فوتو: Atameken Business Channel

قازاقستان رەسپۋبليكاسىنىڭ ۇلتتىق بانكى قازاقستان
رەسپۋبليكاسى بانك سەكتورىنىڭ قارجىلىق ورنىقتىلىعىن ارتتىرۋ باعدارلاماسىن قابىلدادى. بۇل تۋرالى باس بانكىتىڭ ءباسپاسوز قىزمەتى حابارلادى.

باعدارلاما بانك سەكتورىنىڭ قارجىلىق ورنىقتىلىعىن قامتاماسىز ەتۋ بويىنشا ءۇش باعىتتى كوزدەيدى:

  • قاداعالاۋعا دەن قويۋدىڭ ساپاسىن جانە جەدەلدىگىن ارتتىرۋ ءۇشىن رەتتەۋ
    جانە قاداعالاۋ ورتاسىن وزگەرتۋ;
  • جۇيە قۇراۋشى بانكتىڭ قارجىلىق ورنىقتىلىعىن
    ارتتىرۋ;
  • ءىرى بانكتەردىڭ قارجىلىق ورنىقتىلىعىن ارتتىرۋ.

"باعدارلاما مەملەكەت قاراجاتىنىڭ اقىلىلىعى، مەرزىمدىلىگى جانە قايتارىمدىلىعى قاعيداتتارى بويىنشا ىسكە اسىرىلادى. باعدارلامادا اكتسيونەرلەردىڭ بانكتەردى قوسىمشا كاپيتالداندىرۋ جونىندەگى ورتاق
جاۋاپكەرشىلىگى كوزدەلەدى. باعدارلاما شەڭبەرىندە بانكتەردىڭ اكتسيونەرلەرى بانكتى قوسىمشا كاپيتالداندىرۋ جانە اكتيۆتەردىڭ ساپاسىن جاقسارتۋ جونىندە شارالار قابىلداۋعا ءتيىس، بۇل باعدارلاماعا قاتىسۋدىڭ مىندەتتى تالابى بولىپ تابىلادى", - دەلىنگەن ءباسپاسوز حابارلاماسىندا.

رەتتەۋشى بانكتى مالىمەتىنشە، بانكتەردىڭ قارجىلىق ورنىقتىلىعىن ارتتىرۋ جونىندەگى شارالار 5 جىل ىشىندە بانكتەردىڭ بالانستارىن پروبلەمالىق بەرەشەكتەن تازارتۋعا (كاپيتالداندىرۋدى ەسەپتەن شىعارۋدى، كەشىرۋدى جانە اكتيۆتەردىڭ ساپاسىن جاقسارتۋ بويىنشا باسقا شارالاردى قامتاماسىز ەتۋ ەسەبىنەن), بانك سەكتورىنىڭ جيىنتىق مەنشىكتى كاپيتالىن ۇلعايتۋعا اكەلەدى، بۇل بانكتەردىڭ ەكونوميكانىڭ ناقتى سەكتورىن كرەديتتەۋىنە قولداۋ كورسەتەدى", - دەلىنگەن حابارلامادا.

ايتا كەتەيىك، وسىعان دەيىن دە ۇلتتىق بانك توراعاسى دانيار اقىشەۆ وسى جىلدىڭ سوڭىنا دەيىن بانك سەكتورىن ساۋىقتىرۋ اياسىندا بانكتەرگە قارجى بەرىلەتىنىن مالىمدەگەن. ال جوعارىداعى باعدارلاما جۇزەگە اسار بولسا ەكىنشى دەڭگەيلى بانكتەر "الما ءپىس، اۋزىما ءتۇس" دەپ مەملەكەت قارجىسىنا "ماسىل" بولۋدى ۇيرەنشىكتى ادەتكە اينالدارادى دەگەن ءسوز.

“The Qazaq Times”