تۋىستارىنان حابار الا الماي ءارى نەگىزسىز سوتتالعان جاقىندارىنا اراشا سۇراعان ءبىر توپ نارازى الماتى قالاسىنداعى قىتاي كونسۋلدىعىنىڭ الدىندا. ناۋرىز ايىنىڭ باسىندا، 2021 جىل. فوتو: QT

دۇيسەنبى ساعات 11.30-دا الماتى قالاسىندا ورنالاسقان قىتاي كونسۋلدىعى الدىندا 36 كۇننەن بەرى شىڭجاڭداعى تۋىستارىنا اراشا سۇراپ جۇرگەن ءبىر توپ ادام نارازىلىق اكتسياسىن وتكىزۋگە تىرىستى. بىراق كەمىندە ءتورت-بەس كولىكپەن كەلگەن پوليتسەيلەر شارانىڭ زاڭسىز ەكەنىن ەسكەرتىپ، انالاردى ەلشىلىك عيماراتىنا جىبەرمەدى.

وسى ۋاقىتقا دەيىن ءىنىسىن ىزدەپ، پيكەتكە شىققانى ءۇشىن قامالىپ شىققان بەلسەندى بايبولات كۇنبولاتۇلى وقيعا ورنىنان تىكەلەي ەفير جۇرگىزدى.

«قىتاي كونسۋلدىعىنىڭ الدىندا ۆيزا اشتىراتىن ءبىر كىشكەنتاي جەر بار. پوليتسيا سول ءۇيدىڭ الدىنان بۇل كىسىلەردى اسىرعان جوق. بۇل كىسىلەر سول جاققا بىرنەشە رەت بارۋعا وقتالىپ ەدى، پوليتسيا ولاردى يتەرىپ، وتكىزبەي قويدى. سول قارسىلىق كەزىندە اكتسياعا شىعىپ جۇرگەن ادامداردىڭ ءبىرى حاليدا اپامىزدىڭ دەنساۋلىعى سىر بەرىپ، قان قىسىمى كوتەرىلىپ، تالىقسىپ ەسىن جوعالتۋعا از قالدى. سۋ شاشىپ ءجۇرىپ، جەدەل جاردەم شاقىرتىپ، قازىر دەنساۋلىعى ءسال تاۋىرلەگەندەي بولدى. اقىر اياعىندا بۇل كىسىلەر ايدالادا تۇرا بەرگەن دۇرىس ەمەس شىعار دەپ ۇيگە قايتۋعا كەلىستى. ونىڭ ۇستىنە اياقتارىنان سۋ ءوتىپ كەتكەن. قاتتى جاۋرادى»، – دەيدى بايبولات كۇنبولاتۇلى ازاتتىق راديوسىنا بەرگەن پىكىرىندە.

تىكەلەي ەفير كەزىندە مەدەۋ اۋداندىق پوليتسيا قىزمەتكەرلەرى كارانتين شەكتەۋى كۇشەيگەندىكتەن كونسۋلدىق الدىنا بارۋعا بولمايتىنىن ەسكەرتەدى. نارازىلار ءتورت جىلدان بەرى ارىز-ءوتىنىش جازباعان ورنىمىز قالمادى دەپ قاپالى.

ءبىر ايدان استام ۋاقىت اتا-اناسى، باۋىرلارى مەن ۇل-قىزىن ىزدەگەن ءبىر توپ قازاقستان ازاماتى قىتاي كونسۋلدىعىنىڭ الدىندا جاقىندارىن ىزدەپ، سۇراۋ سالىپ ءجۇر. دەسە دە سىرتقى ىستەر مينيسترلىگى نە كونسۋلدىق وكىلىنىڭ بىردە-ءبىرى نارازىلاردىڭ الدىنا شىعىپ، ديالوگقا ارەكەتتەنبەگەن. مامىلەگە كەلۋدىڭ ورنىنا تالاپشىل توپتى جيىندا پوليتسيا سىرتتاي باقىلاپ تۇرادى. ءتىپتى اۋىق-اۋىق بەلسەندىلەردىڭ كەيبىرىن ۇستاپ اكەتەدى نە قامايدى.

"The Qazaq Times"