پارلامەنت سپيكەرىنىڭ وتستاۆكاعا كەتۋىنە اتامباەۆتىڭ قانداي قاتىسى بار؟

بۇگىن قىرعىزستان پارلامەنتىنىڭ سپيكەرى چىنىباي تۇرسىنبەكوۆ وتستاۆكاعا كەتتى. وسىعان بايلانىستى قىرعىز ەلىندە ءتۇرلى بولجامدار ايتىلۋدا. ءبىرى ونى ەل پرەزيدەنتى المازبەك اتامباەۆ جۇمىستان قۋىپ جىبەردى دەسە، ءبىرى ول ءوز ەركىمەن كەتتى دەگەن ويدا.

قازان ايىنىڭ 25-ءسى كۇنى وتكەن جوعارى كەڭەستىڭ كەزەكتى وتىرىسىندا چىنىباي تۇرسىنبەكوۆ ءوزىنىڭ وتستاۆكاعا كەتەتىندىگى جايىندا مالىمدەمە جاسادى. قىرعىزستاندىق ساراپشىلاردىڭ پىكىرىنشە، ءبىر جارىم جىل عانا سپيكەر بولىپ وتىرعان تۇرسىنبەكوۆ ورنىنان ءوز ەركىمەن كەتپەگەن. ونىڭ قىزمەتىنەن كەتۋىنە المازبەك اتامباەۆتىڭ قاتىسى بار. ويتكەنى چىنىباي تۇرسىنبەكوۆ پرەزيدەنت سايلاۋى الدىندا سوورونباي جەەنبەكوۆتىڭ قىرعىزستان سوتسيال-دەموكراتيالىق پارتياسى اتىنان سايلاۋعا قاتىسۋىنا قارسى بولعان. شىلدە ايىنىڭ 15-ءسى كۇنى وتكەن پارتيا سەزىندە تۇرسىنبەكوۆ الدا كەلە جاتقان پرەزيدەنت سايلاۋىنا پارتيا اتىنان ءوزى قاتىسۋعا دايىن ەكەندىگىن ايتقان. ول ءتىپتى جەەنبەكوۆتى «ءوز بەتىمەن شەشىم قابىلداي المايتىن ساياساتكەر» دەپ تە اتاعان. ال بۇنىڭ بارلىعى ەل پرەزيدەنتى المازبەك اتامباەۆقا ۇناماعاندىعى بەلگىلى.

قىرعىز ساراپشىلارىنىڭ ويىنشا، تۇرسىنبەكوۆ قىزمەتىنەن ءوز ەركىمەن كەتپەگەن. ونى اتامباەۆ جۇمىستان قۋعان جانە بۇل پرەزيدەنت سايلاۋىنان كەيىن بيلىك باسىنداعى اۋىس-تۇيىستەردىڭ باسى عانا. قازىردىڭ وزىندە تۇرسىنبەكوۆتىڭ وتستاۆكاعا كەتۋىمەن قاتار پارلامەنتتى مەرزىمىنەن بۇرىن تاراتۋ جايىندا اڭگىمەلەر ايتىلۋدا. بۇنداي قاڭقۋ سوزدەردىڭ شىعۋىنا سەبەپ تە جوق ەمەس. ويتكەنى قازىرگى قىرعىز پارلامەنتىنىڭ باسىم كوپشىلىگىن «رەسپۋبليكا – اتا-جۇرت»، «ونۋگۋ-پروگرەسس» جانە «اتا-مەكەن» وپپوزيتسيالىق پارتيالارىنىڭ وكىلدەرى قۇرايدى. ال «رەسپۋبليكا – اتا-جۇرت» پەن «ونۋگۋ-پروگرەسس» پارتيالارىنىڭ جەتەكشىلەرى وسى جولى پرەزيدەنت سايلاۋىندا جەڭىلگەن ومىربەك بابانوۆ پەن باقىت توروباەۆ ەكەندىگىن ەسكەرسەك، وندا «الداعى ۋاقىتتا قىرعىز جوعارى كەڭەسى مەرزىمىنەن بۇرىن تاراتىلۋى مۇمكىن» دەگەن ءسوزدىڭ جانى بار ەكەندىگىنە كوز جەتكىزەمىز.

بۇدان بولەك قازىرگى تاڭدا قىرعىز قوعامىندا چىنىباي تۇرسىنبەكوۆتىڭ ورنىنا كىم كەلۋى مۇمكىن دەگەن سۇراق ءجيى تالقىلانۋدا. بىراق وعان جاۋاپتا جوق ەمەس. قىرعىز باق وكىلدەرىنىڭ ويىنشا، المازبەك اتامباەۆ تۇرسىنبەكوۆتىڭ ورنىنا ساياسات الاڭىنداعى جاقتاستارىنىڭ ءبىرى «قىرعىزستان» فراكتسياسىنىڭ كوشباسشىسى داستانبەك جۇمابەكوۆتى قويۋى مۇمكىن. سەبەبى جوعارى كەڭەستە «قىرعىزستان سوتسيال-دەموكارتيالىق پارتياسىنىڭ» «قىرعىزستان» فراكتسياسىنان باسقا وداقتاسى جوق. بىراق تۇرسىنبەكوۆ جۋرناليستەر الدىندا سويلەگەن سوزىندە سپيكەر قىزمەتىنەن كەتسە دە، پارلامەنتتە قالاتىندىعىن ايتقان. ال بۇل دەگەنىمىز  كەلەسى سپيكەر بولىپ كەلەتىن ادامعا وڭاي تيمەسى انىق. ءبىر سوزبەن ايتقاندا الداعى ۋاقىتتا ءبىزدى قىرعىز ساياسات ساحناسىندا المازبەك اتامباەۆ پەن سوورونباي جەەنبەكوۆتىڭ باسقارۋىمەن جاسالاتىن قىزىقتى قويىلىمدار كۇتىپ تۇر.

“The Qazaq Times”