قىرعىز پرەزيدەنتتىگىنە ۇمىتكەر جەەنبەكوۆتىڭ تەررورلىق ۇيىمدارعا قانداي قاتىسى بار؟

بۇگىن قىرعىزستاندا تانىمال جۋرناليست، كەزىندە بۇرىنعى ەل پرەزيدەنتى اسقار اقاەۆتىڭ ءباسپاسوز حاتشىسى قىزمەتىن اتقارعان قاباي قارابەكوۆتىڭ سوت وتىرىسى وتەدى. قاراباەۆتىڭ ءىسىن بىشكەك قالاسىنىڭ سۆەردلوۆسك اۋداندىق سوتى قارايتىن بولادى. ودان قىرعىزستان پرەزيدەنتتىگىنە ۇمىتكەر، ەكس-پرەمەر-مينيستر سوورونباي جەەنبەكوۆ وزىنە قاتىستى جالعان ماقالا جازعانى ءۇشىن مورالدىق شىعىن رەتىندە 72 مىڭ دوللار كولەمىندە وتەماقى تالاپ ەتۋدە.

قىركۇيەكتىڭ 11-ءى كۇنى قاباي قارابەكوۆ قىرعىزستاندىق ينتەرنەت-رەسۋرس «24.kg» سايتىنا سوورونباي جەەنبەكوۆتىڭ تۋىستارىنا قاتىستى «ۆيزيت ۆ سوچي. كرەمليۋ ۆنوۆ وبياسنيات، چەم حوروش پرەەمنيك؟» اتتى ماقالاسىن جاريالاعان.  وندا قاراباەۆ 2017 جىلى ماۋسىم ايىندا سوچي قالاسىندا وتكەن المازبەك اتامباەۆ پەن ۆلاديمير ءپۋتيننىڭ كەزدەسۋىندە، ماسكەۋ رەسمي بىشكەككە «»جەەنبەكوۆ باۋىرلارىنىڭ راديكالدى باعىتتاعى اراب ۇيىمدارىمەن بايلانىسى بار ەكەنىن استارلاپ جەتكىزگەندىگى» جايىندا جازعان. قاباي قاراباەۆتىڭ ويىنشا، ءدال سول كەزدەسۋدە رەسەي باسشىسى ۆلاديمير پۋتين المازبەك اتامباەۆقا قىرعىز پرەزيدەنتتىگىنە ۇمىتكەر سوورونباي جەەنبەكوۆ باۋىرلارىنىڭ ارابيالىق «الەۋمەتتىك رەفورمالار » ۇيىمىمەن بايلانىسى بارىنا الاڭداۋشىلىق بىلدىرەتىنىن ايتقان. اتالمىش ۇيىمنىڭ رەسەي اۋماعىندا تەررورلىق ۇيىم دەپ تانىلعانىن ەسكەرەتىن بولساق، وندا قاراباەۆتىڭ نەگە مۇنداي بولجامدار جاساعانىن تۇسىنۋگە بولادى. ونىڭ ۇستىنە بۇعان دەيىن قىرعىز باق بەتتەرىندە جەەنبەكوۆ باۋىرلارىنىڭ ءبىرى ساۋد ارابياسىندا ەلشى ەكەنى جايىندا، ال ەكىنشىسىنىڭ بىرنەشە رەت قاجىلىققا بارىپ كەلگەندىگى جايىندا اقپاراتتار جاريالانعان.

ال قىرعىزستاننىڭ ەكس سىرتقى ىستەر ءمينيسترى اليكبەك جەكشەنقۇلوۆ رەسەيلىك تەلەارنالاردىڭ بىرىنە بەرگەن سۇحباتىندا: «سوڭعى ۋاقىتتا اعايىندى جەەنبەكوۆتار قىرعىزستاندا اراب ەلدەرىنىڭ كوزقاراسىن ءجيى ناسيحاتتاپ ءجۇر» - دەپ مالىمدەگەن. ءبىر قىزىعى سوورونباي جەەنبەكوۆ پرەمەر-مينيستر بولىپ تۇرعان كەزىندە ءوزىنىڭ باۋىرلارىنا قاتىستى جاريالانعان ماتەريالداردىڭ اۆتورلارىن سوتقا بەرمەگەن. شەتەلدىك جانە قىرعىزستاندىق ساراپشىلاردىڭ ويىنشا، جەەنبەكوۆتىڭ قاراباەۆقا قىسىم كورسەتۋىنىڭ الدا كەلە جاتقان پرەزيدەنت سايلاۋىمەن تىكەلەي قاتىسى بار. ساراپشىلاردىڭ ايتۋىنشا، قازىرگى تاڭدا المازباك اتامباەۆ وزىنەن كەيىن سوورونباي جەەنبەكوۆتى قالدىرىپ كەتۋ ءۇشىن بيلىكتەگى بۇكىل رەسۋرستارىن پايدالانۋدا. ولار بۇعان دالەل رەتىندە جاقىندا بيلىكتىڭ كريمينالدى توپتاردى پايدالانۋ ارقىلى ومىربەك بابانوۆتىڭ جاقتاستارىنىڭ ءبىرى، وپپوزيتسيالىق ساياساتكەر قانات يساەۆتىڭ قاماۋعا الىنۋىن مىسالعا كەلتىرەدى.

“The Qazaq Times”