فوتو: ontustik.gov.kz

قازاقستان پرەمەر-ءمينيسترى باقىتجان ساعىنتاەۆ وڭتۇستىك قازاقستان وبلىسىنا جۇمىس ساپارى كەزىندە شىمكەنتتەگى بىرقاتار نىسانداردى ارالادى. ول الدىمەن «پەترو قازاقستان ويل پروداكتس» جشس-دە بولىپ، شىمكەنت مۇناي وڭدەۋ زاۋىتىنداعى جاڭعىرتۋ جانە قايتا قۇراستىرۋ  جوباسىنىڭ ىسكە اسۋ بارىسىمەن تانىستى، دەپ حابارلايدى وبلىس اكىمدىگىنىڭ ءباسپاسوز قىزمەتى.

نىسانداردى ارالاۋ كەزىندە پرەمەر-مينيستر پايدالانۋعا بەرىلگەن شيكىزاتتى الدىن الا گيدروتازالاۋ بلوگى بار جەڭىل بەنزين فراكتسيالارىن يزومەرلەۋ قوندىرعىسىننىڭ جۇمىسىن كورىپ شىقتى.

ءباسپاسوز قىزمەتىنىڭ  مالىمەتىنشە، شىمكەنت مۇناي وڭدەۋ زاۋىتى بيىلعى جىلدىڭ ماۋسىمىنان باستاپ كەدەن وداعىنىڭ تەحنيكالىق رەگلامەنتىنىڭ تالاپتارى بويىنشا ك-4, ك-5 ەكولوگيالىق كلاستاعى جوعارى وكتاندى بەنزين شىعارۋدى قولعا العان. بۇل مۇنداعى جاڭعىرتۋ جۇمىستارىنىڭ 1-ءشى كەزەڭدەگى جۇمىسى.

ەندى زاۋىتتاعى جاڭعىرۋ جۇمىستارىنىڭ 2-ءشى كەزەڭى 2018 جىلدىڭ قىركۇيەگىندە اياقتالادى دەپ جوسپارلانۋدا. ناتيجەسىندە جوعارى وكتاندى بەنزين ءوندىرۋ كولەمى جىلىنا 652-دەن 2 270 مىڭ تونناعا دەيىن، ديزەل وتىنى - 1 192-دەن 1 916 مىڭ تونناعا دەيىن، اۆياوتىن –  254-تەن 400 مىڭ تونناعا دەيىن وسەدى. زاۋىتتا جوعارى وكتاندى اۆتوبەنزيندەردى ءوندىرۋ ۇلەسى 100% قۇرايدى ەكەن.

ايتا كەتەيىك، وسى اپتادا "ەير استانا" ۇلتتىق كومپانياسى رەسەيدەن كەلەتىن اۆياتسيالىق كەروسيندى جەتكىزۋ توقتاعاندىقتان جانە شىمكەنت مۇناي وڭدەۋ زاۋىتى قايتا جوندەۋ جۇمىستارى ءۇشىن ۋاقىتشا جابىلعاندىقتان قازاقستاننىڭ اۋە تاسىمالىندا كەروسين تاپشىلىعى بولۋى مۇمكىن ەكەنىن حابارلاعان.

“The Qazaq Times”