الماتى قالاسىندا كوروناۆيرۋسقا شالدىققانداردى ەمدەۋگە ارنالعان ورتالىق كلينيكالىق اۋرۋحانانىڭ پالاتاسىنداعى ناۋقاستار مەن دارىگەر. 15 شىلدە 2021 جىل. فوتو: QT / كۇلتەگىن اسپانۇلى

شىلدە ايىنىڭ العاشقى جارتىسىندا كوروناۆيرۋس ەپيدەمياسى وسى كۇنگە دەيىن تىركەلمەگەن دەڭگەيدە ءورشىدى. نەبارى ەكى اپتادا 60 مىڭعا تاياۋ ادام اۋىردى. قازىر ونىڭ 53 مىڭعا جۋىعى (كۆي+ بويىنشا 51 895, كۆي- بويىنشا 1629) ەمدەلىپ جاتىر.

دەنمين دەرەگىنە قاراعاندا، ەمدەلىپ جاتقان 52 895 ناۋقاستىڭ 16,5 مىڭنان استامى اۋرۋحانادا، 36 مىڭى امبۋلاتورلىق باقىلاۋدا. ەپيداحۋالدى ساراپتاۋ ماتريتساسىندا 13 ءوڭىر قىزىل، ەكى وبلىس سارى ايماققا ەنگەن.

جىل باستالعالى 340 مىڭنان استام ادام كوروناۆيرۋس پەن وعان ۇقساس پنەۆمونياعا شالدىققان. قاڭتاردا 34 مىڭ، اقپاندا 27 مىڭ ادام اۋىردى. كوكتەم شىعا ناۋرىز ايىندا 34 مىڭعا جەتىپ، قايتا ەكپىندەگەن ىندەت ءۇشىنشى تولقىنعا ۇلاستى. ساۋىردە 78 مىڭنان جانە مامىردا 67 مىڭنان اسا ادام سىرقاتتاندى. جاز كەلە ماۋسىمدا ءبىرشاما سايابىرسىپ، تاۋلىگىنە ورتاشا ەسەپپەن 1300-دەي جاعداي تىركەلىپ جاتتى. الايدا شىلدەگە قاراي بىلتىرعى ستسەناري قايتالاندى. ينفەكتسيا جۇققاندار كۇرت كوبەيىپ، بىلتىرعىداي جەلىدە قازاناما ءجيى جازىلا باستادى. بيلىك ەكپە الۋدى مىندەتتەۋدىڭ تۋرا-جاناما شارالارىن قولعا الدى. شىلدەنىڭ ەكىنشى دەكاداسى بارىسىندا كۇندە رەكورد. بۇرىن-سوڭدى رەسمي ەسەپتە كورسەتىلمەگەن تسيفرلار كۇن سايىن بويلاتپاي ءوسىپ بارادى.

دەنساۋلىق ساقتاۋ ءمينيسترى الەكسەي تسويدىڭ اپتا ورتاسىنداعى سوزىنە قاراعاندا، بۇل – ءالى باسى. ول 14 شىلدەدە جاريالاعان بولجامىندا «دەلتاي شتامىنىڭ تارالۋى ەپيدجاعدايعا ايتارلىقتاي اسەر ەتىپ وتىرعانىن مالىمدەدى. ءتورتىنشى تولقىننىڭ شارىقتاۋ شەگى تامىز ايىندا وتەدى دەلىنگەن جاڭارعان بولجامدا. جاعىمسىز ستسەناري بويىنشا، شىلدە-قىركۇيەك ايلارىندا 400 مىڭ ادام ۆيرۋس جۇقتىرادى. جاعداي شىنايى ستسەناريدە وربىسە، 355 مىڭ ادام جانە جاعىمدى نۇسقادا دامىر بولسا، وندا كۇزدىڭ العاشقى ايىنا دەيىنگى ارالىقتا 330 مىڭ ادام سىرقاتتانۋى مۇمكىن دەسەدى. ىندەت ورشىگەن تامىز ايىندا ءۇش نۇسقا اراسىندا تاۋلىگىنە 5-6 مىڭ ناۋقاس انىقتالاۋى ىقتيمال. دەگەنمەن قازىردىڭ وزىندە كۇنىنە 5 مىڭنان اسا ادامنان پتر سىناماسى وڭ كورسەتىپ جاتىر.

پاندەميا جاريالانعاننان بەرى دۇنيەجۇزىنىڭ ءبىر بولشەگى قازاقستاندا (بىلتىر 13 ناۋرىزدان) 541 مىڭ ادام (كۆي+ 483 مىڭ، كۆي- 58 مىڭ) اۋىردى. وسىلايشا ەلۋلىككە ەنۋدەن دامەلى توعىزىنشى ايماق اۋرۋشاڭدىق كورسەتكىشى بويىنشا، الەمدە Worldometers دەرەكقورى، دجونس حوپكينس ۋنيۆەرسيتەتى جانە ددسۇ تىزىمىندەگى 221 ەل مەن ايماقتىڭ اراسىندا 44-ورىندى بىرنەشە اي تۇراق ەتىپ كەلەدى.

ال ءولىم ەسەبىن اشىڭقىراساق، جالپى ۆيرۋس جۇققانداردان 10 808 ادام (كۆي+ / U07.1 – 4909, كۆي- / U07.2 – 3532, ىلەسپە اۋرۋلاردان – 2367) قايتىس بولعان. الايدا قازاقستان بيلىگى بويىنان كوروناۆيرۋس تابىلسا دا، باسقا اۋرۋلاردىڭ سەبەبىنەن قايتىس بولدى دەلىنگەندەردى جالپى ستاتيستيكاعا ەنگىزبەيدى. بۇعان قارسى ساراپشىلاردىڭ سوزىنە قاراعاندا، كوروناۆيرۋستىڭ جاناما اسەرىنەن قايتقانداردىڭ جارتىسىنان استامىنىڭ سەبەبى قان اينالىمى جۇيەسىنىڭ اۋرۋلارى بولعاندىقتان، وعان ينفەكتسيا دەرت قوزدىرۋشى فاكتور رەتىندە ولىمگە اكەپ سوقتىرعان.

بىلتىرعى «ماۋسىم-شىلدە قىرعىنى» بيىل «شىلدە-تامىزعا» جىلىستاعانداي. ەلدە اۋىرىپ جاتقاندار كوپ. بيلىك مۇنىڭ سەبەبىن ۇندىكتاندىق دەلتا شتامىنىڭ كەڭىرەك تارالۋىمەن بايلانىستىرادى.

"The Qazaq Times"