قازاقستان بيىل پرەزيدەنتتىك ەل باسقارۋدان پارلامەنتتىككە اۋىسىپ جاتقانى بەلگىلى. ال تۇركيا كەرسىنشە رەفەرەندۋم وتكىزۋدىڭ  ناتيجەسىندە پارلامەنتتىك بيلىكتەن، پرەزيدەنتتىككە اۋىسىپ جاتىر. وسىعان بايلانىستى بۇگىن ەكى ەل باسشىلارىنىڭ سوڭعى جاساعان ساياسي شەشىمدەرىنە قىسقاشا توقتالۋدى ءجون كوردىك.  

قازاقستاندى 26 جىل باسقارعان نۇرسۇلتان نازارباەۆ بيىل 76 جاسقا  كەلگەن شاعىندا قازاقستاندى پرەزيدەنتتىكتەن، پارلامەنتتىك باسقارۋ جۇيەسىنە اۋىستىرۋعا بايلانىستى ەل كونستيتۋتسياسىنا بىرقاتار وزگەرىستەر ەنگىزگەن بولاتىن. ال، پايعامبار جاسىنا كەلگەن تۇركيا پرەزيدەنتى رەدجەپ تايپ ەردوعان بولسا، كەرسىنشە ءوز بيلىگىن كۇشەيتىپ، ەلدى پارلامەنتتىكتەن پرەزيدەنتتىك باسقارۋ فورماسىنا كوشىرىپ جاتىر.

ەردوعان ەلگە ءولىم جازاسىن ەنگىزەمىن دەپ ەۋرووداق زاڭنامالارىنا قارسى شىعىپ، باتىستان الشاقتاپ جاتسا، نازارباەۆ لاتىن جازۋىنا كوشەمىز دەپ باتىسقا جاقىن ەكەندىگىن بايقاتۋدا.  ەردوعان 2023 جىلعا دەيىن ءوز بيلىگىن كۇشەيتىپ، تۇركيا رەسپۋبليكاسىنىڭ 100 جىلدىق مەرەيتويىندا ەل پرەزيدەنتى رەتىندە تاريحتا قالۋدى كوزدەسە، ن.نازارباەۆ وزىنەن كەيىن بيلىكتى كىمگە قالدىرىپ كەتۋدى ويلاستىرىپ جاتقان ءتارىزدى.

قورىتا كەلگەندە، قازىرگى تاڭدا اقورداداعى ساياسي جۇيە  تۇراقتى بولعانىمەن قازاقستان وتپەلى كەزەڭدە تۇرعانى بەلگىلى. نازارباەۆتان كەيىن كىم بيلىك تىزگىنىن ۇستايتىنى ازىرگە بەيمالىم.  ال، تۇركيا سول ءبىر ادامدىق تۇراقتى ساياسي جۇيەگە قادام باسىپ وتىر. تۇركيادا قازىردىڭ وزىندە ەردوعانعا قارسى تۇرا الاتىن قانداي دا  ءبىر ساياسي پارتيا نەمەسە تۇلعا جوق.  بىراق، ەلدەگى ءالسىز بولسا دا ءبىر قاتار وپپزيتسيالىق پارتيالار،  ەردوعاننىڭ بۇل ابسوليۋتتىك ەل باسقارۋى اۆتوريتاريزمگە الىپ كەلۋى مۇمكىن دەپ الاڭداۋشىلىق تانىتىپ جاتقانىن ايتا كەتكەن ءجون.

“The Qazaq Times”