ەپيداحۋال: ءبىر تاۋلىكتە 4 مىڭعا جۋىق ادامنان كوروناۆيرۋس انىقتالدى

قازاقستاندا وتكەن تاۋلىكتە 3899 ادامعا كوروناۆيرۋس جۇققانى انىقتالدى. بۇل –بۇرىن-سوڭدى تىركەلمەگەن ەڭ جوعارى كورسەتكىش.

دەنساۋلىق ساقتاۋ مينيسترلىگىنىڭ دەرەگىنشە، جەكسەنبى كۇنى ەڭ كوپ ناۋقاس استانادا تىركەلگەن.  ەلوردادا 950 ادامنىڭ كوروناۆيرۋس تەستى وڭ شىققان. الماتىدا – 638, قاراعاندى وبلىسىندا – 603, اتىراۋ وبلىسىندا – 290, شىمكەنتتە – 264, باتىس قازاقستان وبلىسىندا – 215, اقمولا وبلىسىندا – 139, ماڭعىستاۋ وبلىسىندا – 126, پاۆلودار وبلىسىندا 142 ناۋقاس تىركەلدى. قالعان وبلىستاردا انىقتالعان ناۋقاستار جۇزگە جەتپەيدى.

10 شىلدەدە ىندەتتەن 37 ادام قايتىس بولعان. ولاردىڭ 34-ءىنىڭ ولىمىنە كوروناۆيرۋس، 3-ەۋىنىڭ ولىمىنە كوروناۆيرۋس پنەۆمونياسى سەبەپ بولعان.

قازىر "جاسىل ايماقتا" تۇركىستان مەن شىعىس قازاقستان وبلىسى عانا قالعان. ءتورت وبلىس: سولتۇستىك قازاقستان وبلىسى، الماتى وبلىسى، جامبىل مەن قىزىلوردا وبلىستارى – "سارى ايماقتا". استانا، الماتى، شىمكەنت قالالارى، پاۆلودار، اتىراۋ، قاراعاندى، اقمولا، قوستاناي، اقتوبە، ماڭعىستاۋ، باتىس قازاقستان وبلىستارى "قىزىل ايماقتا" تۇر. الگوريتمگە سايكەس، "قىزىل ايماقتاردا" كارانتين كۇشەيەدى.

رەسمي مالىمەت بويىنشا، قازاقستاندا 2020 جىلدىڭ ناۋرىز ايىنان بەرى 458 724 ادامنىڭ كوروناۆيرۋس تەستى وڭ شىققان. 4681-ءى قايتىس بولعان. ۇكىمەت بىلتىر تامىزدان بەرى پتر تەستىمەن راستالماعان، بىراق اۋرۋ بەلگىلەرى بويىنشا كوروناۆيرۋسقا ۇقسايتىن پنەۆمونيا ەسەبىن جۇرگىزىپ كەلەدى. 10 شىلدەگە دەيىن 57 900 ادام پنەۆمونيانىڭ وسى تۇرىنە شالدىققان (10 شىلدەدە 40 ادامنىڭ پنەۆمونياعا شالدىققانى انىقتالدى), 3492-ءسى قايتىس بولعان.

كەيىنگى اپتالاردا، ەلدە "ۇندىستاندىق شتامم" تارالا باستاعالى كوروناۆيرۋس جۇقتىرعاندار كۇن سايىن كوبەيىپ جاتىر.

قازاقستاندا اقپان ايىنان بەرى حالىققا كوروناۆيرۋسقا قارسى ۆاكتسينا سالىنا باستادى. سودان بەرى 4 ملن 372 مىڭ ادام ۆاكتسينانىڭ كەمىندە ءبىر دوزاسىن العان. 2 ملن 442 مىڭ ادام ۆاكتسينانىڭ ەكى دوزاسىن العان.

"The Qazaq Times"