حالىقارالىق قۇقىق قورعاۋ ۇيىمى: ءامين ەلەۋسىنوۆتىڭ سوتتالۋىندا ساياسي استار بار

Human Rights Watch حالىقارالىق قۇقىق قورعاۋ ۇيىمى اقتاۋداعى مۇنايشىلار كاسىپوداعىنىڭ باسشىسى ءامين ەلەۋسىنوۆتىڭ سوتتالۋىنا قارسى.

Human Rights Watch قۇقىق قورعاۋ ۇيىمىنىڭ ورتالىق ازيا ەلدەرى بويىنشا ساراپشىسى ميرا ريتتمان «ەلەۋسىنوۆتىڭ ەكى جىل باس بوستاندىعىنان ايىرىلۋىنىڭ ساياسي استارى بار. كاسىپوداق جىيىندارىن وتكىزۋگە كەدەرگى جاساۋ، وداق باسشىلارىن تۇرمەگە توعىتۋ، مۇنىڭ بارلىعى ادام قۇقىعىن شەكتەۋ ەكەندىگىن قازاقستان بيلىگى ءبىلۋى ءتيىس.  امين ەلەۋسىنوۆ قازاقستاندا سوڭعى ەكى ايدا سوتتالىپ وتىرعان ەكىنشى كاسىپوداق باسشىسى. بۇعان دەيىن نۇربەك قۇشاقباەۆ ەكى جارىم جىلعا سوتتالعان بولاتىن. ەلەۋسىنوۆ پەن قۇشاقباەۆتىڭ كىناسىز، ولاردىڭ بار جازىعى قاراپايىم جۇمىسشىلاردىڭ ءسوزىن سويلەگەندەرىندە.» دەدى جۋرناليستەر الدىندا سويلەگەن سوزىندە.

بۇدان بولەك ەلەۋسىنوۆتىڭ سوتتالۋىنا  حالىقارالىق كاسىپوداقتار كونفەدەراتسياسىدا ءوزىنىڭ الاڭداۋشىلىعىن بىلدىرگەن.

16 مامىر كۇنى كاسىپوداق باسشىسى ءامين ەلەۋسىنوۆتى استانا قالاسىنىڭ الماتى اۋداندىق سوتى كاسىپوداق قارجىسىن جىمقىردى دەگەن ايىپپەن ەكى جىلعا باس بوستاندىعىنان ايىرعان.

ەستەرىڭىزگە سالايىق 2017 جىلدىڭ قاڭتار ايىندا ءامين ەلەۋسىنوۆ پەن نۇربەك قۇشاقباەۆتىڭ ۇيىمداستىرۋىمەن اقتاۋدا «قازاقستاننىڭ تاۋەلسىز كاسىپوداقتار كونفەدەراتسياسىنىڭ» جابىلۋىنا قارسى مۇنايشىلار اشتىق جاريالاعان. وسىعان بايلانىستى 20 قاڭتاردا ەلەۋسىنوۆ پەن قۇشاقباەۆ اقتاۋ قالاسىندا تۇتقىندالىپ، استانا قالاسىنا جەتكىزىلگەن. كەيىنەن ولارعا كاسىپوداق قارجىسىن جىمقىردى دەگەن ايىپ تاعىلىپ، قاماۋعا الىنعان بولاتىن.

“The Qazaq Times”