فوتو: nur.kz

ءتۇرلى وقيعالاردان كەيىن ىسكە كىرىسەتىن مينيسترلىك بۇل جولى دا ءوز ادەتىنەن جاڭىلىسپادى. ينسپەكتور ەرلان نۇرعاليەۆتىڭ قايعىلى قازاسىنان كەيىن، بروكونەرلەردىڭ دەرەكتەر بازاسىن قۇرۋدى العا تارتقان اۋىل شارۋاشىلىعى ۆيتسە-ءمينيسترى ەرلان نىسانباەۆ ۆەدومستۆونىڭ القا وتىرىسىندا وسىنداي مالىمدەمە جاسادى.

«بروكونەرلەر مەن قىلمىسكەرلەردىڭ بازاسىن جاساۋدى ۇسىندىق. بۇل بازا ءىىم بولادى. وسىنداي جولمەن دەرەكتەر بازاسىن جابدىقتالعان ماشينالارى بويىنشا جاساۋ قاجەت. ماشينالار كۇردەلى جول جاعدايىندا قوزعالۋى ءۇشىن جابدىقتالادى. جول جوق جەرلەردى بەلگىلى ءبىر ماقساتپەن كەسىپ وتەدى. ماقسات – بروكونەرلىك ەكەنىن ءبىز جاقسى بىلەمىز»،  - دەدى نىسانباەۆ.

وسىدان ءبىراز ۋاقىت بۇرىن ءماجىلىس دەپۋتات رومان كيم ءىىد مەن باس پروكۋراتۋرانىڭ تەرگەۋ جۇمىستارى وتە تومەن دارەجەدە ەكەندىگىن ايتقان بولاتىن. دەپۋتاتتىڭ مۇنداي مالىمدەمە جاساۋىنىڭ وزىندىك سەبەپتەرى دە بار. ويتكەنى، 2016 جىلى قاراعاندى وبلىسىندا قىلمىسكەرلەر ينسپەكتورعا پىشاق ۇرىپ جارالاعان بولاتىن. الايدا، بۇل وقيعا پروتسەسسۋالدى قالىپقا ساي كەلمەيدى دەگەن جەلەۋمەن توقتاعان ەدى.

سونداي-اق، 2017 جىلى قورعالجىڭ اۋدانىندا بروكونەرلار ينسپەكتوردى قارۋمەن قورقىتىپ، ءوز ۇستەمدىكتەرىن جۇرگىزگىسى كەلگەن. بىراق، بۇل ىسكە قاتىسى بار ادامدار قىلمىستىق جاۋاپكەرشىلىككە ءالى دە بولسا تارتىلماعان.

بۇل باق بەتتەرىنە شىققان وقيعالاردىڭ ءبىر بولىگى عانا. ال، تابيعاتتى قورعاۋ جولىندا قانشاما ينسپەكتوردىڭ نازاردان تىس ءزابىر كورىپ جۇرگەندىگى بەيمالىم. سەبەبى، قازاقستاننىڭ بارلىق ايماعىندا بروكونەرلىك قىلمىستىڭ بەلەڭ الىپ تۇرعاندىعى بەلگىلى. قىزىل كىتاپقا ەنگەن جانۋارلاردى قورعاۋ ماقساتىندا، قىزىل قانعا بويالعان ازاماتتاردى قورعاپ، قىلمىسكەرلەرگە دەگەن جازا قاتاڭ بولماسا، وندا تابيعاتتى قورعاپ قالۋ دەگەن ۇران ءجاي عانا كىتاپ بەتىندە جازىلىپ قالاتىندىعى بەلگىلى.

"The Qazaq Times"