قازاقستانداعى ادام قۇقىعى جونىندەگى بيۋرو مەن "ادام قۇقىعىن قورعاۋ جونىندەگى حارتيا" ۇيىمدارى نۇر-سۇلتاننان نارازىلاردى ۇستاۋ كەزىندەگى پوليتسيا ارەكەتىن تالداپ، باعا بەرۋ ءۇشىن تاۋەلسىز كوميسسيا قۇرۋدى تالاپ ەتتى.

11 ماۋسىمدا جاريالانعان بىرلەسكەن مالىمدەمەدە ۇيىمدار "9-10 ماۋسىمدا نارازىلىق اكتسيالارى كەزىندە ازاماتتاردىڭ قۇقىعى جاپپاي بۇزىلدى. ءىىم ۇستالعاندار سانىن ازايتىپ كورسەتتى" دەپ جازىلعان.

ەكى ۇيىم حاتتى قازاقستان باس پروكۋراتۋراسى مەن پرەزيدەنت جانىنداعى ادام قۇقىقتارى جونىندەگى كوميسسيا توراعاسىنا جولداعاندارىن حابارلادى.

قۇقىق قورعاۋشىلاردىڭ ايتۋىنشا، 9 ماۋسىمدا الماتىدا پوليتسەيلەر سەبەبىن تۇسىندىرمەستەن كەم دەگەندە 360 ادامدى قالالىق پوليتسيا دەپارتامەنتىنە اپارعان، جۇزدەگەن ادامدى ۋاقىتشا ۇستاۋ يزولياتورلارىنا جەتكىزگەن.

مالىمدەمە اۆتورلارى "ادام قۇقىقتارى جونىندەگى حارتيا" قورىنىڭ اتقارۋشى ديرەكتورى جەمىس تۇرماعامبەتوۆا مەن قازاقستانداعى ادام قۇقىعى جونىندەگى بيۋرو جەتەكشىسى ەۆگەني ءجوۆتيستىڭ ايتۋىنشا، "پوليتسيا ادامداردى ۇستاعان كەزدە كۇش قولدانعان. ال 10 ماۋسىم تۇندە پوليتسيا دەپارتامەنتتەرىندە ۇستالعانداردىڭ سوتى ادۆوكاتسىز جابىق وتكەن".

مالىمدەمە اۆتورلارى قازاقستان بيلىگىنەن نارازىلىق كەزىندە ۇستالعانداردىڭ ءتىزىمىن، ناقتى سانىن، قايدا ەكەندەرىن حابارلاۋدى جانە "ازاماتتاردى سوتسىز سوتتاعان" قىزمەتكەرلەردى جازالاۋدى سۇرايدى.

9 ماۋسىمدا نۇر-سۇلتان، الماتى، شىمكەنت، اقتوبەدە پوليتسيا جۇزدەگەن ادامدى ۇستاعان. وسى كۇنى الماتى مەن نۇر-سۇلتاندا سايلاۋعا قارسى جۇزدەگەن ادام ميتينگىگە شىققان. قازاقستان بيلىگى ميتينگىنى ەلدە تىيىم سالىنعان "قازاقستاننىڭ دەموكراتيالىق تاڭداۋى" قوزعالىسىنىڭ "راديكالدى پيعىلداعى وكىلدەرى" ۇيىمداستىردى دەپ مالىمدەگەن.

ىشكى ىستەر مينيسترلىگى 9-10 ماۋسىمدا الماتى مەن نۇر-سۇلتاندا 700-دەي ادام ۇستالعانىن مالىمدەدى.

10 ماۋسىمدا پوليتسيا نۇر-سۇلتان، الماتى، شىمكەنتتە ونداعان ادامدى ۇستاعان. وسى كۇنى نۇر-سۇلتانداعى ءباسپاسوز ءماسليحاتىندا قاسىم-جومارت توقاەۆ الماتى مەن ەل استاناسىندا ء"بىرشاما ازامات ءوز پىكىرىن ءبىلدىرۋ، نارازىلىق جانە باسقا ماسەلەمەن كوشەگە شىقتى" دەپ مالىمدەدى، بىراق قانشا ادام جانە قانداي تالاپپەن شىققانىن ناقتىلامادى.

ماۋسىم ايىنىڭ 10-ى كۇنى ورتالىق سايلاۋ كوميسسياسى كەزەكتەن تىس پرەزيدەنت سايلاۋىنىڭ تۇپكىلىكتى قورىتىندىسىن جاريالادى. وندا قاسىم-جومارت توقاەۆتىڭ 70,96%، ءامىرجان قوسانوۆتىڭ 16,23% داۋىس العاندىعى جونىندە ايتىلعان.

"The Qazaq Times"