اقتاۋ قالاسى. 4 قاڭتارعا قاراعان ءتۇن. فوتو; وڭعار قابدەننىڭ فب پاراقشاسىنان.

جاڭاوزەندەگى نارازىلىق بۇگىن ءۇشىنشى كۇنگە ۇلاستى. وبلىس ورتالىعى اقتاۋ مەن جاڭاوزەن قالاسىنىڭ ورتالىق الاڭدارىندا نارازىلىق كۇن-ءتۇن دەمەي جالعاسۋدا. دەنمونسترانتتاردىڭ اۋەلگى تالابى سۇيىلتىلعان گاز باعاسىنا قاتىستى بولعانىمەن، قازىر كورىپ وتىرعانىمىزداي، نارازىلىق ساياسي تالاپتاردى دا كوتەرە باستادى. 

 

الەۋمەتتىك جەلىلەردىڭ اڭىسىن اڭدار بولساڭىز، وڭىرلەردەگى، رەسمپۋبليكانىڭ ءار تۇكپىرىندەگى ازاماتتاردىڭ باسىم كوپشىلىگى جاڭاوزەن مەن اقتاۋداعى نارازىلىقتى قولداپ وتىرعانىن كورۋگە بولادى. كەشەگى 3 قاڭتاردا، جاڭاوزەندىكتەرگە قولداۋ كورسەتپەك بولعان ەل ورتالىعى مەن الماتىداعى، شىمكەنت پەن اقتوبەدەگى بەلسەندىلەر ۇستالدى، الاڭدارعا جىبەرىلمەي پوليتسيا بولىمشەلەرىنە اكەتىلدى. بۇنىڭ ءوزى بيلىكتىڭ ماڭىستاۋ وبلىسىندا باستالعان نارازىلىق شاراسىنان قانشالىقتى ۇرەيلەنىپ وتىرعانىن كورسەتكەندەي بولدى. رەسمي بيلىك نارازىلىقتىڭ تۇتاس رەسپۋبليكاعا جايىلىپ كەتۋىنەن الاڭدايدى.

ءسال عانا بۇرىن پرەزيدەنت توقتاەۆ ءوزىنىڭ الەۋمەتتىك پاراقشاسىندا ەكى بىردەي مالىمدەمە جاسادى. ونىڭ بىرىندە نارازىلارعا "ديالوگقا دايىن بول" دەپ نۇسقاسا، ەكىنشىسىندە ۇكىمەتتىك كوميسسيانىڭ جۇمىسقا كىرىسكەنى حابارلانعان. ياعني، ۇكىمەتتىك كوميسسيا اقتاۋدا جۇمىسقا كىرىسكەنى، ونىڭ قۇرامىندا پرەزيدەنت اكىمشىلىگىنىڭ قىزمەتكەرلەرى دە بار ەكەنى ايتىلعان. بۇعان قوسا: "رەسپۋبليكالىق وپەراتيۆتى شتاب تۇراقتى نەگىزدە جۇمىس ىستەپ جاتىر. كوميسسياعا ەلىمىزدەگى تۇراقتىلىقتى ساقتاي وتىرىپ، تۋىنداعان ماسەلە بويىنشا ءوزارا ءتيىمدى شەشىم شىعارۋ جۇكتەلگەن", – دەگەن پرەزيدەنت قاسىم-جومارت توقاەۆ "تۆيتتەر" پاراقشاسىندا.

نارازى توپقا ەسكەرتۋ ماعىناسىنداعى الدىنعى مالىمدەمەسىندە پرەزيدەنت: "قۇقىق قورعاۋ ورگاندارىنا قوعامدىق ءتارتىپتىڭ بۇزىلۋىنا جول بەرمەۋ جونىندە تاپسىرما بەرىلدى. دەمونسترانتتار جاۋاپكەرشىلىك تانىتىپ، ديالوگقا دايىن بولۋى ءتيىس", – دەلىنگەن.

فوتو: بەرىك ءۋاليدىڭ الەۋمەتتىك جەلىدەگى پاراقشاسىنان.

 

الەۋمەتتىك جەلىلەردە پرەزيدەنتتىڭ 3 قاڭتار تاڭعى 3:25-تە جاساعان مالىمدەمەسى ءتۇرلى تالقىعا تۇسكەنى بار. كەيبىرى، كەيبىرى بۇنداي سىن ساعاتتا حالقىنا قوعامدىق ءتارتىپتى ايتىپ "قورقىتقاننان" كورى، ۇكىمەتتىڭ ديالوگعا اشىقتىعىن تانىتۋى كەرەك ەدى دەسە، كەيبىرى "قوعامدىق ءتارتىپ" ءسوزىنىڭ ءمانى تۋرالى تالقىلاعان.

The Qazaq Times