بالالار قالالىق كلينيكالىق جۇقپالى اۋرۋلار اۋرۋحاناسىنىڭ ءمودۋلدى فيليالىنىڭ قاقپاسى. 21 قىركۇيەك 2021 جىل. الماتى قالاسى. فوتو: QT / كۇلتەگىن اسپانۇلى

قازان ايى باستالعالى ەڭ كوپ سىرقات تىركەلگەن الماتىدا 4832 ادامنىڭ تالداۋىنان كوروناۆيرۋس انىقتالعان، تاعى 94 ادامعا كوروناۆيرۋس پنەۆمونياسى دياگنوزى قويىلعان. قازىر قالانىڭ 4,3 مىڭ تۇرعىنى ەمدەلىپ جاتىر. ءتورتىنشى تولقىننىڭ شارىقتاۋ كەزەڭىنە قاراعاندا بۇگىندە كولەمى ەكى ەسەگە قىسقارعان اۋرۋحانالارداعى توسەك-ورىنداردىڭ 42%-ىنا ناۋقاستار جاتقىزىلعان.

قوعامدىق دەنساۋلىق ساقتاۋ باسقارماسىنىڭ مالىمەتىنشە، وتكەن تاۋلىكتە، 13 قازاندا تىركەلگەن 350 ادامنىڭ 333-ءى سيمپتوم بەلگىلەرىمەن، تاعى جەتەۋى سيمپتومسىز. بۇل الدىڭعى كۇنمەن سالىستىرعاندا 81 ادامعا كوپ. سونىمەن قوسا، سارسەنبى كۇنى 103 ادام اۋرۋحاناعا جاتقىزىلعان.

جالپى قالادا سىيىمدىلىعى 3179 ورىن بولاتىن ينفەكتسيالىق ستاتسيونارلاردا 1341 ادام ەمدەلىپ جاتىر. ولاردىڭ اراسىندا 43 بالا توسەككە تاڭىلعان. ال رەانيماتسيا جانە قارقىندى تەراپيا بولىمدەرىندە 139 ناۋقاس جاتىر. 25 ادام ءوجج، 78 ناۋقاس ءينۆازيۆتى ەمەس ءوجج-ىمەن جانە 30 سىرقات High flow اپپاراتىمەن تىنىستاپ جاتىر. سونداي-اق، بمسك مەن تەلەمەديتسينا ورتالىعىنىڭ ءموبيلدى توپتارىمەن بىرگە ءۇي جاعدايىندا 3004 ناۋقاس امبۋلاتورلىق دەڭگەيدە باقىلاۋعا الىنعان.

سەيسەنبىدە 8 ادام كوروناۆيرۋس پەن وعان ۇقساس پنەۆمونيادان قايتىس بولعان. تۇتاس قازان ايىندا 93 الماتىلىق وسى دەرتتەن كوز جۇمعان.

رەسمي دەرەككە قاراعاندا، الماتى قالاسىندا بيىل اقپاننان بەرى 973 مىڭ ادام ەكپەنىڭ العاشقى، ونىڭ ىشىندە 893 مىڭى تولىق دوزاسىن العان. ونىڭ 119,5 مىڭنان استامى 60 جاستان اسقان ازاماتتار. اكىمدىك مالىمەتىنشە، ازىرگە 160 ەگۋ پۋنكتى مەن 237 ەگۋ بريگاداسىندا 1028 مەدقىزمەتكەر جۇمىس ىستەيدى.

ەپيدكارتادا بىرنەشە ايدان بەرى «قىزىل ايماقتا» تۇرعان الماتى قالاسىندا پاندەميا باستالعالى 180,5 مىڭ ادام اۋىرعان، ونىڭ 5 مىڭعا جۋىعى قازان ايىندا انىقتالىپ ۇلگەردى. قازىر رەسپۋبليكادا تىركەلەتىن كۇندەلىكتى ەسەپتىڭ كەمىندە 15-20%-ى الماتى قالاسىنا تيەسىلى بولىپ وتىر. ءۇش جارىم ايدان بەرى «قىزىل ايماقتان» شىعا الماي وتىرعان قالا اۋرۋشاڭدىق بويىنشا ءبىرىنشى قاتاردان تۇسپەي كەلەدى.

The Qazaq Times