ەكس دەپۋتات: تىنىكەەۆكە ءارى قارنىم اشاتىن، ءارى جاقسى كورەتىنمىن

پارلامەنت ءماجىلىسىنىڭ دەپۋتاتى مۇحتار تىنىكەەۆ ارىز جازىپ، وكىلەتتىلىگىن توقتاۋدى سۇراعان. اقىرى، ارىپتەستەرىنىڭ داۋىس بەرۋى ارقاسىندا ول مەرزىمىنەن بۇرىن ماجىلىستەن كەتتى.

ونى بۇنداي كۇيگە جەتكىزگەن نە؟ ارينە، سەبەپ رەتىندە كوپكە جاريا بولعان «شاپالاقتاۋ ۆيدەوسى» ايتىلادى. بىراق، اياق استىنان نەگە وسىنداي ۇشىققا ىلىنە قالدى. ءبىز پارلامەنتتەگى بەلسەندى دەپۋتاتتىڭ سىر-سيپاتىن جاقسى بىلەدى-اۋ، ءارى ايتارىن ىرىكپەيتىن شىعار دەگەن ويمەن مۇحتار باكىرۇلىمەن بىرگە ءماجىلىس قابىرعاسىندا قىزمەت ەتكەن ەكس دەپۋتاتقا حابارلاستىق. الايدا، ول كىسى ءوز اتىن اتاماي-اق قويۋدى ءوتىنىپ، مىنانى ايتتى.

«مۇحتار باكىرۇلى وتكىر، حالىقتىڭ مۇڭىن، جۇرتتىڭ جوعىن ايتقاندا الدىنا جان سالمايتىن بەلسەندى دەپۋتات ەدى. سوسىن، قورقۋ دەگەندى بىلمەيتىن، اسىرەسە، كارىم ءماسىموۆ ۇكىمەت باسقارىپ تۇرعاندا، پرەمەر-مينيستردەن تارتىپ، ودان قۇلدايعى لاۋىزىمدىلارعا بەتىڭ-ءجۇزىڭ دەمەي شىندىقتى ايتىپ سالاتىن. «نە بولامىن-اۋ» دەپ، تايسالىپ، تارتىنبايتىن. سول كەزدە ونى قاتتى جاقسى كورىپ، سىيلايتىنمىن. سونىسىمەن دە، ارىپتەستەر اراسىندا ورنى بيىك ەدى.

ال، بىراق، تەك ورىسشا سويلەيتىن. ءتىپتى، «ءوزىم دە، بالام دا ورىسشا سويلەيدى» دەپ كەسىپ-ءپىشىپ ءبىر-اق ايتقانى بار ەدى. ءوزى مەيلى، بالاسىن دا باسقا تىلدە سويلەيدى دەپ، انا تىلىنە ولاي كەكىرەيە، مەنسىنبەي قاراۋ تىم تاكاپپارلىق قوي. قازاقتىڭ ءتىلىن، قازاقتىڭ مۇددەسىن قولداماسا، ول قالاي تاۋەلسىز قازاقستاننىڭ دەپۋتاتى، حالىق قالاۋلىسى بولماق؟ وسىعان كەلگەندە وعان قارنىم اشاتىن. مۇمكىن، تىم اسقاقتاپ كەتكەن ادام انا ءتىلدىڭ كارىنە جولىعۋى دا عاجاپ ەمەس. بالكىم، كەزىندە ۇكىمەتكە «ءتىسى باتقان» كەزدەرى ءوز باسىنا قايتا تاياق بولىپ تيگەن شىعار. قالاي دەسەك تە، قازىر قازاق جىگىتتەرىنىڭ باسىنا ۇلكەن قيىندىق تۋىپ تۇر عوي. شەتىنەن ۇستالىپ جاتىر. قازاق ازاماتتارىنا قازىر تەك، جۇدىرىقتاي جۇم بولىپ، بىرىگۋ عانا قالدى».

ويلانىپ قالدىق. راسىندا، سوڭعى كەزدەرى، باق سالاسىنداعى مىقتى ازاماتتاردى، بۇرىنعى جانە قازىرگى لاۋازىمدى قىزمەت اتقارعان تۇلعالاردى تارپا باسسالىپ، تۇرمەگە تىعۋ جيىلەپ كەتتى. اسىرەسە، نارتاي دۇتباەۆتى. ۇقك-نىڭ بۇرىنعى باسشىسىن، «مەملەكەتتىڭ قۇپياسىن جاريا ەتتى» دەپ ۇستاعان قازىرگى ۇقك-نىڭ «ۇر توقپاعى» دا وڭاي ەمەس ەكەنىن بايقاتقانداي. تاعى كىمدى توقپاقتايدى ەكەن، «ۇر توقپاق»...

اقتامبەردى اسپان

«The Qazaq Times»