باتىس پەن رەسەي قارىم-قاتىناسىنىڭ قازىرگى جاعدايىنا بايلانىستى ەۋروپا وداعى رەسەيلىك ەنەرگەتيكاعا تاۋەلدىلىگىن قىسقارتۋدىڭ بارلىق مۇمكىندىكتەرىن قاراستىرۋدا. سوڭعى شەشىمگە بايلانىستى ەۋروپا كوميسسياسى گاز تۇتىنۋدى 15 پايىزعا دەيىن قىسقارتۋ تۋرالى جوسپاردى قابىلدادى.

چەحيا كەزەكتى توراعالىق ەتۋشى ەل رەتىندە ەو كوميسسياسىنىڭ ەنەرگيا قولدانۋدى ۇنەمدەۋ بويىنشا شەشىمىن بەكىتتى. جوبا وداققا مۇشە ەلدەردىڭ گاز قولدانۋ مولشەرىن 15 پايىزعا دەيىن قىسقارتۋدى كوزدەيدى. بۇل ەۋروپانىڭ رەسەي گازىن تۇتىنۋ مولشەرىن ايتارلىقتاي تومەندەتۋى مۇمكىن.

قازىرگى رەسەي مەن باتىس قارىم-قاتىناسىنا بايلانىستى تابيعي گاز ماسكەۋدىڭ سالماقتى ساياسي قارۋلارىنىڭ بىرىنە اينالدى. ءبىر اي بۇرىن رەسەيلىك گازپروم كومپانياسى تەحنيكالىق اقاۋلارعا بايلانىستى ەۋروپاعا تابيعي گاز تاسىمالداۋشى «سولتۇستىك اعىم» گاز قۇبىرىندا جونەلتىلىپ جاتقان گازدىڭ 60 پايىزىن قىسقارتىپ تاستاعان ەدى.

كەشە عانا كرەملدىڭ ءباسپاسوز وكىلى پەسكوۆ بۇنىڭ باستى سەبەبى تەحنيكالىق اقاۋلار ەكەنىن، ساياسي شەشىم ەمەس ەكەنىن قايتالادى جانە تەحنيكالىق اقاۋلارعا باتىستىڭ سانكتسيالارى سەبەپ بولدى دەپ كورسەتتى.

رەسەيلىك كەيبىر ساراپشىلار قىس ايلارى جاقىنداعاندا رەسەي مەن ەۋروپا قارىم-قاتىناسى ماسكەۋدىڭ باسىمدىعىنا قاراي ويىسادى، سەبەبى ەۋروپا رەسەيدىڭ تابيعي گازىنا دەگەن تاۋەلدىلىگىن قىس ايلارىندا كوبىرەك سەزىنەتىنىن العا تارتادى. ەۋروپا وداعى دا ءدال وسى كەزدەگى گەوساياسي ويىندارداعى ءوز پوزيتسياسىن قورعاۋ ءۇشىن كەزەكتى شارانى قابىلداپ وتىرعانى بەلگىلى. قالاي بولماسىن، قىسقا قاراي گەوساياسي تارتىستار ءتىپتى دە قىزا تۇسەتىنى انىق بايقالادى.

The Qazaq Times