ەۋرووداق شىڭجاڭ ماسەلەسىنە الاڭداۋشىلىق ءبىلدىردى

ەۋروپا وداعى شىڭجاڭداعى ەتنيكالىق توپتاردىڭ حال-احۋالىنا الاڭداۋشىلىق ءبىلدىرىپ وتىر. ەۋرووداقتىڭ سىرتقى ساياسات جونىندەگى جوعارعى وكىلى فەدەريكا موگەريني وسىلاي دەپ مالىمدەدى.

شىڭجاڭ ايماعىندا ادام قۇقىعىن تاپتاۋ جالعاسىپ، «ساياسي لاگەرلەر» سانى ارتقان. بارلىق مەملەكەتتەر قىتايدىڭ وزگە ۇلتتارعا جاساپ وتىرعان قورلىعىنا قارسىلىق ءبىلدىرۋ كەرەكتىگىن ايتقان فەدەريكا موگەريني وسى ماسەلەنى رەتتەۋگە نيەت ءبىلدىردى. ەۋرووداق وكىلدەرى بۇۇ-نىڭ ادام قۇقىعى جونىندەگى جوعارى كوميسسارىنىڭ قىتايداعى بارلىق ايماقتاردى ارالاپ، حالىقتاردىڭ جاعدايىمەن تانىسىپ كەلۋ تۋرالى شەشىمىنە قولداۋ ءبىلدىردى. سونداي-اق فەدەريكا موگەريني ەو باسشىلارىنىڭ اتىنان «ناسىلدىك كەمسىتۋشىلىكتى اشىقتان-اشىق ارتتىرىپ وتىرعان» قىتايعا ەسكەرتۋ جاسادى.

ايتا كەتەيىك، حالىقارالىق قۇقىق قورعاۋشى ۇيىمدار قىتايداعى ەتنيكالىق توپتاردىڭ جاعدايىنا باسا نازار اۋدارۋدا. كەي دەرەكتەر بويىنشا شىڭجاڭداعى «ساياسي لاگەرلەردە» مىڭداعان قازاق قاماۋدا وتىر. وسىعان دەيىن اقش قۇقىق قورعاۋشىلارى بەيجىڭدى شىڭجاڭداعى تۇركىتىلدەس مۇسىلماندارعا قارسى جۇيەلى ناۋقان ۇيىمداستىرىپ كەلەدى دەپ ايىپتاعان بولاتىن. سونىمەن قاتار ولار «ادام قۇقىعىن تاپتاپ، كەي ۇلتتارعا جازىقسىزدان-جازىقسىز قورلىق كورسەتىپ وتىرعان» قحر-دى «قۇقىق ساقتالماعان ايماق» دەپ اتادى.

"The Qazaq Times"