تۇرعىن ءۇي قۇرىلىس جيناق بانكى كليەنتتەرى ۇلەسكەر بولا الادى

تۇرعىن ءۇي قۇرىلىس جيناق بانكىنىڭ سالىمشىلارى استانادا «Millenium Park-2» (14-بلوك، 2-تاڭبا) تۇرعىن ءۇي كەشەنىندەگى سالىنىپ جاتقان پاتەرلەردى ساتىپ الۋشىلاردىڭ پۋلىنا قاتىسۋ ءۇشىن ءوتىنىش بەرە الادى، دەپ حابارلايدى بانكتىڭ ءباسپاسوز قىزمەتى. 

كەشەن استاناداعى تاۋەلسىزدىك الاڭىنىڭ ماڭىندا «ءوز ءۇيىم» باعدارلاماسىنىڭ بويىنشا سالىنىپ جاتىر. قۇرىلىس 2018 جىلى اقپان ايىنىڭ سوڭىندا اياقتالادى دەپ جوسپارلانعان. ال قازىر بانك كليەنتتەرى ۇلەسكەرلىك قۇرىلىس قاتىسۋشىسى اتانىپ، تۇڭعىش رەت بولاشاق پاتەردى كەپىل رەتىندە پايدالانا وتىرىپ نەسيە رەسىمدەي الادى.

ۇلەسكەرلىك جوباعا قاتىسۋ قاۋىپسىزدىگىن تۇرعىن ءۇي قۇرىلىسىن كەپىلدەندىرۋ قورى («بايتەرەك» حولدينگىنىڭ ەنشىلەس ۇيىمى) قامتاماسىز ەتەدى. ۇيىم قۇرىلىس جۇرگىزۋشىلەرمەن قاجەت كەلىسىم-شارت بەكىتتى. كەپىل جاعدايى تۋىنداسا، ياعني قۇرىلىس يەسى بانكروتقا ۇشىراسا، اقشا ماقساتسىز جۇمسالسا، پايدالانۋعا بەرۋ مەرزىمى ساقتالماسا، كەپىلدەندىرۋ قورى قۇرىلىستى اياقتايدى.

«Millenium Park-2» (14-بلوك، 2-تاڭبا) تۇرعىن ءۇي كەشەنىندەگى پاتەرلەر نەگىزگى دايارلىعى اياقتالعان تۇردە بولادى جانە جايلىلىقتىڭ 4-كلاسىنا ساي كەلەدى. بارلىعى بانك كليەنتتەرىنە 100 پاتەر ءبولىنىپ وتىر. 1 شارشى مەترىنىڭ باعاسى 290 000 تەڭگەنى قۇرايدى. بۇل – تۇقجب سالىمشىلارىنا ارنالعان ارنايى باعا، اتالعان پاتەرلەردىڭ نارىقتاعى قۇنى بۇدان الدەقايدا جوعارى.

پاتەر ساتىپ الۋ پۋلىنا قاتىسۋ تۋرالى ءوتىنىشتى 2017 جىلدىڭ 27 قىركۇيەگىنە دەيىن بەرۋگە بولادى. ول ءۇشىن تۇقجب ينتەرنەت-رەسۋرسىنداعى «جەكە كابينەت/ينتەرنەت-بانكينگ» بولىمىنە كىرۋ قاجەت. ءوتىنىش بەرگەن كەزدە سالىمشىنىڭ شوتىندا كەم دەگەندە 500 000 تەڭگە بولۋى ءتيىس. بانك كليەنتى پاتەر ساتىپ الۋ پۋلىنا كىرىپ جاتسا، تولەم قابىلەتتىلىگىن راستاۋ ساتىندە ونىڭ دەپوزيتىندە ءۇي باعاسىنىڭ 50%-ى بولۋى كەرەك. جەتپەيتىن سومانى بانك جىلدىق مولشەرلەمەسى 3,5-5% بولاتىن تۇرعىن ءۇي زاەمى نەمەسە جىلدىق مولشەرلەمەسى 7,5-8,5% بولاتىن ارالىق زاەم تۇرىندە بەرەدى.

“The Qazaq Times”