"دات" گازەتتەر جوباسىنىڭ جەتەكشىسى، جسدپ "اقيقات" پارتياسىنىڭ توراعاسى ەرمۇرات باپي پرەزيدەنت سايلاۋىنا قاتىسىپ جاتقان وپپوزيتسيالىق ساياساتكەر ءامىرجان قوسانوۆقا قاتىستى ءوزىنىڭ "Facebook" پاراقشاسىندا مالىمدەمە جاسادى. 

ەرمۇرات باپي:
مەن قوسانوۆتى
قالاي قولدايمىن
(سۇراۋ بەلگىسىن قاجەت ەتپەيتىن باستى تاقىرىپ)

سايلاۋدىڭ سوڭىندا قارايعان حالىققا نە قالادى:
1. قوسانوۆتىڭ جەڭىسى مە؟
2. توقاەۆتىڭ پرەزيدەنتتىك ليگيتيمدىگى مە؟
3. قوسانوۆتى قولداعان داۋىسى تىرداي تونالعان حالىقتىڭ اشىق الاڭعا - مايدانعا شىعۋى ما؟

ء"امىرجاندى نەگە قولداماي جاتىرسىز؟" دەپ، جەلىدەگى جۇرتشىلىقتىڭ
تاقاقتاعان تالابىنا وراي جوعارىداعى ءۇش سۇراق-نۇسقا توڭىرەگىندەگى ويىمدى ايتايىن. (بۇل - ءامىرجاننىڭ جاقتاستارى مەن فەيكتەرى جامىراپ جاتقانداي، "قىزعانىشتان" ەمەس، قالىپتاسقان جاعدايدى ساياسي تۇرعىدا ساراپتاۋدان تۋعان جانە كۇنىبۇرىن جازىلعان پىكىر ەدى: جاريا ەتۋدىڭ كەزى كەلدى دەپ ويلايمىن).

نازارباەۆتىڭ كوزى تىرىسىندە، ءبىرىنشى نۇسقانىڭ ورىندالۋى مۇمكىن ەمەس. ول ءوزىنىڭ سىرەسىپ وتىرعان ورنىن، 30 جىل بويى "جيعان-تەرگەنىن" كولدەنەڭ كوك اتتىعا ۇستاتىپ قويا بەرمەيدى. بۇل نۇسقا جۇزەگە اسۋى ءۇشىن، سايلاۋ تۋرالى زاڭدىلىقتاردان باستاپ، "ەكسترەميزم جاسادى" دەپ، كەشە عانا قىلمىسقا تارتىلعان ءۇش ايەلگە قاتىستى بيلىكتىك تەرىس كوزقاراس تۇبىرىمەن وزگەرۋى ءتيىس.

ال ەگەر ءبىرىنشى نۇسقا ورىندالمايتىن بولسا، بىراق اڭعال حالىق قوعاداي جاپىرىلىپ، بولاشاق "وزگەرىستەردىڭ كەپىلى" - قوسانوۆ ءۇشىن سايلاۋ ۋچاسكەلەرىنە داۋىس بەرۋگە كەلەتىن بولسا، 50-60 پايىز "ياۆكا" جۇزەگە اسادى دەگەن ءسوز. بىراق ءبىزدىڭ سايلاۋلاردىڭ تاعدىرىن سايلاۋشىنىڭ داۋىسى ەمەس، "يزبيركومنىڭ" پروتوكولى شەشەدى. كىمگە قانشا داۋىس جازۋ كۆوتاسىن تسيك انىقتايدى، ال "رازناريادكانى" تەك قانا ن.نازارباەۆ بەرەدى. وزگەرىس تىلەگەن حالىق ءبىرىنشى كەزەكتە وسىنداي پاحاندىق سايلاۋ ءتارتىبىن قالىپتاستىرعان تۇتاس ساياسي جۇيەنى تاس-تالقان ەتۋى ءتيىس.
ياعني، داۋىس ء"بولۋدىڭ" نازارباەۆتىق كۆوتالىق جاعدايىندا، وزگەرىس تىلەگەن حالىقتىڭ ەسىل ەرىك-جىگەرى مەن ادال نيەتىن ارامپيعىل بيلىك ءوز مۇددەلەرىنە پايدالانىپ كەتەرى ءسوزسىز.
دەمەك، ناقتى جاعدايدا وپپوزيتسيالىق كانديداتتىڭ "بەيكۇنا" كومەگىمەن "توقاەۆتىڭ لەگيتيمدىگى" قامتاماسىز ەتىلەدى.

