فوتو: Res Publica

قىرعىزستان پارلامەنتىنىڭ حالىقارالىق ىستەر، قورعانىس جانە قاۋىپسىزدىك كوميتەتى قازاقستان تاراپىمەن جاسالعان 100 ملن دوللارعا قاتىستى كەلىسىمنىڭ كۇشىن جويۋ تۋرالى زاڭ جوباسىن قولدادى. قازاقستان بۇل قاراجاتتى قىرعىز ەلى ەكونوميكاسىنىڭ ەۋرازيالىق ەكونوميكالىق وداققا بەيىمدەلۋىن رەتتەۋ ءۇشىن بەرۋ كەرەك بولعان. 

"كوميتەت دەپۋتاتتارى ءبىرىنشى وقىلىمدا  ەاەو اياسىندا  قازاقستاننىڭ قىرعىزستانعا 100 ملن دوللار بەرۋ تۋرالى كەلىسىمىن بۇزۋ تۋرالى زاڭ جوباسىن ءبىراۋىزدان قولدادى", - دەپ مالىمدەگەن قىرعىز پارلامەنتى. ينتەرفاكس اگەنتتىگىنىڭ مالىمەتىنشە، ۇكىمەت مۇنى جابىق رەجيمدە وتكىزۋ تۋرالى ءوتىنىش جاساعان. ەندى الداعى ۋاقىتتا بۇل رەسپۋبليكا پارلامەنتىنىڭ تالقىلاۋىنا ۇسىنىلۋى مۇمكىن.

ايتا كەتەيىك، قىرعىز رەسپۋبليكاسىنىڭ ەاەو-عا كىرۋىنە بايلانىستى «جول كارتاسىن» ىسكە اسىرۋ ءۇشىن قازاقستان تاراپىنان 100 ملن دوللار كولەمىندە تەحنيكالىق كومەك الۋ تۋرالى كەلىسىمگە 2016 جىلدىڭ 26 جەلتوقسانىندا سانكت-پەتەربۋرگتە  قول قويىلعان.

“The Qazaq Times”