اۋعانىستاندا تاۋەلسىزدىك مەرەكەسى كەزىندە قاۋىپسىزدىك كۇشەيتىلدى

اۋعانىستاندا تاۋەلسىزدىك مەرەكەسى كەزىندە قاۋىپسىزدىك كۇشەيتىلدى. بۇل تۋرالى كابۋلداعى پوليتسيا قىزمەتىنىڭ ءباسپاسوز حاتشىسى ابدۋل باسير مۋحجاحيد APF اقپاراتتىق اگەنتتىگىنە بەرگەن سۇحباتى كەزىندە حابارلادى.

اۋعانىستان سوعىس جاعدايىندا بولۋىنا بايلانىستى بىرنەشە جىلدان بەرى تاۋەلسىزدىك كۇنىنە وراي كولەمدى شارالار مەن جالپىحالىقتىق تويلاۋ ۇيىمداستىرىلمايدى. دەگەنمەن اۋعانىستان پرەزيدەنتى ءوزىنىڭ جۇمىس كابينەتىندە بىرقاتار رەسمي تۇلعالاردى قابىلدايدى جانە بۇگىن كەشكە سايد ەسىمدى اۋعاندىق ءانشى جەكە ءان كەشىن بەرەدى.

ەل استاناسى كابۋلدا پوليتسيا قىزمەتى ادەتتەگىدەن ەرەكشە كۇشەيتىلىپ وتىر. بۇل سوڭعى كەزدەرى اۋعانىستاندا جيىلەگەن جارىلىستارمەن بايلانىستى. تاليباندىقتاردىڭ كۇش الا باستاۋى، اۋعانىستان اسكەرىنىڭ اقش-تىڭ توقتاۋسىز قولداۋىنا قاراماستان، تەرروريستەردى ءالى كۇنگە جەڭە الماعاندىعى جەرگىلىكتى حالىقتىڭ ءتوزىمىن تاۋىسىپ، سەنىمىن السىرەتە باستادى.

اۋعانىستانداعى بىرنەشە جىلدان بەرى توقتاۋسىز ءجۇرىپ كەلە جاتقان سوعىستار جەرگىلىكتى حالىقتى تاۋەلسىزدىك مەرەكەسىن تويلاۋعا دەگەن قۇلشىنىسىنان ايىرعان. اۋعانىستاندىق ءبىر ازامات ءوزىنىڭ Facebook پارپاقشاسىندا: ء"بىز تەرروريزممەن سوعىسىپ جاتىرمىز جانە جەڭىستىڭ جاقىنداعانى بايقالمايدى. مۇنداي جاعدايدا قالاي تاۋەلسىزدىك كۇنىن تويلاۋعا بولادى؟", - دەپ جازدى.

“The Qazaq Times”