الماتى قالاسىنداعى ورتالىق كلينيكالىق اۋرۋحاناسىندا كوروناۆيرۋستان ەمدەلىپ جاتقان جاقىنىنا سالەمدەمە اكەلىپ تۇرعان ادام. 15 شىلدە 2021 جىل. فوتو: QT / كۇلتەگىن اسپانۇلى

قازاقستاندا كوروناۆيرۋس پەن وعان ۇقساس پنەۆمونياعا شالدىققاندار سانى 7741-گە ارتىپ، جالپى ەسەبى 617 مىڭنان استى، ونىڭ 130 مىڭى تەك شىلدە ايىندا تىركەلىپ ۇلگەردى. وسى ايداعى ەپيداحۋال ديناميكاسىنا قاراعاندا، كوروناۆيرۋستىڭ جاناما اسەرىنەن كوز جۇمعانداردى ەسەپتەمەگەندە تىكە كوۆيدتەن 1,5 مىڭنان اسا قازاقستاندىق (كۆي+ 1301, كۆي- 224) ومىردەن وتكەن. ەكى اپتادان بەرى توقتاۋسىز ءوسىپ جاتقان اۋرۋشاڭدىق 5-6 مىڭنىڭ ۇستىندە تۇر. دۇيسەنبىدە ءجۇز شاقتى ادام قايتىس بولعان.

دەنساۋلىق ساقتاۋ مينيسترلىگىنىڭ رەسمي مالىمەتىنشە، ەلدە 28 شىلدەدە كوروناۆيرۋس (كۆي+) جۇققان 7479 ادام، ال 27-ءسى كوروناۆيرۋس پنەۆمونياسىنا (كۆي-) شالدىققان 262 ادام تىركەلدى. قازىر ەلدە 90,7 مىڭ ادام (كۆي+ بويىنشا 88 مىڭ، كۆي- بويىنشا 2,2 مىڭنان اسا) اۋىرىپ جاتىر.

#COVIDوتكەن كۇنى پتر تەستى ارقىلى كوروناۆيرۋس جۇققانى راستالعان ناۋقاستار قاتارى تاعى ارتىپ، شىلدە ايىنداعى ءVIIى رەكوردىن جاڭالادى. ءار وڭىردە جۇزدەن كەم ەمەس جاعداي تىركەلىپ، بۇرىن-سوڭدى بولماعان دەڭگەيگە ءوستى. ولاردىڭ باسىم بولىگى ادەتتەگىدەي مىڭنان جوعارى ديناميكادا تۇرعان استانا (1571),  الماتى (1450) قالالارىنىڭ قاتارىنا قاراعاندى وبلىسى (1011) دا كىردى. بۇدان وزگە شىمكەنت (445), اتىراۋ (424), شقو (298), الماتى (270), پاۆلودار (251), اقمولا (238), اقتوبە (230), قوستاناي (224), ماڭعىستاۋ (220), بقو (198), جامبىل (197),  قىزىلوردا (175), سقو (145), تۇركىستان (132) وبلىستارىندا دەرت ۇدەپ تۇر. وسى سەيسەنبىدە اۋرۋدان ايىققان 5814 ادام ۇيىنە شىعارىلعان. سەيسەنبىدە جيىنى 81 ادام قايتىس بولعان.

#COVID_پنەۆمونياسى 27 شىلدەدە اقپاراتى ءبىر تاۋلىككە كەشىگىپ بەرىلەتىن كوروناۆيرۋس پنەۆمونياسىنا شالدىققان 262 ناۋقاس ەسەپكە الىندى. ۆەدومستۆو دەرەگىنشە، سەيسەنبى كۇنى سىرقاتتار شىمكەنت (43) قالاسى جانە اتىراۋ (35), جامبىل (28), اقمولا (25), ماڭعىستاۋ (24), قوستاناي (21) وبلىستارىندا كوپتەپ انىقتالعان. سونىمەن قوسا، 121 ادام ايىعىپ شىققان، تاعى 16 ادام كوز جۇمعان.

