فوتو: mynet.com

بىرىككەن ۇلتتار ۇيىمىنىڭ "دۇنيەجۇزىلىك ازىق-تۇلىك باعدارلاماسى" اگەنتتىگىنىڭ (WFP) ديرەكتورى دەۆيد بيزلي: "جەر شارىندا بولىپ جاتقان قاقتىعىستاردىڭ كەسىرىنەن اشتان ءولۋ قاۋپى تونگەندەردىڭ سانى سوڭعى ەكى جىلدا 55 پايىزعا ارتىپ، 124 ميلليونعا جەتتى" ، - دەپ دابىل قاعۋدا. ياعني، تالعاجۋ ەتەر ءبىر ءۇزىم نانعا زار بولعانداردىڭ سانى ەكى جىلدا ەكى ەسەگە ارتقان.

قارۋلى قاقتىعىستار مەن ءتۇرلى دەڭگەيدەگى سوعىس سالدارىنان اس-سۋسىز قالعاندار تۋرالى بۇۇ قاۋىپسىزدىك كەڭەسىنە مالىمەت بەرىپ، جاۋاپتى تۇلعالاردىڭ نازارىن اۋدارعان بيزلي، قارۋلى قاقتىعىستاردىڭ ازىق-تۇلىك جەتىسپەۋشىلىگىنە جول اشقانىنا، سونىڭ كەسىرىنەن پايدا بولعان تۇراقسىزدىقتىڭ اتالعان قاۋىپتى ودان سايىن ۇدەتكەنىنە الاڭداۋلى. قازىرشە، سوڭعى مالىمەتتەردى ساراپتاپ، سانداردى سويلەتەر بولساق، افريكانىڭ ساحەل ايماعىن ايتپاعاننىڭ وزىندە، بۋركينا فاسو، چاد، نيگەر، مالي جانە ماۆريتانيا ەلدەرىندە ازىق-تۇلىك جەتىسپەۋشىلىگىنىڭ زاردابىن تارتۋشىلار سوڭعى بەس جىلدا 30 پايىزعا ارتقان.

ءتۇرلى رەسمي مالىمەتتەردەن بەلگىلى بولعانداي، اش قۇرساق 815 ملن ادامنىڭ 60 پايىزى سوعىس ايماقتارىندا ءومىر سۇرەدى ەكەن. ال، 124 ملن ادامنىڭ شامامەن 32 ميلليونىنىڭ سوماليدە، يەمەندە، وڭتۇستىك سۋداندا جانە وتكەن جىلى اشارشىلىققا تاپ بولعان نيگەريانىڭ سولتۇستىك-شىعىسىندا تۇراتىندارى راستالدى.

اشتىققا ۇشىراعان 490 ملن ادامنىڭ 80 پايىزى بالالار

بۇۇ-نىڭ گۋمانيتارلىق ماسەلەلەردى ۇيلەستىرۋگە جاۋاپتى باس حاتشىسىنىڭ كومەكشىسى مارك لوۋكوك تا قۇرعاقشىلىق پەن اشارشىلىقتىڭ كوبىنەسە ۇزاق ۋاقىتتان بەرى قاقتىعىستار بولىپ جاتقان ەلدەردە كەڭ تارالعانىن حابارلاعان ەدى. ال ستاتيستيكا بويىنشا، سول ەلدەردەگى اشتىقتان زارداپ شەگۋشىلەردىڭ باسىم كوپشىلىگى بالالار بولىپ تۇر.

ءۇش ەل اشارشىلىق "تىرناعىندا"...

نەگىزىنەن، اشارشىلىق نيگەريانىڭ سولتۇستىك-شىعىسى مەن يەمەن جانە وڭتۇستىك سۋدان ەلدەرىن دە جايلاپ تۇر. رەسمي بولجامدارعا سۇيەنسەك، اتالعان ەلدەردەگى جاعداي كەم دەگەندە ءالى 6 اي بويى تۇراقتالماۋى مۇمكىن. ال ەفيوپيا، سومالي جانە كونگوداعى ازىق-تۇلىك جەتىسپەۋشىلىگىنىڭ الاڭداتارلىق دەڭگەيدە ەكەندىگى سونشا، بۇۇ ءتيىستى ۇيىمداردى تەز ارادا قاۋىپسىزدىك شارالارىن قولعا الۋعا شاقىرىپ وتىر.

“The Qazaq Times”