ساعىنتاەۆ الماتىداعى شاعىن جانە ورتا بيزنەس ورىندارىنىڭ قىزمەتىمەن تانىستى

قر پرەمەر-ءمينيسترى باقىتجان ساعىنتاەۆ الماتىداعى شاعىن جانە ورتا بيزنەس ورىندارىنىڭ قىزمەتىمەن تانىستى، دەپ حابارلايدى الماتى قالاسى اكىمدىگىنىڭ ءباسپاسوز قىزمەتى.

ول  الدىمەن «Magnum Cash&Carry» جشس ارالاپ، شارۋاشىلىق جانە ازىق-تۇلىك تاۋارلارىنىڭ، نان-توقاش، كونديتەرلىك ونىمدەر، جەمىس-كوكونىس جانە ەت-ءسۇت ونىمدەرى سەكتسيالارىن كورىپ شىقتى.

«Magnum Cash&Carry» كومپانياسىنىڭ مالىمەتىنشە، الماتىداعى بولشەك ساۋدا نارىعىنداعى ونىڭ ۇلەسى — 50%-عا جۋىق. جەلى دۇكەندەرىنە كەلەتىن ساتىپ الۋشىلار سانى ورتا ەسەپپەن العاندا 61 مىڭنان استام ادامدى قۇرايدى.

پرەمەر-مينيستر «ەفكو الماتى» جشس ماي ونىمدەرىن وندىرەتىن كاسىپورىنعا بارىپ، ماي ءوندىرۋ كەشەنىن قايتا قۇرۋ مەن جاڭعىرتۋدى دا تەكسەردى. كومپانيا جوعارى الەمدىك ستاندارتتارعا ساي ماي جانە مارگارين ءوندىرىسىن رەتتەي الدى ەكەن.

ينۆەستيتسيالار كولەمى 11 ملرد تەڭگەدەن اساتىن «ەفكو الماتى» ماي كلاستەرىن قۇرۋ جوباسى الماتىنىڭ يندۋستريالاندىرۋ كارتاسىنا جانە «بيزنەستىڭ جول كارتاسى – 2020» باعدارلاماسىنا ەنگىزىلگەن.

كومپانيانىڭ باسشىسى نۇرجان قوجامۇراتوۆتىڭ ايتۋىنشا، كۇردەلى ماكروەكونوميكالىق جاعدايعا قاراماستان، كاسىپورىن ماي ونىمدەرى ءوندىرىسى مەن ەكسپورتى كولەمىن ارتتىرادى، بۇل قازاقستانعا 2025 جىلعا قاراي ونىڭ ورتالىق ازياداعى جەتكىزۋشىسى بولۋعا مۇمكىندىك بەرەدى.

بۇدان بولەك باقىتجان ساعىنتاەۆ اسكەري تەحنيكا ازىرلەۋ، ءوندىرۋ، جوندەۋ، جاڭعىرتۋ جانە قارۋلاندىرۋ بويىنشا كاسىپورىن — «الماتىەنەرگوسەرۆيس» جشس-دا بولدى.

“The Qazaq Times”