اتىراۋ وبلىسىنىڭ اكىمى ماحامبەت دوسمۇحامبەتوۆ 2021 جىلدىڭ العاشقى جارتىسىندا اتقارعان قىزمەتى جونىندە ەسەپ بەرىپ تۇرعان كەزى. 18 ماۋسىم 2021 جىل. استانا، ورتكوم. فوتو: قر وكق

اتىراۋ وبلىسىنىڭ اكىمى ماحامبەت دوسمۇحامبەتوۆ ۇيدەن تاماقتانبايتىنىن جانە ءوزى باسقاراتىن ايماقتىڭ حالقى ازىق-تۇلىككە قانشا قاراجات جۇمسايتىنىن بىلمەيتىنىن ايتتى.

جۇما كۇنى، 18 ماۋسىم ورتكوم الاڭىندا حالىق الدىندا ەسەپ بەرگەن  اتىراۋ وبلىسىنىڭ اكىمى ماحامبەت دوسمۇحامبەتوۆ بيىل اۋىل شارۋاشىلىعى ءونىمىن وندىرۋشىلەردى  قولداۋعا 3,1 ملرد تەڭگە بولىنگەنىن مالىمدەدى.  الەۋمەتتىك ماڭىزى بار ازىق-تۇلىك تاۋارلارىنىڭ باعاسىن تۇراقتاندىرۋ جۇمىسى جالعاسىپ جاتىرمىز دەگەنىمەن، وڭىردە  كۇندەلىكتى قولدانىلاتىن قاراپايىم كارتوپ-ءسابىزدىڭ باعاسى اسپانداپ تۇر. باياندامادا ءبارى «جاقسارىپ كەلەدى» دەسە دە، ءىس جۇزىندە وزگەرىسسىز. ءبىر عانا اتىراۋ قالاسىنىڭ وزىندە ازىق-تۇلىك ساتاتىن 90 ءىرىلى-ۇلكەن سۋپەرماركەت پەن مىڭ شاقتى ورتا-شاعىن دۇكەن بار. ال  وبلىس اكىمى ماحامبەت دوسمۇحامبەتوۆتىڭ ايتۋىنشا، 36 ساۋدا نۇكتەسىندە الەۋمەتتىك ماڭىزدى ازىق-تۇلىك تاۋارلارىنىڭ 14 ءتۇرى نارىقتان 10-15% تومەن باعامەن ساتىلىپ جاتقان كورىنەدى.

QT: اتىراۋداعى 36 دۇكەننەن بولەك جۇزدەگەن ساۋدا ورنى بار. قاراپايىم اتىراۋلىق وتباسى ايىنا ورتاشا ەسەپپەن ازىق-تۇلىككە قانشا قاراجات جۇمسايدى؟

اتىراۋ وبلىسىنىڭ اكىمى: كەشىرىم وتىنەم، وسىنداي سۇراققا مەنىڭ ناقتى جاۋابىم جوق ازىرگە. دايىن ەمەسپىن. قارسىلىعىڭىز بولماسا، مەن سىزگە انىقتاپ، جاۋابىمدى جەتكىزەيىن.

وكق مودەراتورى: ءتىلشى، جالپى بۇل سۇراققا اكىمنىڭ ءباسپاسوز حاتشىسى بريفينگتەن كەيىن تولىق جاۋاپتى جولدايدى، سىزبەن بايلانىسادى.

QT: ءسىز دە اتىراۋ وبلىسىنىڭ تۇرعىنىسىز. ءسىزدىڭ وتباسىڭىز ايلىق ەسەپپەن ازىق-تۇلىككە قانشا قارجى جۇمسايدى؟ ەندى بۇل بەلگىلى دەرەك بولار؟..

اتىراۋ وبلىسىنىڭ اكىمى: ەندى... شىنىن ايتقاندا، مەن اتىراۋدىڭ تۇرعىنىمىن، دۇرىس. بىراق بالالارىم ءوسىپ، ولار قازىر ەلوردادا، نەمەرەلەرىم دە وسىندا. كەلىنشەگىم بىردە بالالارمەن، كەيدە مەنىڭ قاسىمدا بولادى. مەن كوبىندە ۇيدەن تاماقتانبايمىن. سوندىقتان مەنىڭ شىعىنىممەن باسقا اتىراۋلىقتاردىڭ شىعىنىن شىعارۋعا بولمايدى. جەكە شىعىن وتباسىلىق كولەمدە مىسال بولا المايدى.

رەداكتسيا تىلدەسكەن اتىراۋلىق جاينات سادىرقوجا جازعىتۇرىم قىمباتشىلىق ايتارلىقتاي بايقالعانىن، تۇرمىستىق شىعىنى ۇلعايعانىن ايتادى. جەتى ادامنان تۇراتىن وتباسى ازىق-تۇلىك پەن ەت ونىمدەرىن قوسا العاندا ايىنا 100-120 مىڭ تەڭگەگە دەيىن جۇمساۋعا ءماجبۇر. 18 ماۋسىمداعى جاعداي بويىنشا، قالاداعى بولشەك ساۋدادا كارتوپ 330-370, ءسابىز 450-500 جانە جۋا (پياز) 250 تەڭگە شاماسىندا ساۋدالانىپ جاتىر.

«وڭىردە 1 ملرد 100 ملن تەڭگەنىڭ ۇستىندە تاۋارلىق-قارجىلىق تۇراقتاندىرۋ قورى قالىپتاستى. وسىنىڭ شەڭبەرىندە 755 ملن تەڭگە مولشەرىندە اينالىم قورى قۇرىلىپ، وڭىردەگى «يدەال» ءىرى ساۋدا جەلىسىمەن كەلىسىم جاسالدى. سونىڭ ارقاسىندا اتالعان جەلىنىڭ 36 ساۋدا نۇكتەسىندە الەۋمەتتىك ماڭىزى بار ازىق-تۇلىك تاۋارلارىنىڭ 14 ءتۇرى نارىقتان 10-15%-عا تومەن باعادا ساتىلۋدا»، – دەدى دوسمۇحامبەتوۆ بايانداماسىنان باس الماي وقىپ بەرىپ.

وبلىس باسشىسىنىڭ بايانداۋىنشا، الەۋمەتتىك ماڭىزى بار ازىق-تۇلىك تاۋارلارىنىڭ باعاسىن تۇراقتى ۇستاۋ ءۇشىن كاسىپكەرلەرمەن، تاۋار وندىرۋشىلەرمەن جانە ءىرى ساۋدا ورىندارىمەن 200-دەن استام كەلىسىم جاسالدى.

661 مىڭ تۇرعىنى بار وڭىردە ازىق-تۇلىك قانا ەمەس، تۇتىنۋ تاۋارلارى مەن كوممۋنالدىق قىزمەت تولەمدەرىنىڭ تاريفتەرى دە ەلەۋلى دەڭگەيدە ارتقان.

"The Qazaq Times"