پروكۋرور "تىيىم سالىنعان ۇيىمدى قۇرۋعا اتسالىستى" جانە "جۇمىسىنا ارالاستى" دەپ ايىپتالعان 13 بەلسەندىنىڭ تورتەۋىنە 5 جىل تۇرمە جازاسىن سۇرادى. بۇل تۋرالى ازاتتىق راديوسى حابارلادى. 

باسىلىمنىڭ جازۋىنشا، سوت وتىرىسىنا تەرگەۋ يزولياتورىنان قاتىسقان بەس بەلسەندى قولدارىنا پلاكات ۇستاپ شىققان. وندا بەلسەندىلەر ەۋرووداق، اقش، كانادادان قازاقستاندا پىكىرىن اشىق ايتقان بەلسەندىلەردىڭ قۋدالانىپ جاتقانىن ايتىپ، استاناعا سانكتسيا سالۋعا شاقىرعان.

ءجارىسسوز كەزىندە پروكۋرور ايىپتالۋشىلارعا تومەندەگىدەي جازا سۇرادى:

  • اباي بەگىمبەتوۆ - 5 جىل باس بوستاندىعىنان ايىرۋ، 5 جىلعا قوعامدىق ساياسي جۇمىسپەن اينالىسۋعا تىيىم سالۋ (405-باپ 1,2-تارماعى بويىنشا ايىپتالعان);
  • اسحات جەكسەباەۆ - 5 جىل باس بوستاندىعىنان ايىرۋ، 5 جىلعا قوعامدىق ساياسي جۇمىسپەن اينالىسۋعا تىيىم سالۋ (405-باپ 1,2-تارماعى بويىنشا ايىپتالعان);
  • قايرات قىلىشەۆ - 5 جىلعا باس بوستاندىعىنان ايىرۋ، 5 جىلعا قوعامدىق ساياسي جۇمىسپەن اينالىسۋعا تىيىم سالۋ (405-باپ 1,2-تارماعى بويىنشا ايىپتالعان);
  • نويان راقىمجانوۆ - 5 جىلعا باس بوستاندىعىنان ايىرۋ، 5 جىلعا قوعامدىق ساياسي جۇمىسپەن اينالىسۋعا تىيىم سالۋ (405-باپ 1,2-تارماعى بويىنشا ايىپتالعان).

405-باپتىڭ 2-تارماعى بويىنشا ايىپ تاعىلعاندار بويىنشا:

  • اسپاندياروۆا دامەتكەن - 1 جىلعا باس بوستاندىعىن شەكتەۋ;
  • باقداۋلەت الىبەكوۆ - 1 جىل باس بوستاندىعىن شەكتەۋ،
  • ديانا بايماعامبەتوۆا - 2 جىلعا باس بوستاندىعىن شەكتەۋ
  • گۇلزيپا جاۋكەروۆا - 1 جىل باس بوستاندىعىن شەكتەۋ
  • نيناگۇل جۇمانيازوۆا - 1 جىل باس بوستاندىعىن شەكتەۋ
  • ەرمەك قوزيەۆ - 1 جىلعا باس بوستاندىعىن شەكتەۋ.
  • مارات قۇربانوۆ - ءبىر جىلعا باس بوستاندىعىن شەكتەۋ
  • بولات سماعۇلوۆ - 1 جىلعا باس بوستاندىعىن شەكتەۋ
  • دارحان ۋاليەۆ دارحان - 1 جىلعا باس بوستاندىعىن شەكتەۋ.

13 بەلسەندىنىڭ سوتى 27 شىلدەدە باستالعان. ولاردىڭ بارلىعى - قوعامدىق-ساياسي ماسەلەلەرگە بايلانىستى پىكىر-كوزقاراسىن اشىق ايتىپ، اكتسيا-ميتينگىلەرگە قاتىسىپ جۇرگەن ازاماتتار.

2020 جىلى استانانىڭ ەسىل اۋداندىق سوتى "كوشە پارتياسىن" "ەكسترەميستىك" دەپ تانىپ، ونىڭ قىزمەتىنە تىيىم سالعان. ەكى جىل بۇرىن قدت جۇمىسىنا دا وسىنداي سەبەپپەن شەكتەۋ قويعان ەدى. ەۋروپارلامەنت بۇل ەكى ۇيىمدى "بەيبىت وپپوزيتسيالىق قوزعالىس" دەپ اتايدى.

ەكى ۇيىم قازاقستانداعى اۆتوريتارلىق باسقارۋدى توقتاتۋدى جانە پارلامەنتتىك باسقارۋ جۇيەسىنە كوشۋدى تالاپ ەتەدى.

"كوشە پارتياسى" مەن قدت-عا تىيىم سالۋ تۋرالى سوت شەشىمدەرى جاريالانعان جوق.

بيىل شىلدە ايىندا حالىقارالىق Human Rights Watch (HRW) قۇقىق قورعاۋ ۇيىمى قازاقستان بيلىگىن بەلسەندىلەردى قۋدالاماۋعا جانە ساياسي وپپوزيتسيالىق قوزعالىستاردى "ەكسترەميزم" ءۇشىن ايىپتاماي، ەركىن جۇمىس ىستەۋىنە مۇمكىندىك بەرۋگە شاقىرعان ەدى.

The Qazaq Times