الماتى قالاسىنداعى ورتالىق كلينيكالىق اۋرۋحاناسىندا مەيىربيكە جۇمىس ىستەپ ءجۇر. 15 شىلدە 2021 جىل. فوتو: QT / كۇلتەگىن اسپانۇلى

قازاقستاندا كوروناۆيرۋس پەن وعان ۇقساس پنەۆمونياعا شالدىققاندار سانى شامامەن 7,7 مىڭعا ارتىپ، جالپى ەسەبى 705 مىڭنان استى. تەك شىلدە ايىندا 154 مىڭ ادام سىرقاتتانىپ، 1932 ادام (كۆي+ 1644, كۆي- 288) قايتىس بولعان. ايدىڭ ورتاسىنا قاراي تاۋلىكتىك كورسەتكىشى 5 مىڭنىڭ ۇستىنە شىققان ىندەتتىڭ ءتورتىنشى تولقىنىندا قازىر كەمىندە 7 مىڭ جاعداي تىركەلىپ جاتىر. وتكەن سەنبىدە 140 ادام كوز جۇمعان. سالدارىنان حالقى ەڭ كوپ اۋىرعان ەلدەردىڭ جالپى ەسەبىندە 41-ورىنعا جىلجىدى. 

دەنساۋلىق ساقتاۋ مينيسترلىگىنىڭ رەسمي مالىمەتىنشە، ەلدە 8 تامىزدا كوروناۆيرۋس (كۆي+) جۇققان 7671 ادام، ال 7-ءسى كۇنى  كوروناۆيرۋس پنەۆمونياسىنا (كۆي-) شالدىققان 426 ادام تىركەلدى. قازىر ەلدە 113 مىڭنان اسا ادام (كۆي+ بويىنشا 109 مىڭ، كۆي- بويىنشا 3,8 مىڭ) اۋىرىپ جاتىر.

#COVID  وتكەن كۇنى پتر تەستى ارقىلى كوروناۆيرۋس جۇققانى راستالعان ناۋقاستار قاتارى تاعى ارتتى. ولاردىڭ باسىم بولىگى ادەتتەگىدەي مىڭنان جوعارى ديناميكادا تۇرعان الماتى (1503) جانە استانا (1452) قالالارىنان. بۇدان وزگە قاراعاندى (1058), شىمكەنت (565) ەپيداحۋال ءتىپتى ناشارلاي تۇسكەن. اتىراۋ (416),  اقتوبە (393),پاۆلودار (295), اقمولا (256), الماتى (244),  قوستاناي (237), شقو (230), ماڭعىستاۋ (214), قىزىلوردا (205), جامبىل (190), سقو (158), تۇركىستان (144), باتىس قازاقستان (111) وبلىستارىندا دەرت ۇدەپ تۇر. وسى جۇمادا اۋرۋدان ايىققان 5525 ادام ۇيىنە شىعارىلعان. سەنبىدە جيىنى 112 ادام قايتىس بولعان.

#COVID_پنەۆمونياسى تامىزدىڭ 7-ءcى، سەنبىدە اقپاراتى ءبىر تاۋلىككە كەشىگىپ بەرىلەتىن كوروناۆيرۋس پنەۆمونياسىنا شالدىققان 76 ناۋقاس ەسەپكە الىندى. سونىمەن قوسا، 135 ادام ايىعىپ شىققان، تاعى 28 ادام كوز جۇمعان.

#جالپى  دەنمين دەرەگىنە قاراعاندا، ەمدەلىپ جاتقان 113 مىڭ ناۋقاستىڭ 31 مىڭى اۋرۋحانادا، 81 مىڭى امبۋلاتورلىق باقىلاۋدا. 1981 ناۋقاستىڭ جاعدايى ناشار، ونداعى 402 ادامنىڭ ءحالى وتە اۋىر. بۇدان وزگە 192 سىرقات وكپەنى جاساندى جەلدەتۋ اپپاراتىمەن تىنىستاپ جاتىر.

ەپيدكارتادا قازاقستاندا بۇگىن «سارى ايماققا» قايتا وتكەن تۇركىستان وبلىسىنان باسقا بارلىق ءوڭىرى «قىزىل ايماقتا» تۇر.

دەنمين حابارىنشا, 1 شىلدەدە پتر سكرينينگى نەگىزىندە 414 سىناما جۇرگىزىلگەن. سايكەسىنشە، بارلىق ۇلگىنىڭ 48,3%-ىنان قازاقستاننىڭ تۇگەل ايماعىنان ۇندىستاندىق «دەلتا» شتامى انىقتالعان. ۇكىمەت مالىمەتىنشە، بيىل كوكتەم-جازدا گەنومدىق زەرتتەۋ ناتيجەسىندە ەلدىڭ باسىم بولىگىنەن ۆيرۋستىڭ برازيليالىق، بريتاندىق، وڭتۇستىكافريكالىق جانە ۇندىستاندىق شتامدارى انىقتالعان.

بىلتىر 13 ناۋرىزدان بەرى COVID-19 ينفەكتسياسىن جۇقتىرعاندار قاتارى 642 مىڭعا جۋىقتاسا، 1 تامىزدان بىلايعى كوروناۆيرۋس پنەۆمونياسى 63 مىڭنان اسقان. ددسۇ دەرەكقورى مەن ۇلتتىق ستاتيستيكادا قازاقستاندا اۋىرعاندار سانى 705 مىڭعا جەتتى. دەگەنمەن ۇكىمەت كوروناۆيرۋس پەن ونىڭ پنەۆمونياسىن ەكى بولەك ەسەپتەيدى.

پاندەميا باستالعالى جالپى ۆيرۋس جۇققانداردان 13,1 مىڭ ادام (كۆي+ / U07.1 – 6876, كۆي- / U07.2 – 3915, ىلەسپە اۋرۋلاردان – 2367) قايتىس بولعان. الايدا قازاقستان بيلىگى بويىنان كوروناۆيرۋس تابىلسا دا، باسقا اۋرۋلاردىڭ سەبەبىنەن قايتىس بولدى دەلىنگەندەردى جالپى ستاتيستيكاعا ەنگىزبەيدى. بۇعان قارسى ساراپشىلاردىڭ سوزىنە قاراعاندا، كوروناۆيرۋستىڭ جاناما اسەرىنەن قايتقانداردىڭ جارتىسىنان استامىنىڭ سەبەبى قان اينالىمى جۇيەسىنىڭ اۋرۋلارى بولعاندىقتان، وعان ينفەكتسيا دەرت قوزدىرۋشى فاكتور رەتىندە ولىمگە اكەپ سوقتىرعان.

قازاقستان ۆيرۋس تارالۋى بويىنشا الەمدە دجونس حوپكينس ۋنيۆەرسيتەتى جانە ددسۇ تىزىمىندەگى 221 ەل مەن ايماقتىڭ اراسىندا 41-ورىنعا ورنىقتى.

ۇكىمەتتىڭ سوڭعى دەرەگىنە قاراعاندا، قازاقستاندا 4,3 ملن ادام كوروناۆيرۋسقا قارسى ۆاكتسينانى تولىق العان، ال كەمىندە ءبىرىنشى دوزاسى ەگىلگەن جۇرتتىڭ سانى 5,7 ملن شاماسىندا.

"The Qazaq Times"