قىتاي بيلىگى بالا سانىنا شەكتەۋدى الىپ تاستاماق – دەپ حابارلايدى Bloomberg باسىلىمى.

Bloomberg مالىمەتىنشە، قىتاي بيلىگى 2018 جىلدىڭ سوڭىنا دەيىن «ءبىر وتباسى – ءبىر بالا» باعدارلاماسىنىڭ كۇشىن جويىپ، بالا سانىن شەكتەۋدى توقتاتپاق. رەسمي بەيجىڭ وسى قادامى ارقىلى قىتاي حالقىنىڭ قارتايۋ پروتسەسسىن ازايتۋدى كوزدەۋدە.

قىتاي بيلىگى «ءبىر وتباسى – ءبىر بالا» باعدارلاماسىن 1979 جىلى ەنگىزگەن. ەل بيلىگى بۇنداي قادامعا حالىق سانىنىڭ ارتۋى سالدارىنان بولاتىن الەۋمەتتىك دۇمپۋلەردىڭ الىن الۋ ءۇشىن بارعان. رەسمي بەيجىڭنىڭ جوسپارى بويىنشا، 2000 جىلى ەل حالقى 1,2 ميلليارد ادامنان اسپاۋى ءتيىس بولعان. 2000 جىلى جۇرگىزىلگەن ساناقتا ەل حالقىنىڭ سانى رەسمي بەيجىڭ جوسپارلاعان مەجەدەن 42,5 ميلليون ادامعا اسىپ كەتكەن.

قىتاي بيلىگىنىڭ «ءبىر وتباسى – ءبىر بالا» باعدارلاماسى گەندەرلىك ديسبالانسقا الىپ كەلىپ سوققان. سەبەبى قىتايلىقتاردىڭ باسىم كوپشىلىگى ۇرپاعىن جالعاستىرۋ ماقساتىندا قىز بالاعا ەمەس ۇل بالاعا كوبىرەك كوڭىل بولگەن. قازىرگى تاڭدا قىتايدا ەر بالالار قىزدارعا قاراعاندا 20 ميلليونعا كوپ. حالىقارالىق ۇيىمداردىڭ بولجامى بويىنشا، 2020 جىلعا قاراي بۇل كورسەتكىش 24 ميلليونعا جەتۋى مۇمكىن.

بۇعان دەيىن قىتاي بيلىگى 2015 جىلى قىتاي كوممۋنيستىك پارتياسىنىڭ حVIII قۇرىلتايىندا وتباسىلارعا ەكى بالا دۇنيەگە الىپ كەلۋگە رۇقسات بەرەتىن زاڭ قابىلداعان. بۇل زاڭ 2016 جىلدىڭ 1 قاڭتارىنان باستاپ كۇشىنە ەنگەن. قىتاي بيلىگىنىڭ جوسپارى بويىنشا، 2050 جىلى جۇمىسقا قابىلەتتى قىتايلىقتاردىڭ سانى 30 ميلليون ادامعا ءوسۋى ءتيىس. جالپى، حالىقارالىق ۇيىمدار قىتاي حالقىنىڭ سانى 2029 جىلعا قاراي 1,45 ميلليارد ادامعا جەتەدى دەپ بولجاۋدا.

“The Qazaq Times”