اتامباەۆ: بابانوۆ مەنىڭ جانە جەەنبەكوۆتىڭ سوزدەرىنە الدانىپ قالدى

«ەكس-دەپۋتات ومۋربەك بابانوۆقا قاتىستى ءىس جابىلۋى ءتيىس»، - دەپ مالىمدەدى قىرعىزستاننىڭ ەكس-پرەزيدەنتى المازبەك اتامباەۆ 10 جەلتوقساندا «اپرەل» تەلەكانالىنا بەرگەن سۇقباتىندا.

ونىڭ سوزىنشە، ومۋربەك بابانوۆتىڭ ون-ادىردەگى سوزدەرى كوپ ادامنىڭ اشۋىن تۋعىزعان. «ەگەر ەموتسياسىز قارايتىن بولساق، قىلمىستىق ءىس ۇلتارازدىق بويىنشا قوزعالدى. بىراق اناليز جاساعان ساراپشىلار ونىڭ سوزدەرىنىڭ ۇلتارازدىق تۋعىزبايتىنىن ءارى ەموتسياسىز ايتىلعانىن انىقتادى»، - دەپ اتاپ وتكەن ول.

اتامباەۆتىڭ ايتۋىنشا، بابانوۆ قىرعىزستاندا بىرلىك پەن كەلىسىم بارىنەن جوعارى ەكەنىن كورسەتكەن. «ول بىرلىك ءۇشىن مانداتىن كەرى قايتارىپ، ەلدى تاستاپ كەتتى. سوسىن وعان تاعى ءبىر قىلمىستىق ءىس قوزعالدى. بىراق قانات يساەۆ (پارلامەنت دەپۋتاتى) ىسىندە بابانوۆتىڭ ەش قاتىسى جوق»،- دەدى ەكس-پرەزيدەنت.

ەكس-پرەزيدەنت ناۋرىز ايىندا وعان پارلامەنت دەپۋتاتى رۋسلان كازاكباەۆتىڭ كەلگەنىن باياندادى. «ول قانات يساەۆتىڭ ىسىنە قاتىستى ساراپتاما جۇرگىزىلدى، بۇل ىسكە بابانوۆتىڭ ەش قاتىسى جوق دەدى. كازاكباەۆتىڭ كوزىنشە، مەن ۇقمك ەكس-باسشىسى ابديل سەگيزباەۆقا تەلەفون شالدىم. مەن ابديلگە ساراپتاما قورىتىندىسى شىققانىن، بابانوۆتىڭ بۇل ىسكە قاتىسى بولماسا، وعان قارسى ءىستى جابۋ كەرەكتىگىن ايتتىم. ول ماعان "بايكە، بۇل ءىس سوزىلىپ جاتىر" دەدى. مەن وندا رۋسلاندى قابىلداۋىن ءوتىندىم. شىن مانىندە بابانوۆ ءىسى جابىلۋى ءتيىس. شىنىنا كەلسە، بابانوۆقا راحمەت ايتۋىمىز كەرەك. ءبىر جىل ءوتتى، ول بىرنارسە دەدى مە؟ ول بىرلىك پەن تىنىشتىقتى بۇزۋ ءۇشىن قادام جاسادى ما؟ ول مەنىڭ سوزدەرىمە، سوورونباي جەەنبەكوۆتىڭ سوزدەرىنە سەنىپ قالدى، الدانىپ قالدى. سول ءۇشىن دە ءوزىمدى ىڭعايسىز سەزىنەمىن»، - دەدى اتامباەۆ.

2017 جىلى وتكەن پرەزيدەنت سايلاۋىنا ۇمىتكەر رەتىندە قاتىسقان ومۋربەك بابانوۆقا «ۇلتارازدىق تۋعىزاتىن مالىمدەمە جاسادى» جانە «كونستيتۋتسيا قۇرىلىمىن كۇشتەپ وزگەرتۋگە جاريا تۇردە شاقىردى» دەگەن ەكى بىردەي ايىپ تاعىلعان.پرەزيدەنت سايلاۋى وتە سالىسىمەن ومۋربەك بابانوۆ ساياسي مانسابىن اياقتاعانىن مالىمدەپ، ەلدەن كەتتى.

"The Qazaq Times"