قازاقستاندا زەينەتاقى جيناقتارى بويىنشا كىرىستىڭ تومەن ەكەنى ايتىلدى

قازاقستاندا زەينەتاقى جيناقتارى بويىنشا كىرىستىڭ تىم تومەن بولۋىنا جانە زەينەتاقى ەسەبىنەن بولاتىن جاسىرىن قارجىلاندىرۋ ارەكەتتەرىنە جول بەرمەۋ كەرەك. ءماجىلىس دەپۋتاتى ايقىن قوڭىروۆ وسىلاي مالىمدەدى.

ول ۇلتتىق بانك توراعاسى دانيار اقىشەۆ پەن قارجى ءمينيسترى باقىت سۇلتانوۆعا جولداعان دەپۋتاتتىق ساۋالىندا ەلدەگى ازاماتتاردىڭ زەينەتاقى جيناقتارى بويىنشا كىرىس تومەن ەكەنىن جانە  ينفلياتسيا دەڭگەيى ودان جوعارى ەكەنىن ايتقان.

"وسى جىلدىڭ ءۇش توقسانىندا بجزق-داعى زەينەتاقى جيناقتارىنىڭ جالپى سوماسى 7,5 ترلن تەڭگەگە جەتتى، ال جالپى ينۆەستيتسيالىق تابىس - 462 ملرد تەڭگە. وسىلايشا كىرىس دەڭگەيى 6,1% بولىپ وتىر، وسى كەزەڭدەگى ينفلياتسيا 7,1%-عا جەتتى. تەڭگەنىڭ ايتارلىقتاي السىرەگەنىن جانە ءتۇرلى جانارماي وتىندارىنىڭ قىمباتتاعانىن ەسەپكە الار بولساق، ينفياتسيا مەن زەينەتاقى جيناعىنىڭ كىرىسى اراسىنداعى ايىرماشىلىق ۇلعايا بەرەدى", - دەدى قوڭىروۆ.

ول ايتىپ وتكەندەي، زەينەتاقى جيناقتارىن ينفلياتسيادان قورعاۋعا زاڭناما بويىنشا كەپىلدىك بار. الايدا قازىرگى كەزدەگى قولدانىستىعى ەرەجەگە سايكەس وتەماقى تولەۋ ينۆەستيتسيالىق تابىس پەن ينفلياتسيا اراسىنداعى ايىرماشىلىقتان جوعارى بولىپ وتىرعان جوق.

"باستاپقى كەزدە زەينەتاقى جۇيەسىندە زەينەتاقى جيناقتارىنىڭ نولدىك ينۆەستيتسيالىق كىرىسى ءپرينتسيپى بەلگىلەنگەن. الايدا بجزق كىرىستى ۇلعايتۋعا ىنتالانىپ وتىرعان جوق، ويتكەنى ولاردىڭ كىرىسى ينفلياتسيا دەڭگەيىنەن قالىپ قويعان كۇننىڭ وزىندە مەملەكەتتىك بيۋدجەتپەن وتەلەدى", - دەيدى دەپۋتات.

قوڭىروۆتىڭ سوزىنشە، سالىمشىلار قارجىسى قارىز الۋشىلاردىڭ بەلگىلى ءبىر توپتارىنا تومەندەتىلگەن مولشەرلەمەمەن بەرىلگەندىكتەن، زەينەتاقى جيناقتارىنىڭ ينۆەستيتسيالىق كىرىسى تومەن بولۋى مۇمكىن.

وسى سەبەپتى ماجىلىسمەن ۇكىمەتتەن بجزق-نىڭ 2014-2017 جىلدارعا ارنالعان ينۆەستيتسيالىق كىرىستەرى جانە سول كەزەڭدەگى ينفلياتسيا وتەماقىسى بويىنشا زەينەتاقى جيناقتارىنا بيۋدجەتتەن تولەنگەن كەپىلدىك تولەمدەرى تۋرالى اقپاراتتار بەرۋدى سۇرادى.

ايتا كەتەيىك، زەينەتاقى جيناقتارىنا قاتىستى داۋ قازاقستاندا جىل وتكەن سايىن كوبەيىپ كەلەدى. مەملەكەت تاراپىنان كەپىلدىك بار دەگەن كۇننىڭ وزىندە، قازىرگى كەزدە قازاقستاندىقتار زەينەتاقى قورىنا سەنۋدەن قالعان.

“The Qazaq Times”