كەنيادا وتكەن پرەزيدەنتتىك سايلاۋ قورىتىندىلارى قولدان جاسالعان دەگەن ايىپتاۋلار جاۋدىرعان وپووزيتسيا تاراپىنىڭ نارازىلىعى قاۋىپسىزدىك قىزمەتكەرلەرمەن قاقتىعىسقا اكەلىپ، ناتيجەسىندە 5 ادام كوز جۇمدى. بۇل تۋرالى ءال-جازيرا تەلەارناسى اقپاراتتىق اگەنتتىگى جازدى. 

نايروبي قالاسىنداعى جەرگىلىكتى پوليتسيا قىزمەتكەرى دجافەت كوەمنىڭ مالىمەتىنشە، ەل استاناسىندا ەكى ادام قازا تاپقان. وڭىرلىك پوليتسيا باسشىسى لونارد كاتانا ءدال سول كۇنى نايروبيدەن 300 كم قاشىقتىقتا ورىن العان قاۋىپسىزدىك قىزمەتكەرلەرىمەن قاقتىعىس كەزىندە تاعى ءبىر تۇرعىن كوز جۇمعانىن ايتتى. تانا وزەنىنىڭ وڭتۇستىك-شىعىس بولىگىندە پىشاقپەن قارۋلانعان 5 ادام سايلاۋ قورىتىندىلارىن ەسەپتەيتىن بيۋرولاردىڭ بىرىنە شابۋىل جاساپ، ولاردىڭ ەكەۋى وقيعا ورنىندا جان تاپسىرعان. لەونارد كاتانا بولعان وقيعانىڭ ساياسي استارى بارىن نە بۇل قىلمىستىق ءىس بولعانىن اجىراتا الماي وتىرعانىن جەتكىزدى.

سايلاۋدان بۇرىن، بارلىق بەلگىلى اقپاراتتىق اگەنتتىكتەر كەنيادا قاندى قاقتىعىستار ورىن الىپ كەتۋى مۇمكىن دەگەن بولجامدار جاساپ، قاۋىپتەنگەن بولاتىن. كۇتىلگەن قاۋىپ راستالىپ، پرەزيدەنتتىك سايلاۋعا تۇسكەن وسىعان دەيىنگى مەملەكەت باسشىسى ۋحۋرۋ كەنياتتا مەن 72-جاستاعى بۇرىنعى ساياسي تۇتقىن رەيل ودينگانىڭ باسەكەسى نارازىلىق اكتسيالارىمەن اياقتالدى. وعان سەبەپ،  سايلاۋ كوميسسياسىنىڭ سايتىندا سارسەنبى كۇنى جاريالانعان ناتيجەلەرگە سايكەس، ۋحۋرۋ كەنياتتا 54,4 پايىز، ال رەيل ودينگا 48,8 پايىز داۋىسقا يە بولعان. رەيل ودينگا باستاعان وپپوزيتسيا بۇل ناتيجەلەرمەن كەلىسپەي،  جۋرناليستەرمەن بولعان ءباسپاسوز كونفەرەنتسياسىندا: "جاريالاۋعا بولمايتىن اقپارات كوزدەرىنەن الىنعان دەرەكتەرگە سەنسەك، سايلاۋ كوميسسياسىنىڭ ەلەكتروندى جۇيەسىندەگى دەرەكتەرگە حاكەرلەردىڭ كومەگىمەن وزگەرتىلگەنى بەلگىلى بولدى", -  دەپ مالىمدەدى. وپپوزيتسيا جاقتاۋشىلارى ەل ىشىندە قارسىلىق قوزعالىستارىن ۇيىمداستىرىپ جاتىر. 2013 جىلى وتكەن سايلاۋ كەزىندە دە، رەيل ودينگا ۋحۋرۋ كەنياتتادان جەڭىلىپ، ونى سوتقا بەرگەن بولاتىن. دەگەنمەن سوت شەشىمى بويىنشا، ونىڭ شاعىمى نەگىزگە الىنباي، كەنياتتا پرەزيدەنت بولىپ سايلانعان ەدى. وسى جولى رەيل ودينگا تاع دا جەڭىلىس تاپسا، وقيعانىڭ نەمەن اياقتالارى بەلگىسىز...

“The Qazaq Times”