ال اقىر اياعى، ءۇشىنشى نۇسقا بويىنشا، مىسى قۇرىعان حالىق /توبىر - تولپا/ وزدەرىنىڭ تونالعان داۋىسىن كەرى قايتارۋدى، داۋىس بەرۋ قورىتىندىسىن قايتادان جانە اشىق ساناۋدى تالاپ ەتىپ، الاڭعا - مايدانعا شىعا الا ما؟ كەمىندە 10 مىڭ ادام 10 كۇن بويى اقوردانى قورشاپ الىپ، ۇراندىپ تۇرۋعا ەرىك-جىگەرى جەتە مە؟

مىنە، بۇل پرەزيدەنتتىك سايلاۋدا قوسانوۆتى قوستاۋدىڭ مەن ءۇشىن نەگىزگى قاعيداسى وسى - ءۇشىنشى نۇسقا دەپ بىلەمىن. بۇل - تەڭسەلىستى (پوترياسەنيە) تىلەۋ، توڭكەرىسكە شاقىرۋ ەمەس. بۇل - مەنىڭ قوسانوۆتى قولداۋداعى باستى جانە ناقتى قالىپتاسقان جاعدايدا باسقا بالاما نۇسقاسى جوق ۇستانىمىم. ەگەر بۇگىندە تاۋەلسىز ۇمىتكەردى "قولدايمىز!" دەپ، "ۇلى دالانى" ءدۇر سىلكىندىرىپ، ءتىپتى قولداۋشىلار مەن قارسىلاستار ءبىر-ءبىرىنىڭ جەكە باسىنا دەيىن جەر-جەبىرىنە جەتىپ جاتقان حالىق / توبىر/ وزدەرىنىڭ ازاماتتىق تاڭداۋىن قورعاي المايتىن بولسا; قوسانوۆتىڭ سايلاۋداعى جەڭىسىن قولدان بەرگەن، توقاەۆتىڭ تاققا مىنگىزگەن بۇل دۇرمەكتىڭ دۇنيەلىك قۇنى بار ما؟ بۇگىنگى الاشاپقىن قولداۋدىڭ سوڭعى ناتيجەسى جالعاندىق پەن وتىرىككە كونۋ بولسا، "كوپ قورقىتادى" دەگەن حالىقتىق قۇدىرەتتىڭ قايدا قالعانى؟
(بۇل سايلاۋدا "قوعام ىسىلادى", "تريبۋنانى پايدالانىپ قالايىق", "كەلەسى سايلاۋعا تاجىريبە جينايىق", "قارسىلىق تانىتامىز", "ادام ەكەنىمىزدى بىلدىرەمىز", ت.ب. ۋاجدەردىڭ قاجەتى جوق. ءبىزدىڭ قازاق ەشقانداي سايلاۋسىز-اق ادبەن ىسىلعان، وزگەرىستەرگە دەگەن اڭسارى اسقىنىپ تۇرعان، جاڭا بيلىك پەن جاسامپاز جاڭالىقتارعا الدەقاشان لايىق بولعان حالىق!).

مىنە، مەن ءامىرجاننىڭ ۇكىلى ۇمىتكەرلىگىن وسى - ءۇشىنشى نۇسقا ءۇشىن قولدايمىن! باسقا دابىرانىڭ ءبارى بەكەر! سەبەبى، ءبىرىنشى نۇسقا - بوس قيال. حالىق ول قيالدى تاس-تالقان ەتىپ، اڭىزدى شىندىققا اينالدىرا المايتىنىنا كوز جەتكەن.
ەكىنشىسى - نۇر-سۇلتاناتتىڭ مونارحياسىن نوتاريالداندىراتىن جول. دالبالاقتاپ ءجۇرىپ، اقىرىندا سىمبىلسىز قالاتىن حالىققا قالاتىنى - ءۇشىنشى نۇسقا.

