ج.ماماي مەن ت.جۇكەەۆ ءباسپاسوز ءماسليحاتىن وتكىزىپ وتىر. الماتى، 17 ماۋسىم. فوتو: سكرينشوت

تىركەلمەگەن (قدپ) قازاقستان دەموكراتيالىق پارتياسى ۇيىمى قازاقستان كونستيتۋتسياسىنىڭ جاڭا نۇسقاسىنىڭ جوباسىن ۇسىندى. بۇ تۋرالى بۇگىن، 17 ماۋسىمدا الماتىدا وتكەن ءباسپاسوز ءماسليحاتىندا بەلگىلى بولدى. 

"1995 جىلى قابىلدانعان قازىرگى كونستيتۋتسيانى نازارباەۆتىڭ قويىن داپتەرىنە تەڭەيتىندەر كوپ. ويتكەنى كەز كەلگەن ۋاقىتتا قالتاسىنان سۋىرىپ الىپ، وعان وزگەرىستەر ەنگىزىپ، وزىنە قاجەتتى ماسەلەلەردى كىرگىزىپ وتىرعانى بەلگىلى. سوندىقتان دەموكراتيالىق پارتيا قازاقستان رەسپۋبليكاسىنىڭ جاڭا كونستيتۋتسياسىن ۇسىنىپ وتىر" دەدى قدپ ليدەرى جانبولات ماماي.

ۇيىم ۇسىنىپ وتىرعان كونستيتۋتسيا قازاقستاننىڭ قازىرگى اتا زاڭىنان الدەقايدا وزگەشە. قۇجات 11 بولىمگە بولىنگەن، 138 باپتان تۇرادى. جانبولات مامايدىڭ ايتۋىنشا، وزدەرى ۇسىنىپ وتىرعان جاڭا كونستيتۋتسيانى ازىرلەۋ باراسىندا دامىعان مەملەكەتتەردىڭ زاڭدارى، حالىقارالىق نورمالار نەگىزگە الىنعان.

جوبا اۆتورلارى بىرنەشە باپتى باستى وزگەرىس رەتىندە اتاپ ءوتتى. ولار تومەندەگىدەي:

  • ءبىر ادام پرەزيدەنت رەتىندە ەكى رەت سايلانا المايدى، ءبىر رەت بەس جىلعا سايلانادى;
  • ەل استاناسىنىڭ اتىن نۇر-سۇلتاننان الاشورداعا وزگەتۋ;
  • ەلدە مەملەكەتتىك ءتىل رەتىندە تەك قازاق ءتىلىن قولدانۋ;
  • قازاقستان قانداي دا ءبىر كونفەدەراتيۆتىك كۆازيمەملەكەتتىك قۇرىلىمدارعا مۇشە بولا المايدى;
  • قازاقستان اۋماعىندا شەتەل اسكەرىن ورنالاستىرۋعا تولىق تىيىم سالىنادى;
  • ەكى پالاتالى پارلامەنتتىڭ ورنىنا ءبىر پالاتالى 120 ادامنان قۇرالعان ۇلتتىق قۇرىلتاي قۇرۋ جانە ونىڭ وكىلەتىن پرەزيدەنتتەن جوعارى ەتۋ;
  • باسپاناعا ءزارۋ ازاماتتاردى تۇرعىن ۇيمەن قامتاماسىز ەتۋ;
  • ەتنيكالىق قازاقتارعا قولداۋ كورسەتۋ;

قازاقستاننىڭ قازىرگى كونستيتۋتسياسى 1995 جىلى بۇكىل حالىقتىق رەفەرەندۋممەن قابىلدانعان. سول كەزدە 95 باپتان تۇراتىن ەلدىڭ باستى زاڭى قازىر 98 باپ بولدى. وسى ۋاقىتقا دەيىن كونستيتۋتسياسىنىڭ 64 بابىنا پارلامەنت ارقىلى بارلىعى بەس رەت وزگەرىستەر مەن تولىقتىرۋلار ەنگىزىلدى. ونىڭ باسىم كوپشىلىگى ەلدىڭ ەكس-پرەزيدەنتى نۇرسۇلتان نازارباەۆتىڭ بيلىگىن كۇشەيتۋگە ارنالدى.

"The Qazaq Times"