قازان ايىندا باسقا وڭىرلەرگە قاراعاندا ەڭ كوپ سىرقات تىركەلگەن الماتىدا 8,5 مىڭعا جۋىق ادامنىڭ تالداۋىنان كوروناۆيرۋس انىقتالعان، تاعى 150 شاقتى ادامعا كوروناۆيرۋس پنەۆمونياسى دياگنوزى قويىلعان. قازىر قالانىڭ 3,1 مىڭ تۇرعىنى ەمدەلىپ جاتىر. جۋىردا عانا سانى قىسقارعان اۋرۋحانالارداعى توسەك-ورىن قورىنىڭ 45%-ىندا ناۋقاستار بار.
قوعامدىق دەنساۋلىق ساقتاۋ باسقارماسىنىڭ مالىمەتىنشە، وتكەن تاۋلىكتە، 26 قازاندا تىركەلگەن 230 ادامنىڭ 222-ءسى سيمپتوم بەلگىلەرىمەن، تاعى 8-ءى سيمپتومسىز. سونىمەن قوسا، سەيسەنبى كۇنى 119 ادام اۋرۋحاناعا جاتقىزىلعان.
جالپى قالادا سىيىمدىلىعى 2334 ورىن بولاتىن ينفەكتسيالىق ستاتسيونارلاردا 1056 ادام ەمدەلىپ جاتىر. ولاردىڭ اراسىندا 28 بالا توسەككە تاڭىلعان. ال رەانيماتسيا جانە قارقىندى تەراپيا بولىمدەرىندە 106 ناۋقاس جاتىر. 24 ادام ءوجج، 47 ناۋقاس ءينۆازيۆتى ەمەس ءوجج جانە 27 سىرقات High flow اپپاراتىمەن تىنىستاپ جاتىر. سونداي-اق، بمسك مەن تەلەمەديتسينا ورتالىعىنىڭ ءموبيلدى توپتارىمەن بىرگە ءۇي جاعدايىندا 2049 ناۋقاس امبۋلاتورلىق دەڭگەيدە باقىلاۋعا الىنعان.
اپتا باسى، دۇيسەنبىدە 10 ادام كوروناۆيرۋس پەن وعان ۇقساس پنەۆمونيادان قايتىس بولعان. قازان ايىندا 157 الماتىلىق وسى دەرتتەن كوز جۇمعان.
باقسارما مالىمەتىنشە، الماتى قالاسىندا بيىل اقپاننان بەرى 990 مىڭ ادام ەكپەنىڭ العاشقى، ونىڭ ىشىندە 920 مىڭى تولىق دوزاسىن العان. ونىڭ 120 مىڭى 60 جاستان اسقان ازاماتتار. قازىر 137 ەگۋ پۋنكتى مەن 205 ەگۋ بريگاداسىندا 733 مەدقىزمەتكەر جۇمىس ىستەيدى.
قوعامدىق دەنساۋلىق ساقتاۋ باسقارماسىنىڭ QT رەداكتسياسىنا ۇسىنعان جاۋابىنا قاراعاندا، ەپيداحۋالدىڭ تۇراقتاۋىنا بايلانىستى كوۆيد ستاتسيونارلارىنداعى ورىن قىسقارىپ، كەيبىر مەديتسينا مەكەمەلەرى بۇرىنعى جوسپارلى قابىلداۋ جۇمىسىنا كوشكەن.
«كەيىنگى كەزدەگى وڭ وزگەرىستەرگە بايلانىستى كوروناۆيرۋس ينفەكتسياسىن جۇقتىرعان ناۋقاستاردى ەمدەپ جاتقان مەديتسينالىق ۇيىمدارداعى 845 توسەك-ورىن الىنىپ، ولار بەيىندى باعىتقا قالپىنا كەلتىرىلدى. وسىلايشا، قور جۇكتەمەسى 3179-دان 2334-كە دەيىن ازايتىلدى» دەپ حابارلادى.
- «№4 قالالىق كلينيكالىق اۋرۋحانا» – 100 توسەك-ورىن;
- «فتيزيوپۋلمونولوگيا ورتالىعى» – 180 توسەك-ورىن;
- «پسيحيكالىق ساۋىقتىرۋ ورتالىعى» – 100 توسەك-ورىن;
- «SmartHealthUniversityCity» سەنىمدى باسقارۋشىسى شجق «№1 قالالىق كلينيكالىق اۋرۋحانا» مكك – 300 توسەك-ورىن;
- «A-class Medical» مو – 20 توسەك-ورىن;
- «ۇلتتىق قاۋىپسىزدىك كوميتەتىنىڭ گوسپيتالى» – 100 توسەك-ورىن;
- «مەديتسينالىق كومەك ورتالىعى» جشس – 45 توسەك-ورىن.
الماتى قالاسىندا پاندەميا باستالعالى 184 مىڭنان اسا ادام اۋىرعان، ونىڭ 8,6 مىڭى قازان ايىندا انىقتالىپ ۇلگەردى. قازىر رەسپۋبليكادا تىركەلەتىن كۇندەلىكتى ەسەپتىڭ كەمىندە 15-20%-ى الماتى قالاسىنا تيەسىلى بولىپ وتىر.
شەرزاتتىڭ ءولىمى ىسىنە قاتىستى قۇپيا ۆيدەونى جاريالاۋ كىمگە كەرەك بولدى؟ – ساراپشىلار مەديا سىنى
24 قازان – كىتاپحاناشىلار مەرەكەسى قۇتتى بولسىن!
«ۋچاسكەدەن ارۋاققا كوك حات»: الماتىدا مارقۇمعا كەلگەن شاقىرتۋ
كوميسسيا مەن باقىلاۋشى ەسەبىندەگى ايىرماشىلىق: الماتىدا رەفەرەندۋم قالاي ءوتىپ جاتىر؟
ء"ادىل قازاقستان، ەستيتىن مەملەكەت" ەندى ادۆوكاتتارعا قىسىم جاساي باستادى ما؟
«پسەۆدو-بايقاۋشى» الدە كاسىبي باقىلاۋشى: رەفەرەندۋمدى كىم باقىلايدى؟