پەتەربور پوليتسياسى ميانما مۇسىلماندارىن قولداعان ەرەۋىلشىلەردى كۇشپەن تاراتتى

قىركۇيەكتىڭ 10-ى كۇنى رەسەيدىڭ پەتەربور قالاسىندا ميانما مۇسىلماندارىن قولداپ شەرۋگە شىققان ادامداردى پوليتسيا كۇشپەن تاراتتى، دەپ حابارلايدى نەمىس تولقىنى اقپارات كوزى.

جەرگىلىكتى باق وكىلدەرىنىڭ مالىمەتىنشە، ەرەۋىلشىلەر پەتەربور قالاسىنىڭ ورتالىعىنداعى ساراي الاڭىنا جينالعان. پوليتسيا قىزمەتكەرلەرى زاڭسىز شەرۋگە قاتىسۋشىلاردى تاراتۋ بارىسىندا جۇزدەن استام ادامدى ۇستاپ، ولاردىڭ ۇستىنەن اكىمشىلىك حاتتاما تولتىرعان.

بۇعان دەيىن گروزنىي، ماسكەۋ، ماحاچكالا قالالارىندا وتكەن شەرۋلەردەن كەيىن رف ۇلتارالىق قارىم-قاتىناس كوميتەتى رەسەيدىڭ باسىم كوپشىلىگى يسلام ءدىنىن ۇستاناتىن ازاماتتار تۇراتىن ايماقتاعى ءدىني ۇيىمداردىڭ باسشىلارىمەن كەزدەسۋلەر وتكىزگەن.

ەستەرىڭىزگە سالايىق، ميانماداعى مۇسىلمانداردىڭ بۋدديستەردەن قىسىم كورۋى رەسەيدە ءتۇرلى تولقۋلارعا الىپ كەلگەن بولاتىن. ءبىر گروزنىيدىڭ وزىندە ورتالىق الاڭعا قىركۇيەكتىڭ 4-ءى كۇنى ميلليوننان استام ادام جينالعان. ال رف استاناسى ماسكەۋدە مىڭداعان ادام ەل بيلىگىنە ميانماعا بايلانىستى قاندايدا ءبىر شارا قولدانۋدى تالاپ ەتىپ، ەرەۋىلگە شىققان.

قىركۇيەكتىڭ تورتىنەن بەرى شەرۋلەردىڭ تولاستاماۋىنا بايلانىستى شەشەنستان پرەزيدەنتى رامزان كادىروۆ ءوزىنىڭ Instagram پاراقشاسىندا ميانما مۇسىلماندارىن شەرۋمەن ەمەس گۋمانيتارلىق كومەكپەن قولداۋ كەرەكتىگىن ايتىپ، رەسەي مۇسىلماندارىن ەرەۋىل ۇيىمداستىرماۋعا شاقىرعان.

“The Qazaq Times”