ەربول ەسحوجين. فوتو: ازاتتىق راديوسى

كەشە، 3 تامىزدا استانانىڭ №2 سارىارقا اۋداندىق سوتى "قىزمەتىنە تىيىم سالىنعان ەكسترەميستىك ۇيىمنىڭ جۇمىسىنا قاتىستى جانە ۇيىمداستىردى" دەپ ايىپتالعان ازاماتتىق بەلسەندى ەربول ەسحوجيندى 2 جىل 6 ايعا قاماۋ تۋرالى ۇكىم شىعاردى. بۇدان بولەك، وعان 5 جىلعا دەيىن بەيبىت جيىندارعا قاتىسۋعا، الەۋمەتتىك جەلىلەردى پايدالانۋعا تىيىم سالىندى. بەلسەندى ايىبىن مويىنداعان جوق. بۇل جايلى ازاتتىق راديوسى جازدى. 

سايت مالىمەتىنشە، ءىستى سۋديا سابىرجان كارىموۆ قارادى. سوت ونلاين رەجيمدە ءوتتى. سۋديا سوتتا "ەسحوجيننىڭ كىناسى سوتتا تولىق دالەلدەندى" دەپ مالىمدەدى.

ەربول ەسحوجيننىڭ ءوزى سوڭعى سوزىندە جالعان، دالەلسىز ايىپتارمەن قاماۋدا وتىرعانىن، تەك كونستيتۋتسيامەن بەرىلگەن قۇقىعىن پايدالانعانىن، ول ءۇشىن ءوزىن كىنالى سانامايتىنىن ايتتى.

"مەن ءوزىمدى كىنالى دەپ سانامايمىن جانە ىستەگەن ارەكەتىمە وكىنبەيمىن. مەن باسقا وتانداستارىمدى ءوز پىكىرلەرىن ايتۋعا، بيلىكتەن قورىقپاي، تالاپ قويا بىلۋگە، كونستيتۋتسيالىق قۇقىعىن پايدالانۋعا ۇيرەتە السام، ول مەنىڭ جەڭىسىم. باتىس ايماقتا ەرەۋىل كوبەيدى، جۇمىسشىلار جالاقى تالاپ ەتىپ جاتىر دەپ ەستىدىم. بۇل ازاماتتىق قوعامنىڭ ويانعانى دەپ بىلەمىن" دەدى ول.

سوت ۇكىمىنە ساي، ەسحوجين جازاسىن ورتاشا قاۋىپسىزدىك كولونياسىندا وتەيدى.

2019 جىلدان بەرى ەلدەگى الەۋمەتتىك ماسەلەلەرگە قاتىستى پىكىرىن اشىق ايتىپ جۇرگەن بەلسەندى، 44 جاستاعى ەربول ەسحوجين 2020 جىلدىڭ 22 جەلتوقسانىنان بەرى قاماۋدا وتىر. ول سوڭعى ەكى جىلدا "زاڭسىز شەرۋگە قاتىستى" دەگەن ايىپپەن التى رەت قامالىپ، سوڭعى بەس ايدى ساناماعاندا جيىنتىعى 85 كۇن اباقتىدا وتىرعان. بىرنەشە رەت اكىمشىلىك جاۋاپقا تارتىلىپ، ايىپپۇلعا ىلىككەن.

قازاقستاندا ەربول ەسحوجينمەن قاتار ونداعان بەلسەندىگە قىلمىستىق كودەكستىڭ 405-بابىنىڭ 1 ("ەكسترەميستىك ۇيىم قىزمەتىن ۇيىمداستىرۋ") جانە 2 تارماعى ("ەكسترەميستىك ۇيىم ىسىنە ارالاسۋ") بويىنشا ايىپ تاعىلعان. قازىر الماتىدا13 بەلسەندىنىڭ سوتى وتىپ جاتىر.

22 ماۋسىمدا استانا سوتى تاعى ءبىر ازاماتتىق بەلسەندى اسقار قايىربەكتى دە 1,5 جىلعا باس بوستاندىعىنان ايىرىپ، بەس جىلعا دەيىن قوعامدىق جۇمىستارمەن اينالىسۋعا تىيىم سالعان.

قازاقستان بيلىگى شەتەلدە تۇراتىن وپپوزيتسيالىق ساياساتكەر مۇحتار ءابليازوۆتىڭ "قازاقستاننىڭ دەموكراتيالىق تاڭداۋى" (قدت) قوزعالىسىن جاقتايتىنداردى ءجيى قۋدالاپ، جاۋاپقا تارتادى.

2018 جىلى قازاقستان سوتى قدت-نى "ەكسترەميستىك" دەپ تانىپ، قىزمەتىنە تىيىم سالعان. ال 2019 جىلى ەۋروپارلامەنت قدت-نى "بەيبىت وپپوزيتسيالىق قوزعالىس" دەپ اتاعان.

2020 جىلى مامىردا استانا سوتى تىركەلمەگەن "كوشە پارتياسىن" قدت قوزعالىسىمەن ءبىر ۇيىم دەپ تانىپ، ونىڭ دا قىزمەتىنە تىيىم سالعان. قازاقستان بيلىگى ەكى ۇيىمعا تىيىم سالۋ تۋرالى شەشىمىن جاريالاماعان. ءابليازوۆ پەن جاقتاستارى سوت شەشىمىنىڭ ساياسي استارى بار دەپ سانايدى.

"The Qazaq Times"