جامبىل وبلىسىنداعى اسكەري قويمادا بولعان جارىلىس كەزىنەن. فوتو: اشىق دەرەككوز

جۇما تاڭعى ساعات 8.00-دەگى دەرەك بويىنشا، جامبىل وبلىسىندا بولعان جويقىن جارىلىستان اۋرۋحاناعا جەتكىزىلگەن 66 ادامنىڭ 28 ەمدەلىپ جاتىر. ونىڭ التاۋىنىڭ جاعدايى اۋىر حالدە. تاعى ءتورت اسكەري قىزمەتكەر وقيعا كەزىندە قازا تاپقان.

قورعانىس ءمينيسترىنىڭ مالىمدەۋىنشە، ءورت ءسوندىرۋ كەزىندە 4 اسكەري قىزمەتكەر قازا تاپقان. ءىز-ءتۇسسىز جوعالعاندار دا بار. بۇل جونىندە ەرمەكباەۆ العاشقى رەسمي بريفينگتە حابارلادى.

«ءورت ءسوندىرۋ بارىسىندا 4 اسكەري قىزمەتكەردىڭ قازا تاپقانىنا كوڭىل ايتامىز. جارالانعانداردىڭ تەزىرەك ساۋىعۋىن تىلەيمىز» دەدى قورعانىس ءمينيسترى نۇرلان ەرمەكباەۆ.

مارقۇمدار:

  • سەرجانت مەشىنباي مارات سايلاۋۇلى، 40 جاستا;
  • ەفرەيتور جانبولاتوۆ رۋسلان ءجۇرسىنبايۇلى، 40 جاستا;
  • اسكەري كۇزەت قىزمەتكەرى داليباەۆ ورازبەك دايرابەكۇلى، 52 جاستا;
  • وڭتۇستىك ءوڭىردىڭ اسكەري پروكۋرورى ارمان قاپەزوۆ.

QT رەداكتسياسى مارقۇمداردىڭ وتباسى مەن تۋىستارىنا قايعىرا كوڭىل ايتادى.

جارىلىس توقتاعانىمەن، ءورت ءالى تولىقتاي سوندىرىلمەگەن.

تراۆماتولوگ، نەيروحيرۋرگ، حيرۋرگ، رەانيماتولوگ سياقتى مامانداردان تۇراتىن 32 دارىگەر مەن 56 مەدقىزمەتكەر مەديتسينالىق كومەك كورسەتكەن. وقيعاعا بايلانىستى جەدەل جاردەم قىزمەتىنىڭ 34 بريگاداسى جانە اۆياتسيا قىزمەتىنىڭ 3 بريگاداسى جۇمىلدىرىلعان. قازىر ۋاقىتشا ەۆاكۋاتسيالىق پۋنكتتەردى 171 تۇرعىن پانالاپ وتىر.

26 تامىز كەشكىسىن ساعات 19.10 شاماسىندا جامبىل وبلىسى بايزاق اۋدانىندا ورنالاسقان اسكەري ءبولىمنىڭ وق-ءدارى قويماسىنان ءورت شىعىپ، ارتى ءىرىلى-ۇساق ونداعان جارىلىسقا ۇلاسقان. جۇزدەگەن تۇرعىننىڭ كەيبىرى ءوز بەتىنشە، تاعى ءبىر بولىگى قاۋىپسىزدىك قىزمەتتەرىنىڭ كومەگىمەن ەۆاكۋاتسيالانعان.

2019 جىلعى 24 ماۋسىمدا ارىس قالاسىندا بولعان جارىلىستا دا كەيىنگى سالدارىن قوسا ەسەپتەگەندە 5 ادام كوز جۇمعان ەدى.

The Qazaq Times