قىتاي بيلىگى شىڭجاڭ مۇسىلماندارىنىڭ ۇيىنە تىڭشىلارىن كۇشتەپ ورنالاستىرۋدا

قىتاي بيلىگى شىڭجاڭ ۇيعىر اۆتونوميالىق اۋدانىنداعى ءاربىر مۇسىلمان وتباسىنا كوممۋنيستىك پارتيانىڭ وكىلدەرىن ورنالاستىرۋعا تۇبەگەيلى شەشىم شىعاردى، دەپ حابارلايدى islamianaliz.com اگەنتتىگى.

وسىلايشا، ءاربىر مۇسىلمان وتباسىنا ميلليوننان استام كوممۋنيستتى ورنالاستىرۋ جوسپارلانۋدا. بيلىكتىڭ بۇل شەشىمى «تەرروريزم، سەپاراتيزم جانە ءدىني ەكسترەميزم كۇشتەرىنە» قارسى ناۋقان اياسىندا قابىلدانعان. اتالعان اقپارات اگەنتتىگىنىڭ حابارلاۋىنشا، كوممۋنيستەر مۇسىلمانداردىڭ ۇيلەرىندە اي سايىن كەم دەگەندە ءبىر اپتا تۇراتىن بولادى. ەندى بۇدان بىلاي، دىندەس باۋىرلارىمىز «شاقىرىلماعان قوناقتارىنا» وزدەرىنىڭ جەكە ومىرلەرى مەن ساياسي كوزقاراستارى تۋرالى تولىق بايانداپ بەرۋگە مىندەتتى.

ودان بولەك، باسقارۋشى پارتيا وكىلدەرى مۇسىلماندارعا ارناپ «ساياسي ساۋاتسىزدىقتى جويۋ» كۋرستارىن جۇرگىزبەكشى. حالىقارالىق ادام قۇقىقتارىن قورعاۋ ۇيىمى (Human Rights Watch) كحر-نىڭ بۇل باستاماسىن شىڭجاڭ ۇيعىر اۆتونومياسىنداعى تۇرعىنداردىڭ قۇقىقتارىن بۇزۋشىلىق دەپ اتادى. «وزدەرىنىڭ جۇرگەن-تۇرعاندارى مەن ىستەگەن ىستەرىن باعىپ-قاعىپ، اڭدىپ وتىراتىن ادامداردى ۇيلەرىنە ورنالاستىرۋعا كۇشتەپ كوندىرۋدەن ارتىق تاعى قانداي قاتىگەزدىك بولسىن؟»، - دەدى HRW ۇيىمىنىڭ قىتاي ىستەرى جونىندەگى مامانى مايا ۆان. بۇدان بۇرىن دا شامامەن 120 مىڭ مۇسىلماننىڭ قاشعار قالاسىنداعى ساياسي ءبىلىم بەرۋ لاگەرىنە جىبەرىلەتىندىگى حابار تاراعان ەدى. بىلەتىندەردىڭ ايتۋىنشا، ول جەردە مۇسىلمانداردى رەۆوليۋتسيالىق اندەر جاتتاۋعا، قىتاي تىلىندە سويلەۋگە ماجبۇرلەيتىن كورىنەدى.

قىتايداعى مۇسىلماندار دەگەندە، ونىڭ ىشىندە ءوزىمىزدىڭ دە قاراكوز قانداستارىمىز بار. بۇل ماسەلە — قازاق قوعامىنىڭ بۇگىنگى تاڭداعى ەڭ باستى دەرتىنە اينالۋدا. ارعى بەتتەگى اعايىن وسىلاي جازىقسىز قىساستىق كورىپ جاتقاندا، ءبىزدىڭ بيلىكتىڭ اراشا تۇسەتىن ۋاقىتى كەلگەن سياقتى.

“The Qazaq Times”