قىرعىزستاننىڭ وش وبلىسىندا پرەزيدەنتتىككە ۇمىتكەر ومىربەك بابانوۆتىڭ جاقتاستارىنا قىسىم كورسەتىلۋدە – دەپ حابارلايدى centre1.com اقپارات كوزى.

اقپارات كوزىنىڭ مالىمەتىنشە، وش وبلىسىنداعى ومىربەك بابانوۆتىڭ جاقتاستارىنا جەرگىلىكتى قۇقىق قورعاۋ ورگاندارى مەن قىلمىس الەمىنىڭ وكىلدەرى قىسىم كورسەتۋدە. پوليتسيا قىزمەتكەرلەرى وش قالاسىنداعى بابانوۆ سايلاۋ شتابىنىڭ قىزمەتكەرلەرىنىڭ اتى-ءجونىن ءبىلىپ الىپ، ولارعا جۇمىس ورىندارىنىڭ باسشىلارى ارقىلى قىسىم كورسەتكەن. ال ستۋدەنتتەردى «بابانوۆپەن كەزدەسۋگە بارسا وقۋدان شىعارامىز» دەپ قورقىتقان.

وسىدان بىرنەشە كۇن بۇرىن بابانوۆ وش وبلىسىنا ءوزىنىڭ «العا باستار جول» اتتى پرەزيدەنتتىك باعدارلاماسىن تانىستىرۋعا بارعان. ول وش حالقىنىڭ الدىندا سويلەگەن سوزىندە پرەزيدەنت بولىپ سايلانسا ەل بويىنشا جالاقىنى ەكى ەسەگە كوبەيتەتىنىن، جەمقورلىقپەن كۇرەسەتىنىن جانە كورشى مەملەكەتتەرمەن جاقسى قارىم-قاتىناس ورناتاتىنىن ايتقان.

قازىرگى تاڭدا ومىربەك بابانوۆ قىرعىزستانداعى پرەزيدەنت سايلاۋىندا قازىرگى ەل پرەزيدەنتى المازبەك اتامباەۆتىڭ پارتيالاسى سوورونباي جەەنبەكوۆتىڭ باستى قارسىلاستارىنىڭ ءبىرى. كوپتەگەن ساراپشىلاردىڭ سوزىنشە، بابانوۆتىڭ 15 قازاندا وتەتىن پرەزيدەنت سايلاۋىندا جەڭىسكە جەتۋگە بارلىق مۇمكىندىكتەرى بار. ونىڭ قارجى رەسۋرسى مەن ساياسي باعدارلاماسى بۇل جولعى سايلاۋدا وزگە كانديداتتارمەن سالىستىرعاندا جوعارى تۇر.

ەستەرىڭىزگە سالا كەتەيىك، ءدال وسى ومىربەك بابانوۆ الماتى قالاسىندا قازاقستان پرەزيدەنتى نۇرسۇلتان نازارباەۆپەن كەزدەسكەننەن كەيىن، قىرعىزستان بيلىگى قازاقستانعا قارسىلىق نوتاسىن جىبەرگەن بولاتىن. جىبەرگەن نوتا بويىنشا رەسمي بىشكەك نۇرسۇلتان نازارباەۆتىڭ ومىربەك بابانوۆپەن كەزدەسۋىن «قىرعىزستاننىڭ ىشكى ىستەرىنە ارالاسۋ» دەپ باعالاعان. كەيىننەن قازاقستان ءسىم قىرعىزستان بيىلىگىنىڭ بۇل كەزدەسۋگە وسىنداي دارەجەدە نارازىلىق ءبىلدىرۋىن تۇسىنبەيتىنىن ايتىپ، جاۋاپ نوتاسىن جىبەرگەن بولاتىن.

“The Qazaq Times”