ابدەن ارىپ-توزعان كوتەرەم جىلقى. كورنەكى سۋرەت. قىزىلوردا وبلىسى. 2021 جىل. فوتو: Facebook

قىزىلوردا وبلىسىندا قۋاڭشىلىقتان قاتالاعان ارال اۋدانىندا «توتەنشە جاعداي» كەشىگىپ جاريالاندى.

اۋدان اكىمى سەرىك سەرماعانبەتوۆ قۋاڭشىلىقپەن كۇرەسۋ ماقساتىندا 2 ملرد تەڭگە قاجەتتىگىن مالىمدەدى. قازىر 13 وكرۋگ «قىزىل ايماققا» ەنگىزىلگەن.

«قۋاڭشىلىق سالدارىمەن كۇرەسۋ ءۇشىن اۋدانعا 2 ميلليارد تەڭگە قارجى قاجەت. 13 وكرۋگ «قىزىل ايماققا» ەنگىزىلگەن. تاعى التاۋى سارى، تورتەۋى جاسىل ايماقتا تۇر. ەلدى سۋمەن قامتاماسىز ەتۋ ءۇشىن 15 قۇدىق قازىلاتىن بولادى. جايىلىمداردى ۇلعايتۋ ءۇشىن سەگىز ارنا قازىلىپ، تازالانادى. ءبىز وسى جۇمىستاردى جۇزەگە اسىرۋ ءۇشىن تەحنيكا تابۋىمىز قاجەت»، – دەدى سەرماعانبەتوۆ.

سەرماعانبەتوۆتىڭ ايتۋىنشا، 1,9 ملرد تەڭگە رەسپۋبليكالىق، ال 250 ملن تەڭگە وبلىستىق بيۋدجەتتەن بولىنبەك.

جاۋىن-شاشىننىڭ مەجەلى مولشەرى از تسۇكەندىكتەن، ارال اۋدانىنداعى جايىلىمداردىڭ 90%-ى جارامسىز بولىپ قالعان. ماۋسىم مەن شىلدە ايىنداعى شىلىڭگىر ىستىقتان سىرداريا وزەنىنىڭ ارناسى ايتارلىقتاي تارىلعان. رەسمي دەرەككە سەنسەك، وسىنىڭ سالدارىنان بۇگىنگە دەيىن 500 باس مال (321 باس سيىر، 237 باس جىلقى، ءبىر باس تۇيە) ولگەن. تاۋەلسىز ساراپشىلار مەن شارۋالارمەن تۇراقتى بايلانىستاعى قوعام بەلسەندىلەرى  شىنايى شىعىن كولەمى الدەقايدا كوپ ەكەنىنە سەنىمدى.

اۋدان اكىمدىگى تج رەجيمىن ەنگىزۋگە قاجەتتى قۇجاتتاندىرۋ پروتسەسىنە ءبىر اي ارناعانىن جەتكىزدى. ءنورماتيۆتى قۇجاتتاردى ادىلەت مينيسترلىگىنە وتكىزگەن. بيۋروكراتيا بۇرالاڭىندا قوراداعى بارىنان ايرىلعان شارۋالارعا وتەماقى بەرىلەر-بەرىلمەسى ازىرگە بەلگىسىز. ءتورت تۇلىكتىڭ 205 مىڭ باسىنا كەرەك 184 مىڭ توننا ءشوپتىڭ 146 مىڭىن سىرتتان تاسىمالداۋعا ءماجبۇر.

وسىدان ەكى جۇما بۇرىن، 3 شىلدەدە اۋىل شارۋاشىلىعى مينيسترلىگى وڭتۇستىك جانە وڭتۇستىك-باتىس وڭىرلەرىندەگى مال قىرعىنى توقتاپ، جاعداي قالپىنا كەلگەنىن مالىمدەگەن. دەسە دە جۇرت الەۋمەتتىك جەلىلەردە مەملەكەتتىك كومەكتىڭ ءوزى تالان-تاراجعا ءتۇسىپ، جەم-شوپتەن قاعىلىپ وتىرعانىن جازىپ وتىر. جەلى تولعان ارىپ-توزعان، كوتەرەم مالدىڭ فوتو-بەينە ماتەريالدارى. وتكەن سەنبىدە پرەزيدەنت توقاەۆ ۆەدومستۆوعا شاڭ جۋىتپاعان اۋىل شارۋشىلىعى ءمينيسترى ساپارحان وماروۆتى ورنىنان بوساتىپ، وتستاۆكاعا جىبەرگەن.

وسىعان دەيىن ساراپشىلار دەر كەزىندە وڭ شەشىم قابىلداي الماعان ەكس-مينيستر ساپارحان وماروۆتان توتەنشە جاعدايدى ەرتەرەك ەنگىزۋدى سۇراعان ەدى. مامانداردىڭ ايتۋىنشا، ەندىگى قولدان كەلەرى سالدارى كوپ كە تۇسەتىن قيىندىقتىڭ زاردابىن مەيىلىنشە ازايتۋ جولىندا ارەكەت ەتۋ كەرەك.

"The Qazaq Times"