اۋعانستاننىڭ پرەزيدەنتى اشراف عاني: «الەمدەگى ەڭ جامان جۇمىس مەنىڭ ەنشىمدە»

اۋعانستاننىڭ پرەزيدەنتى اشراف عاني ۆۆس اقپاراتتىق اگەنتتىگىنە بەرگەن ەكسكليۋزيۆتى سۇحباتىندا تاليباندارعا قارسى كۇرەستىڭ بولاشاعى تۋرالى اڭگىمەلەپ، ەلدىڭ الدىندا تۇرعان نەگىزگە مىندەتتەر مەن قاتەرلەردى سانامالاپ بەردى. 

اشراف عاني ءوز اڭگىمەسىن "الەمدەگى ەڭ جامان جۇمىس -مەنىڭ ەنشىمدە" دەۋدەن باستادى. اۋعانىستان پرەزيدەنتىنىڭ ولاي دەۋىنە ابدەن نەگىز بار. قازىر 16 جىلدان بەرى سوعىس الاڭىنا اينالعان مەملەكەتتىڭ الدىندا كوپتەگەن سىن-قاتەرلەر مەن ءبىرىنشى كەزەكتە شەشۋدى قاجەت ەتەتىن مىندەتتەر تۇر. ولاردىڭ ەڭ ماڭىزدىسى - قاۋىپسىزدىك. ناتو اسكەرى اۋعانستان جەرىنەن كەتكەلى 3 جىل ۋاقىتتىڭ ىشىندە تاليباندىقتارعا قارسى سوعىستى ەل اسكەرى ءوزى جۇرگىزىپ كەلەدى. اۋعانستاندا قالعان 14 مىڭعا جۋىق ناتو اسكەرى ولاردى سوعىس تارتىبىنە ۇيرەتۋمەن، وقىتۋمەن، قولداۋ كورسەتۋمەن اينالىسادى. اشراف عاني بۇل تۋرالى: "بۇل 12 جاسار بالانىڭ موينىنا 30 جاستاعى ەر ازاماتتىڭ مىندەتى جۇكتەلگەنگە ۇقسايدى. دەگەنمەن بۇل ءبىزدى قاتايتىپ، ەرتە ەسەيتتى" ، - دەيدى.

كوپتەگەن اسكەري ساراپشىلار اۋعانستاننىڭ  تاليباندىقتارعا قارسى ءوزى جەكە دارا جۇرگىزگەن كۇرەسىنە نەبارى 3 جىل بولعانىن جانە بۇل ناتيجە كۇتۋگە ەرتە كەزەڭ ەكەنىن ايتادى. اشراف عاني الداعى ءتورت جىلدان كەيىن ناتو-نىڭ قولداۋىن قاجەت ەتپەيتىن دەڭگەيگە كوتەرىلەتىنىنە سەنەدى. ول تاليباندىقتاردىڭ ۇكىمەتتى قۇلاتىپ، ەلدى قايتادان بولىسكە سالۋ تۋرالى ويلارى جۇزەگە اسپاعانىن العا تارتادى. دەگەنمەن اقش-تىڭ كەلتىرگەن دەرەكتەرىنە قاراعاندا، قازىر اۋعانستان بيلىگىنىڭ قول استىنا قارايتىن اۋماق بارلىق تەرريتوريانىڭ ۇشتەن ەكى بولىگىنەن دە از. سونىمەن قاتار وتكەن جىلى اۋعانستان اسكەرى ءوز قۋاتىنىڭ 10 پايىزىن جوعالتتى. بۇل 7 مىڭ اسكەردىڭ سوعىس الاڭىندا جان تاپسىرىپ، تاعى 12 مىڭ ازاماتتىڭ جاراقات الۋىمەن بايلانىستى.

اشراف عاني باتىس ەلدەرى اۋعانستانداعى قاقتىعىستىڭ ءمانىن تۇسىنبەيدى دەپ ەسەپتەيدى. "بىزدە بارلىعى ويلاعانداي ازاماتتىق سوعىس ەمەس، ەسىرتكىگە قارسى سوعىس", - دەيدى ول. "تاليباندىقتار الەمدەگى ناشانىڭ ەڭ ءىرى ەكسپورتەرلارى. بارلىق الەم بۇل ماسەلەگە كوز جۇما قاراپ وتىر", - دەپ قىنجىلعان اۋعانستان پرەزيدەنتى ءوزىنىڭ سوڭعى ماقساتى تاليباندىقتارمەن كەلىسىمگە كەلۋ ەكەنىن ايتادى. اشراف عاني: "جەمقورلىققا قارسى تۇرۋ ءۇشىن ونىمەن ءوزىڭ اينالىسپاۋىڭ قاجەت جانە ونى جەڭۋگە مىقتاپ بەل بايلاۋ كەرەك. اۋعانىستانداعى ەڭ داۋلەتتى ادامداردىڭ ءبىرى جانە مەنىڭ بىلىكتى گەنەرالىم  - اباقتىدا", -  دەيدى.

“The Qazaq Times”