ازەربايجاننىڭ حالىقارالىق بانكىنە سالىنعان قازاقستاندىقتاردىڭ زەينەتاقى قارجىسى سول ەلدىڭ ۇكىمەتتىك قارىزى رەتىندە كونۆەرتاتسيالانۋى مۇمكىن. قازاقستان الداعى ۋاقىتتا ءاحب مىندەتتەرىن قايتا قۇرىلىمداۋ كەزىندە وسى پوزيتسيانى نەگىزگە الادى. بۇل تۋرالى بۇگىن استانادا ءوتىپ جاتقان ەكونوميكالىق فورۋمى اياسىندا بجزق ديرەكتورلار كەڭەسىنىڭ مۇشەسى، "استانا" حالىقارالىق قارجى ورتالىعىنىڭ توراعاسى قايرات كەلىمبەتوۆ مالىمدەدى.
ونىڭ سوزىنشە، ءاحب قارىزىن قايتا قۇرىلىمداۋ پروتسەسى بويىنشا داۋىس بەرۋ جۇمىستارى بۇگىن-ەرتەڭ باستالادى.
«قازاقستان ازەربايجان تاراپىنان ۇسىنىلعان ەكىنشى نۇسقانى پايدالانادى دەپ ويلايمىن. ەكىنشى نۇسقا بويىنشا، بانكتىڭ وبليگاتسيالارىنا سالىنعان زەينەتاقى قارجىسى ازەربايجان بانكىنىڭ وبليگاتسيالارىنا اۋىسادى، ياعني جىلدىڭ 3,5%-بەن 15 جىلدا قايتارىلادى", - دەدى كەلىمبەتوۆ.
سونداي-اق، كەلىمبەتوۆ كەلىسسوزدەر كەزىندە نەگىزگى قارىز كولەمىن قىسقارتۋ بولمايتىنىن اتاپ ءوتتى. "قوعامداعى الاڭداۋشىلىق سەيىلەدى دەپ ويلايمىن، ويتكەنى بارلىق قارجى تولىق كولەمدە قايتارىلادى", - دەدى ول.
ايتا كەتەيىك، مامىر ايىندا قازاقستاندىق ەكونوميستەر تاراپىنان ازەربايجان حالىقارالىق بانكىنە زەينەتاقى قورىنىڭ 71,3 ملرد تەڭگەسى ينۆەستيتسيالانعانى تۋرالى اقپارات تاراعان ەدى. وسىدان كەيىن 23 مامىر كۇنى ازەربايجان بانكى كرەديتورلار الدىنداعى بورىشتى قۇرىلىمداۋدىڭ ءۇش نۇسقاسىن ۇسىنعان. ولار ۇسىنعان ءۇش نۇسقا تومەندەگىدەي:
- ءبىرىنشىسى - ءاحب-ءتىڭ 250 ملن دوللار قارىزىن ءازىربايجان رەسپۋبليكاسىنىڭ مەملەكەتتىك قۇندى قاعازدارى تۇرىندە 200 ملن اقش دوللار ەتىپ، 12 جىلدا 5,125 پايىز مولشەرلەمەمەن قايتارۋ.
- ەكىنشىسى - 250 ملن دوللار قارىزدى ءازىربايجان رەسپۋبليكاسىنىڭ مەملەكەتتىك قۇندى قاعازدارى رەتىندە 15 جىلدا 3,5 پايىزدىق مولشەرلەمەمەن قايتارۋ.
- ءۇشىنشىسى - 250 ملن اقش دوللارىن ءازىربايجان رەسپۋبليكاسىنىڭ مەملەكەتتىك قۇندى قاعازدارى رەتىندە 7 جىلدا 3,5 پايىزدىق ۇستەمەمەن 250 ملن اقش دوللار ەتىپ قايتارۋ.
ال ۇلتتىق بانك توراعاسى دانيار اقىشەۆ بولسا ازەربايجان حالىقارالىق بانكىنە ينۆەستيتسيالانعان 71,3 ملد تەڭگەگە قاتىستى جاعدايدى "بۇل قارجىنى پروبلەمالى بانككە ۇلتتىق بانكتىڭ بۇرىنعى قىزمەتكەرلەرى ينۆەستيتسيالاعان" دەپ ءتۇسىندىردى.
استانادا قالعان جاڭاوزەندىك جۇمىسسىزدار "قازمۇنايگاز" كەلىسسوزدى توقتاتىپ تاستادى دەيدى
فبر پەنتاگوننىڭ قۇپيا قۇجاتتارىنىڭ جاريالانۋىنا قاتىسى بار كۇدىكتىنى قامادى
بىشكەكتە كاسىپكەرلەر جاڭا سالىق ەرەجەلەرىنە قارسى اكتسيا وتكىزدى
موڭعوليا استاناسىندا جاپپاي نارازىلىق شەرۋلەرى ءوتتى
ەكىباستۇزدا جىلۋ جەلىسىندەگى اقاۋعا "ستانتسيا قىزمەتكەرىنىڭ قاتەلىگى" سەبەپ بولعانى ايتىلدى