فوتو: ISTORY.KZ

سەنات دەپۋتاتى نۇرلان قىلىشپاەۆ قر پرەمەر ءمينيسترى باقىتجان ساعىنتاەۆقا قىتايداعى قازاق دياسپوراسىنىڭ قۇقىقتارى بۇزىلعانى تۋرالى جاعدايدى انىقتاۋدى سۇراپ، دەپۋتاتتىق ساۋال جولدادى. سونداي-اق، ول اقپارات راستالعان جاعدايدا قابىلداناتىن شارالار تۋرالى حاباردار ەتۋىن سۇرادى. 

ول قىتايدىڭ شىڭجاڭ ۇيعىر اۆتونوميالىق ايماعىندا تۇراتىن قازاق حالقى وكىلدەرىنىڭ  قۇقىقتارى بۇزىلعانى تۋرالى ماسەلە 2017 جىلدىڭ ماۋسىمىندا وتكەن دۇنيەجۇزى قازاقتارىنىڭ قۇرىلتايىندا كوتەرىلگەنىن اتاپ ءوتتى. ونىڭ ايتۋىنشا، سول ۋاقىتتان بەرى اقپارات قۇرالدارىندا جانە الەۋمەتتىك جەلىلەردە 1,5 ميلليوننان استام قانداستىڭ قۇقىقتارى شەكتەلىپ جاتقانى تۋرالى قاۋەسەتتەر كەڭىنەن تارالعان.

"وسىنداي بەيرەسمي اقپاراتتارعا سەنسەك، ولاردىڭ ءدىني قۇقىقتارى شەكتەلىپ، قازاق دياسپوراسىنىڭ شەتەلدىك پاسپورتتارى كەرى قايتارىلىپ جاتقانى تۋرالى ايتىلىپ ءجۇر. مەنىڭ سۇراعىم مىناداي: قىتايداعى قازاق دياسپوراسىنىڭ قۇقىقتارى بۇزىلعانى تۋرالى اقپارات قانشالىقتى راس؟ جالپى قىتايداعى قازاق دياسپوراسىنىڭ جاعدايى جانە ولاردىڭ قۇقىقتارىنىڭ قورعالۋ دەڭگەيى قانداي؟ ولارعا قىسىم كورسەتە مە؟ قازاقستان رەسپۋبليكاسى سىرتقى ىستەر مينيسترلىگىنىڭ تاراپىنان بۇل ماسەلەنى تالداۋ جانە زەرتتەۋ بويىنشا قانداي جۇمىستار جۇرگىزىلدى؟ وسىعان قاتىستى قىتاي تاراپىمەن كەلىسسوزدەر نەمەسە كونسۋلتاتسيالار بولدى ما؟", - دەپ ساۋال جولدادى دەپۋتات ساعىنتاەۆقا.

 

ايتا كەتەيىك، 24 قازان كۇنى قر سىرتقى ىستەر مينيسترلىگىنىڭ الماتىداعى بولىمىندە قىتايدىڭ شىنجاڭ جەرىندە قاماۋعا الىنعان نەمەسە «ساياسي ۇيرەنۋگە» جىبەرىلگەن قازاق ازاماتتارىنىڭ قازاقستانداعى تۋىستارىن، ولاردىڭ ارىز-شاعىمىن قابىلداۋ بولدى. قۇزىرلى ورىن جينالعانداردان 15 ادامدى جەكە-جەكە قابىلداپ، قىتايعا كەتىپ ورالا الماي وتىرعان نەمەسە سوندا تۇراتىن تۋىستارىنىڭ ۇكىمەت جاعىنان قىسىم كورگەن ءىسى تۋرالى ءمان-جاي سۇراسقان.

ارىز بەرۋشىلەردىڭ سوزىنە قاراعاندا شىنجاڭ جەرىندە قىسىمعا ۇشىراعاندار اراسىندا قازاقستان ازاماتتارى دا بولۋى مۇمكىن دەپ وتىر. بىراق ول تۋرالى انىق دەرەك جوق. الداعى ۋاقىتتا بۇل ادامداردىڭ تۋىستارىنان شاعىمداردى قابىلداپ الىپ، قىتاي تارابىنىڭ تەكسەرىپ-انىقتاۋىنا جولداماق.

“The Qazaq Times”