جامبىل وبلىسىندا بولعان جويقىن اپاتقا بايلانىستى بيلىك ونلاين وتكىزگەن شۇعىل جينالىستان كورىنىس. فوتو: قر ۇكىمەتى

پرەزيدەنت توقاەۆ جامبىل وبلىسىنداعى توتەنشە جاعدايعا بايلانىستى شۇعىل كەڭەس وتكىزدى. پرەزيدەنت جارىلىستان قازا تاپقانداردىڭ وتباسىلارىنا كوڭىل ايتىپ، زارداپ شەككەندەردىڭ تەزىرەك ساۋىعىپ كەتۋىنە تىلەكتەستىگىن ءبىلدىردى.

كەڭەسكە ۇكىمەت باسشىسى، قۇقىق قورعاۋ ورگاندارىنىڭ باسشىلارى قاتىستى. ءىس-شاراعا جامبىل وبلىسىنىڭ اكىمى مەن قورعانىس جانە توتەنشە جاعدايلار مينيسترلەرى، تارازدان بەينەبايلانىس فورماتىندا قاتىستى.

توقاەۆ كەڭەستە اپات جونىندە ۆەدومستۆوارالىق كوميسسيا قۇرۋدى تاپسىردى. ونى ۆيتسە-پرەمەر رومان سكليار باسقارادى. مارقۇمداردىڭ وتباسىلارىن قورعاۋ جانە زيان شەككەن تۇرعىندارعا كومەك كورسەتۋگە ۋادە بەرىلدى.

كوميسسياعا ءورت پەن جارىلىستان كەلگەن شىعىندى باعالاۋ، زاردابىن جويۋ جانە زاقىمدالعان ينفراقۇرىلىمدى قالپىنا كەلتىرۋ، سونداي-اق زيان شەككەن تۇرعىنداردى الەۋمەتتىك قولداۋ مىندەتى ارتىلدى.

«ءبىرىنشى.... توتەنشە جاعدايدىڭ سالدارىن جويۋ جونىندەگى ۆەدومستۆوارالىق مەملەكەتتىك كوميسسيا قۇرىلسىن. ونى ۆيتسە-پرەمەر رومان ۆاسيلەۆيچ سكليار باسقارادى. رومان ۆاسيلەۆيچ، كەزدەسۋدەن كەيىن بىردەن جامبىل وبلىسىنا بارۋدى تاپسىرامىن. وقيعا ورنىندا بارلىعىن ۇيىمداستىرىڭىز. ەكىنشىدەن، مارقۇمداردىڭ وتباسىن الەۋمەتتىك قورعاۋ جانە زارداپ شەككەن حالىققا كومەك كورسەتۋ ءۇشىن بارلىق قاجەتتى شارالاردى قابىلداۋ كەرەك. ۇشىنشىدەن، دەنساۋلىق ساقتاۋ مينيسترلىگى زارداپ شەككەندەرگە كەشەندى مەديتسينالىق كومەك كورسەتۋى ءتيىس»، – دەدى پرەزيدەنت.

تۇستەن كەيىنگى تاراز قالالىق كوپسالالى اۋرۋحاناسى باس دارىگەرىنىڭ ورىنباسارى ساكەن جۇماشەۆتىڭ اقپارات قۇرالدارىنا بەرگەن مالىمەتىنە قاراعاندا، 37 ادام ەمدەلىپ جاتىر، ونىڭ 5-ەۋى رەانيماتسيادا. جانساقتاۋ بولىمىندە توسەككە تاڭىلعان ەكى ادامدى قاتتى كۇيىك شالعان. ولارعا الماتى قالاسىنان ءبىر توپ رەانيماتولوگ-دارىگەرلەر ۇشىپ كەلگەن.

جويقىن جارىلىستان 9 ادام قازا تاۋىپ، ونداعان ادام جارالانعان. تاعى قاۋىپسىزدىك قىزمەتىنىڭ ەكى مامانى ءىز-ءتۇسسىز جوعالىپ كەتكەن. ازىرگە ىزدەستىرىلىپ جاتىر.

باس پروكۋراتۋرا مەن ءىىم اپاتتىڭ ءمان-جايىن انىقتاۋ جانە كىنالىلەردى جاۋاپقا تارتۋ ءۇشىن كەشەندى تەرگەۋ جۇرگىزەتىنى حابارلاندى.

The Qazaq Times