ال الاڭعا اتويلاپ شىققان حالىقتىڭ الدىندا "ۇتىلعان" ۇمىتكەردىڭ ءوزى جۇرە الا ما دەگەن سۇراق - ءامىرجاننىڭ وزىنە بايلانىستى جانە ساياساتكەردىڭ سىن ساعاتىن ايقىندايتىن ماسەلە... سوڭعى ءۇش-ءتورت كۇندە مەنىڭ ءبىر بايقاعانىم: ەلدەگى وزگەرىسكە جانى ابدەن قۇشتار بولعان حالىق ۇمىتكەردىڭ اتىمەن، قوسانوۆتىڭ بۇدان ارعى قاتىسۋىنسىز-اق دۇنيەنى توڭكەرىپ تاستاۋعا دايىن سياقتى.
بۇل سۇراپىل جاعداي - بيلىككە ۇلكەن سيگنال. وعان اقوردا مەن "پرەزيدەنتتىك كىتاپحانا" قانداي قام جاسايدى - بۇل دا ۇلكەن سۇراق: شاماسى، شوقپار مەن مىلتىققا جۇگىنبەۋ ءۇشىن، قوسانوۆقا "قوي" دەيتىن بولار نەمەسە ونى سايلاۋدان الىپ تاستاۋدىڭ امالىن جانتالاسا ىزدەپ جاتقان بولار... ياعني، بيلىكتىڭ جانۇشىرعان ستسەناريى بويىنشا، مىسال ءۇشىن، 31-مامىر - ساياسي قۋعىن-سۇرگىن كۇنگى ميتينگىلەردى كۇشپەن تاراتۋ جانە كەزەكتى قاماۋلارعا نارازىلىق بەلگىسى رەتىندە، ءامىرجان ءوزىنىڭ كانديداتۋراسىن سايلاۋدان الىپ تاستاۋى ءتيىس. بۇل - بەتپاق بيلىك پەن قايتپاس قوعامنىڭ تەكە-تىرەسىن "بەيبىت جولعا" بۇرۋدىڭ ءبىر امالى. بىراق بۇدان ازاماتتىق قوعام بيلىكتىڭ دەگەنىنە كوندى دەگەن قورىتىندى شىعادى.

سيتۋاتسيا كەرىسىنشە بولۋ ءۇشىن، بيلىك قوسانوۆتىڭ ەكىنشى ورىنىن (كەمىندە 20-25 پايىز) مويىنداۋى ءتيىس. بىراق بۇعان سايلاۋدىڭ قوجايىنى - ن.نازارباەۆ كونە مە؟ ول شوقپار مەن مىلتىقتى تاڭداي ما، جوق الدە قوسانوۆتىڭ ۇمىتكەرلىگىن جالاۋ ەتىپ، وزگەرىس ءۇشىن وزەۋرەپ، الاڭعا شىققان حالىقتىڭ قالاۋىن تىڭداي ما؟
مىنە، ەڭ سوڭىندا وسىنداي سۇراقتاردىڭ شەشىمىنە قوسانوۆتىڭ كانديداتۋراسى كاتاليزاتور بولادى، بۇل سايلاۋدىڭ وزىنەن دە الدەقايدا ماڭىزدى ترەند دەپ سانايمىن.
قوسانوۆتىڭ وتپەيتىنى (وتكىزبەيتىنى) انىق، بىراق حالىقتىڭ ءسوزى وتە مە؟ حالىق بيلىككە ءسوزىن وتكىزە المايتىن بولسا، قوسانوۆتى قولداۋدىڭ بۇگىنگى دۇرمەگىنەن نە پايدا؟...

"The Qazaq Times"