#جالپى  دەنمين دەرەگىنە قاراعاندا، ەمدەلىپ جاتقان 90,5 مىڭنان اسا ناۋقاستىڭ 25 مىڭى اۋرۋحانادا، 65 مىڭى امبۋلاتورلىق باقىلاۋدا. 1573 مىڭ ناۋقاستىڭ جاعدايى ناشار، ونداعى 332 ادامنىڭ ءحالى وتە اۋىر. بۇدان وزگە 154 سىرقات وكپەنى جاساندى جەلدەتۋ اپپاراتىمەن تىنىستاپ جاتىر.

ەپيدكارتادا كەيىنگى ءبىر اپتا بويى «سارى ايماقتا» جالعىز تۇرعان تۇركىستان وبلىسىنان باسقا بارلىق ءوڭىر ء(ۇش مەگاپوليستى قوسا العاندا) «قىزىل ايماقتا» تۇر.

دەنمين حابارىنشا, 1 شىلدەدە پتر سكرينينگى نەگىزىندە 414 سىناما جۇرگىزىلگەن. سايكەسىنشە، بارلىق ۇلگىنىڭ 48,3%-ىنان قازاقستاننىڭ تۇگەل ايماعىنان ۇندىستاندىق «دەلتا» شتامى انىقتالعان. ۇكىمەت مالىمەتىنشە، بيىل كوكتەم-جازدا گەنومدىق زەرتتەۋ ناتيجەسىندە ەلدىڭ باسىم بولىگىنەن ۆيرۋستىڭ برازيليالىق، بريتاندىق، وڭتۇستىكافريكالىق جانە ۇندىستاندىق شتامدارى انىقتالعان.

بىلتىر 13 ناۋرىزدان بەرى COVID-19 ينفەكتسياسىن جۇقتىرعاندار قاتارى 557 مىڭنان، 1 تامىزدان بىلايعى كوروناۆيرۋس پنەۆمونياسى 60 مىڭنان استى. ددسۇ دەرەكقورى مەن ۇلتتىق ستاتيستيكادا قازاقستاندا اۋىرعاندار سانى 617 مىڭعا جەتتى. دەگەنمەن ۇكىمەت كوروناۆيرۋس پەن ونىڭ پنەۆمونياسىن ەكى بولەك ەسەپتەيدى.

پاندەميا باستالعالى جالپى ۆيرۋس جۇققانداردان 11,7 مىڭنان اسا ادام (كۆي+ / U07.1 – 5700, كۆي- / U07.2 – 3676, ىلەسپە اۋرۋلاردان – 2367) قايتىس بولعان. الايدا قازاقستان بيلىگى بويىنان كوروناۆيرۋس تابىلسا دا، باسقا اۋرۋلاردىڭ سەبەبىنەن قايتىس بولدى دەلىنگەندەردى جالپى ستاتيستيكاعا ەنگىزبەيدى. بۇعان قارسى ساراپشىلاردىڭ سوزىنە قاراعاندا، كوروناۆيرۋستىڭ جاناما اسەرىنەن قايتقانداردىڭ جارتىسىنان استامىنىڭ سەبەبى قان اينالىمى جۇيەسىنىڭ اۋرۋلارى بولعاندىقتان، وعان ينفەكتسيا دەرت قوزدىرۋشى فاكتور رەتىندە ولىمگە اكەپ سوقتىرعان.

قازاقستان ۆيرۋس تارالۋى بويىنشا الەمدە دجونس حوپكينس ۋنيۆەرسيتەتى جانە ددسۇ تىزىمىندەگى 221 ەل مەن ايماقتىڭ اراسىندا 42-ورىندا تۇر.

ۇكىمەتتىڭ سوڭعى دەرەگىنە قاراعاندا، قازاقستاندا 3,5 ملن ادام كوروناۆيرۋسقا قارسى ۆاكتسينانى تولىق العان، ال كەمىندە ءبىرىنشى دوزاسى ەگىلگەن جەرتتىڭ سانى 5,2 ملن شاماسىندا.

"The Qazaq Times"