الماتى اكىمدىگى جاۋىنعا ارنالعان كاناليزاتسيالار قۇرىلىسىنا قارجى بولەتىن بولدى

الماتى قالاسىن اباتتاندىرۋعا 593,4 ملن تەڭگە جۇمسالادى. ارىق جەلىلەرىن جاقسارتۋعا باسا نازار اۋدارىلىپ، 5,9 كم ارىق جەلىسى مەن جاۋىندى كاناليزاتسيا قۇرىلىسىنا 243,8 ملن تەڭگە قاراستىرىلعان. بۇل تۋرالى قالا اكىمدىگىنىڭ ءباسپاسوز قىزمەتى حابارلادى.

سونداي-اق، «اجك» اق سىرتقى جارىق كوزدەرىن قامتاماسىز ەتۋگە 100 ملن تەڭگە بولىنەدى. قالانىڭ ماگيسترالدى كوشەلەرىندەگى 5 جەر استى وتپەلى جولدار جوندەلەدى.

اكىمدىكتىڭ مالىمەتىنشە، بيىل بيۋدجەتتى ناقتىلاۋ بارىسىندا 43,2 مىڭ جاڭا جۇمىس ورنىن قۇرۋ قاراستىرىلعان.

جالپى، الماتى اكىمدىگى قالا تۇرعىندارى مەن قوناقتارى ءۇشىن جايلىلىق جۇمىستارىن ودان ءارى جالعاستىرادى. بيىل جول ايرىقتارىن، قۇرىلىس نىساندارىن، ۋنيۆەرسيادا وبەكتىلەرىن، الەۋمەتتىك نىسانداردى سالۋ مەن اشۋ شارالارىن وڭتايلاندىرۋ، ءتۇرى قۇرىلىس جۇمىستارىنا مەملەكەتتىك-جەكەمەنشىك ارىپتەستىكتى ء(مجا) كەڭىنەن تارتۋ، مەملەكەتتىك ساتىپ الۋ شارالارىن ۇنەمدەۋ بارىسىندا تۇسكەن قارجى قالا ەكونوميكاسىن ارتتىرۋعا جۇمسالدى.

"قالادا تۇرعىندار ءۇشىن بارلىق جاعدايلار جاسالۋدا،پاركتەر مەن سكۆەرلەر اباتتاندىرىلۋدا، جاياۋ جۇرگىنشى جانە ۆەلوجولدار جاسالىپ، قورشاۋلار الىنۋدا، قوعامدىق كەڭىستىك كەڭەيۋدە", - دەلىنگەن ءباسپاسوز حابارلاماسىندا.

سونداي-اق، 146 كم جول جوندەلەدى، 97 مىڭ شارشى مەتر تروتۋار اباتتاندىرىلادى، ۇزىندىعى 15 كم جول جانە 57 كوشەدەگى 42 كم ارىق جەلىسى قايتا جاسالادى، 32 كم جىلۋ جۇيەسى جاڭعىرتىلادى. 20 مىڭ ۇيگە 380 كم سۋ قۇبىرى مەن كارىز جەلىسى تارتىلۋدا، فۋرمانوۆ، اباي كوشەلەرى ۇڭگىلەنىپ، ءۇش جول ايرىعىنىڭ قۇرىلىسى مەن جاڭا اۋدانداداعى جولدار جاسالۋدا.

2015 جىلعى سەل زارداپتارىن جويۋ ءۇشىن قارعالى وزەنىنىڭ ارناسى قايتا جاسالدى، جاعالاۋلار مىقتى بەكىتىلدى،اۋدان تۇرىندارى ءۇشىن جاڭا دەمالىس ورىندارى اشىلدى.

تامىز ايىنىڭ سوڭىنا دەيىن مەملەكەتتىك تابىستار باسقارماسىنىڭ، سوت، پروكۋراتۋرا، قازپوشتا،بانك، زەينەتاقى تولەۋ ورتالىعى، تاۋلىگىنە مىڭ ادامعا قىزمەت كورسەتەتىن حقكو-نىڭ عيماراتى پايدالانۋعا بەرىلەدى. «نۇرلى جەر» باعدارلاماسى بويىنشا 1,5 مىڭ پاتەرلى 21 تۇرعىن ءۇيدىڭ قۇرىلىسى باستالادى. بيىلعى جىلدىڭ قىركۇيەك ايىندا 4967 تۇرعىن ءۇي پايدالانۋعا بەرىلەدى.

دەسەك تە، بۇل اباتتاندىرۋ قالا تۇرعىندارىنىڭ اشۋىنا ءتيىپ جاتقانى وتىرىك ەمەس. بار ءىستى بىردەن باستاعان اكىمدىكتىڭ بۇل ارەكەتى قالا كوشەلەرىندەگى كەپتەلىستەن باستاپ، كەيبىر جول كولىك وقيعالارىنا سەبەپ بولىپ وتىرعانى بەلگىلى. بۇدان بولەك، ۋنيۆەرسيتەتتەر، مەكتەپتەر، بالاباقشا جانىنداعى قورشاۋلاردى الىپ تاستاۋ سالدارىنان قالا ماڭىنداعى قاۋىپسىزدىك شارالارى ەسكەرىلمەي قالعانداي.

 “The Qazaq Times”