderi SolarWinds dep atalatın auqımdı kiberşabuıldıñ artında Resey biligi twruı mümkin degen qorıtındığa keldi. Kiberşabuıl toğız federaldı departamentke jäne jüzge juıq jeke kompaniyalarğa keri äser ketken. 18 mıñğa juıq sub'ektke şabuıl jasalğan.

SolarWinds kompaniyasınıñ Orion bağdarlamalıq jasaqtaması 2020 jılı naurızda şabuıl saldarınan isten şıqqan. Hakerler virus engizgennen keyin atalğan bağdarlamanı SolarWinds twtınuşıları, sonıñ işinde AQŞ memlekettik organdarı jäne 400-den astam iri kompaniyalar jüktegen jäne qoldanğan. Bwl turalı 2020 jıldıñ jeltoqsanında AQŞ Wlttıq barlau departamentiniñ, FBR jäne infraqwrılımdıq jäne kiberqauipsizdik Agenttiginiñ birlesken mälimdemesinde aytıldı. Sol kezde Memlekettik hatşı bolğan Mayk Pompeo «bwl şabuılğa Kreml'diñ tikeley qatısı bar» degen nwsqanı wsındı. Al qañtardıñ soñında AQŞ prezidenti Djo Bayden kez kelgen hakerlik şabuıldıñ artında Resey twruı mümkin degen. Al Mäskeu Vaşingtonnıñ bwl mälimdemesine jauap bergen joq.

"The Qazaq Times"