الەمدەگى بارشا دامىعان حالىقتار سياقتى قازاقتىڭ دا دامۋعا، ىلگەرلەۋگە قاقىسى دا، مۇمكىندىگى دە بار. ادامزات بالاسى عاسىرلار بويى ءبىر-بىرىمەن تاجىريبە الماسىپ، سەلبەسىپ ءومىر ءسۇرىپ كەلەدى. وسى جولدا ءبىرىنىڭ جاقسىسىن ءبىرى الادى. بۇكىل الەمگە ۇلگى بولاتىن دارا ۇلت جوق. الەمدىك قاۋىمداستىق وسىنداي بىرلىگىمەن كۇشتى. ەندى ەگەمەندىك الىپ جاتقان قازاق بالاسى دا وزگەلەر جەتكەن مەجەگە جەتەر. وزگەلەر باعىندىرعان بيىكتەردى الار. وركەنيەتتى دۇنيەنىڭ ەسىگى قازاققا دا، اعىلشىنعا دا اشىق. قازاق سوعان وزگە ۇلتتىڭ بەتپەردەسىن جامىلىپ، ءسوزىن سويلەپ ەمەس، ءوزىنىڭ بولمىسىمەن-اق ەنە الادى. قازاق ءوزىنىڭ ۇلتتىق الەۋەتىن تاۋىسپاعان، مورالدىك-ەتيكالىق ەرەكشە بولمىسىن ساقتاپ وتىرعان، بەرگەنىنەن بەرەرى كوپ دارىندى حالىق.

«The Qazaq Times»